وسى ارادا باسىن اشىپ ايتاتىن تاعى ءبىر جاعىمدى جايت وسى كونكۋرستاردىڭ جەڭىمپازدارى وزگەلەر ەمەس, مۇمكىندىگى شەكتەۋلى جانداردىڭ وزدەرى بولىپ شىققاندارى. بۇعان تاڭ قالۋعا بولمايدى. ويتكەنى اششى مەن تۇششىنى تاتقان بىلەر, الىس پەن جاقىندى جورتقان بىلەر دەگەندەي, مۇگەدەك جانداردىڭ جاي-كۇيى مەن مۇمكىندىكتەرىن ولاردىڭ وزدەرىنەن ارتىق ءسىرا, ەشكىم بىلە قويمايتىن شىعار. مۇمكىندىگى شەكتەۋلىلەرگە ارنالعان جوبالاردا «قولارباعا بايلانعانداردىڭ» العا قارا ءۇزىپ شىعۋىنىڭ باستى سىرىن وسىنداي تابيعي زاڭدىلىقتان ىزدەۋىمىز كەرەك سەكىلدى.
ماسەلەگە وسىنداي كوزقاراس تۇرعىسىنان كەلگەندە بيىل اقتوبە وبلىسىندا وتكىزىلگەن «ۇزدىك الەۋمەتتىك جوبالار» كونكۋرسىندا جىگەرلى جان, رۋحى بيىك ازامات شاحان جولداسباەۆتىڭ جەڭىسكە جەتۋى كەزدەيسوقتىق ەمەس دەپ باتىل تۇردە ايتا الامىز. باستى ماماندىعى تەحنيك-ينجەنەر بولىپ تابىلاتىن ول «پاندۋس-وك» اتتى ارنايى مامانداندىرىلعان كاسىپورىنعا جەتەكشىلىك جاسايدى. قازىرگى كۇنى شاحان شاحماران ۇلى استانادا ءوتىپ جاتقان «قازاقستاندا جاسالعان ۇزدىك الەۋمەتتىك جوبالار» اتتى رەسپۋبليكالىق كورمەنىڭ بەل ورتاسىندا ءجۇر.
ويى وزىق, تۇيسىگى تەرەڭ زەردەلى ازامات جوعارىدا اتالعان ارنايى قۇرىلىس كاسىپورنىن 2014 جىلى قۇرىپتى. «مۇنداعى ماقساتىم – الەۋمەتتىك-تۇرمىستىق عيماراتتارعا جانە ونىڭ اۋماعىنا تۇرعىنداردىڭ از جۇمىلدىرىلعان توپتارىنىڭ ەمىن-ەركىن كىرىپ-شىعۋىنا وڭتايلى جاعدايلار تۋعىزۋ ەدى. قازىرگى كۇنى و باستا ويلاستىرعان جوبالارىما تولىقتاي قول جەتكىزدىم دەپ ايتا المايمىن. دەگەنمەن ارادا وتكەن ءۇش جىل ىشىندە ءبىراز ءىستىڭ باسى قايىرىلىپ قالعانىن كوڭىلىمە مەدەۋ تۇتامىن. وسى ارالىقتا ءبىزدىڭ جوبامىز بويىنشا جاسالعان ارنايى پاندۋستارمەن 20 نىسان قامتىلدى», دەدى شاحان باۋىرىمىز ريزاشىلىق كەيىپتە.
شوقتىعى بيىك كورىنەتىن شاحانمەن ەكەۋ-ارا اڭگىمەدە تاعى ءبىر كوڭىلگە تۇيگەن جايت, سونىمەن بىرگە ول پاندۋستار ورناتۋ رەتى مەن ورنى بولماعان الەۋمەتتىك-تۇرمىستىق ورىنداردا ەلەكتر قۋاتىمەن جۇمىس ىستەيتىن, بەينەلەپ ايتقاندا, ءليفتىنىڭ ورنىن ايىرباستاي الاتىن ارنايى كوتەرگىش تەتىكتى ورناتا العاندىعى. ونىڭ سانى پاندۋستارمەن سالىستىرا قاراعاندا الدەقايدا اسىپ تۇسەدى. شاحان جولداسباەۆ بۇدان ءۇش جىل بۇرىن ءوز كاسىپورنىن اشقان كەزگە دەيىن ء«وز كوزىممەن قاراعانداعى قالا» اتتى جوبامەن شۇعىلدانىپ كەلىپتى. ايتار ويىمىزدى بۇدان دا گورى اشىڭقىراپ ايتقاندا مۇنىڭ ءوزى قولارباعا تاڭىلعان مۇگەدەكتىڭ وي-ماقساتتارى بولىپ شىعادى.
