گريگوري ەگوروۆ جاتتىقتىراتىن جەڭىل اتلەتيكا قۇراماسى ەكى كۇندە 10 مەدال جەڭىپ الدى. ونىڭ التاۋى – التىن. وتكەن جارىس كۇنى سەرگەي گريگورەۆ (سىرىقپەن سەكىرۋ), ولگا رىپاكوۆا (ۇزىندىققا سەكىرۋ) جانە يۆان يۆانوۆ (يادرو سەرپۋ) V ازيا ويىندارىنىڭ التىن جۇلدەسىن يەلەنگەن بولاتىن.
جارىستىڭ بەسىنشى كۇنىندە ولگا رىپاكوۆا ء(ۇش قارعىپ سەكىرۋ), ۆيكتوريا زيابكينا (60 مەترگە جۇگىرۋ), ەلينا ميحينا (400 مەترگە جۇگىرۋ) توپ جاردى. ماريا وۆچيننيكوۆا ء(ۇش قارعىپ سەكىرۋ) كۇمىستى يەلەنسە, ولگا سافرونوۆا (60 مەترگە جۇگىرۋ) مەن ميحايل ليتۆين (400 مەترگە جۇگىرۋ) ۇزدىك ۇشتىكتىڭ قاتارىنان كورىندى. ال ايەلدەر اراسىندا 4ح400 مەترلىك ەستافەتادان قازاقستان قىزدار قۇراماسى چەمپيون اتانعان بولاتىن. الايدا ۇيىمداستىرۋشىلار التىن جۇلدەمىزدى قايتارىپ الدى. سەبەبى جارىس كەزىندە اناستاسيا ۆينوگرودوۆا سىزىقتى باسىپ كەتىپ, قۇرامامىزدى جارىستان شەتتەتتى. ءسويتىپ, التىن تايلاند قۇراماسىنا بۇيىردى.
جالپى, قازاقستاننان اشعابادقا 14 جەڭىل اتلەت اتتانعان بولاتىن. ونىڭ توعىزى جۇلدەگە قول جەتكىزدى. جەڭىل اتلەتيكا بويىنشا, قازاقستاندىق اتلەتتەر مەدال سانى بويىنشا جالپى ەسەپتە توپ جاردى.
سونىمەن قاتار بەلبەۋ كۇرەسىنەن ءۇش بالۋانىمىز التى مەدال يەلەندى. ايدوس قۇلمانبەتوۆ (82 كگ) V ازيا ويىندارىنىڭ چەمپيونى اتانسا, 90 كيلو سالماقتا بەلدەسكەن ەرسۇلتان مۇزاپپاروۆ ءبىر كۇمىس جانە ءبىر قولا مەدالدى قاناعات تۇتتى. سونداي-اق پەريزات جاقىپبەكوۆا (70 كگ) كلاسسيكالىق جارىستا قارسىلاسىنا ەسە جىبەرىپ, كۇمىس جۇلدەنى مىسە تۇتسا, ەركىن ءداستۇر بويىنشا كۇمىسكە قول جەتكىزدى. ال بەكبول نۇرلان ۇلى (100 كگ) قولا جۇلدەگەر اتاندى.
ال بيليارد سپورتىنان ەرنار شىمباەۆ پەن مۋايتاي وكىلى ەلامان ساياساتوۆ V ازيا ويىندارىنىڭ كۇمىس جۇلدەسىن يەلەندى. قۇراما قورجىنىنا قولا مەدالدى دجيۋ-دجيتسۋدان گالينا دۋۆانوۆا, مۋايتاي سپورتىنان ەرقانات وسپان (60 كگ) مەن ناميك نەفتاليەۆ (71 كگ) سالدى.
جابىق عيماراتتاعى جانە جاۋىنگەرلىك ونەر بويىنشا V ازيا ويىندارىنىڭ التىنشى كۇنىنىڭ قورىتىندىسى بويىنشا, قازاقستان قۇراماسى جالپىكوماندالىق ەسەپتە 31 مەدالمەن (7, 9, 15) بەسىنشى ورىنعا تۇراقتادى. ازىرشە, تۇرىكمەنستان قۇراماسىنىڭ سپورتشىلارى الدىنا جان سالار ەمەس. كەشەگى كۇننىڭ كەستەسىندەگى ناتيجە بويىنشا, ولاردىڭ قورجىنىندا 130 مەدال بار (55 التىن, 38 كۇمىس جانە 37 قولا). يران يسلام رەسپۋبليكاسىنىڭ سپورتشىلارى 43 جۇلدەمەن (11, 8, 24) ەكىنشى ورىندا تۇر. ال ءۇشىنشى ساتىعا تابان تىرەگەن تايلاند قۇراماسىنىڭ قورجىنىندا 33 مەدال بار (10, 11, 12).
ءالي بيتورە,
«ەگەمەن قازاقستان»