ءارى بۇل جەكە باستىڭ قامىن كۇيتتەگەن ءىس ەمەس, تۇتاستاي رەسپۋبليكا قالالارى جاعدايلارىندا مۇمكىندىگى شەكتەۋلى جانداردىڭ سول قالالاردا ءومىر ءسۇرىپ, تۇرمىس كەشۋگە بەيىمدەلە ءبىلۋ مۇمكىندىگىن الدىن-الا قامداعان كەمەل ءىس بولىپ شىعادى. سونىڭ ىشىندە شاحان وزىمەن تاعدىرلاس جاندار اقتوبە قالاسىنداعى بەلسەندى ازاماتتىق ومىرگە قانشالىقتى بەيىمدەلە الاتىنى جونىندە بولەك تولعامدار جاسايدى. بۇل دەرەكتىڭ ءوزى شاحان جولداسباەۆتىڭ ارنايى مامانداندىرىلعان قۇرىلىس كاسىپورنىن قۇرۋ جونىندەگى قادامعا قۇرعاق, جالاڭ ەنتۋزيازممەن ەمەس, ارنايى كاسىبي ازىرلىكپەن كەلگەنىن كورسەتەدى. ونىڭ ايتۋىنا قاراعاندا, قازىرگى كۇنى «پاندۋس-وك»-گە قۇرىلىسى ءجۇرىپ جاتقان نىسانداردان كوپتەگەن سۇرانىستار ءتۇسىپ جاتقان كورىنەدى. ونىڭ تىزبەگى تەك تۇرعىن ۇيلەرمەن شەكتەلمەيتىنىن دە شاحان جولداسباەۆ جەتەكشىلىك جاسايتىن كاسىپورىنعا دەگەن سەنىمنىڭ بەلگىسى دەپ باعالاعانىمىز ءجون شىعار. جوعارىدا ايتىلىپ وتكەندەي, ءبىزدىڭ كەيىپكەرىمىزدىڭ باستى ماقساتى مۇگەدەكتەرگە ارنالعان يكەمدى دە ىڭعايلى پاندۋستار پروبلەماسىن تۇبەگەيلى شەشۋ بولىپ وتىر. وسى ورايدا تاعى ءبىر ايتا كەتەرلىك ماسەلە قازىرگى تاڭدا «پاندۋس-وك»-نىڭ قىزمەتىنە سۇرانىستار تەك رەسپۋبليكامىزدىڭ باتىس وڭىرىنەن عانا ءتۇسىپ كەلسە, الداعى جىلدارى ونىڭ اۋقىمى تۇتاستاي ەلىمىزگە تارالادى دەپ كۇتىلۋدە. ءدال وسىلاي بولارىنا كاسىپورىن باسشىسىنىڭ سەنىمى وتە نىق كورىندى. وسى ارادا شاحان جولداسباەۆ ونەگەلى وتباسى يەسى ءارى ەكى بالانىڭ اكەسى ەكەنىن ايتا كەتكەن ءجون. ونىڭ «سال اۋرۋىنا ۇشىراعان ازاماتتاردى قولداۋ جونىندەگى قوعامدىق بىرلەستىكتىڭ» بەلسەندى مۇشەسى ەكەنى دە بولەك ءبىر اڭگىمەنىڭ ەنشىسى. سونداي-اق رۋحى جوعارى جان, پاراليمپيالىق ءجۇزۋ سپورتى بويىنشا رەسپۋبليكا چەمپيونى, جىل ادامى, «جان شۋاعى» قوعامدىق سىيلىعىنىڭ باس يەگەرى.
تەمىر قۇسايىن,
«ەگەمەن قازاقستان»
اقتوبە
