بيىل كورەيلەردىڭ قيىر شىعىستان قازاقستانعا قونىس اۋدارعانىنا 80 جىل تولادى. وعان قوسا, قازاقستان رەسپۋبليكاسى مەن كورەيا رەسپۋبليكاسىنىڭ اراسىندا ديپلوماتيالىق قاتىناستاردىڭ ورناعانىنا 25 جىل تولۋىنا وراي تولىمدى شارالار لەگى باستالدى.
دوستىق ۇيىندە باستالعان سالتاناتتى تۇساۋكەسەرگە ەلىمىزدەگى كورەيلەر عانا ەمەس, وڭىرلەردەگى وتانداستارىمىزدىڭ بەتكە ۇستار وكىلدەرى, ءارىسى سەۋل مەن استانادان حالىق وتە كوپ جينالدى.
ءبىر جاعىنان قازاقستاندى مەكەندەيتىن كورەي ۇلتىنىڭ اقساقالدارى بۇل ايتۋلى داتانى قاسىرەتتى 1937 جىلدى ەسكە الۋ دەپ قابىلداۋ كەرەك پە, الدە مەرەكە رەتىندە اتاپ وتكەن ءجون بە دەگەندى تالقىعا سالعان ەكەن. ۇلكەندەر جينالا كەلە, وسى ەلدە ءوسىپ-وركەندەدىك, ەكىنشى وتانىمىزدى تاپتىق دەپ ۇيعارىپ, ۇلكەن ۇيىمشىلدىقپەن ەكى كۇنگە سوزىلاتىن مەرەكەلىك شارالار لەگىن جوعارى دەڭگەيدە اتاپ وتۋگە كەلىسىپتى.
ناتيجەسى كوز الدىمىزدا. وسىناۋ باستاماعا قازاقستان حالقى اسسامبلەياسى دا مۇرىندىق بولىپ, قحا توراعاسىنىڭ ورىنباسارى – حاتشىلىق مەڭگەرۋشىسى دارحان مىڭباي بۇكىل ءىس-شارانىڭ ماڭىزدىلىعىنا توقتالدى. ول ەنتسيكلوپەديانىڭ اۆتورلارى تولىمدى جۇمىس ىستەگەنىن ايتا كەلە, شيرەك عاسىرعا جۋىق جاسالىپ جاتقان ەنتسيكلوپەديالار بار ەكەنىن, بىراق قولعا تيگەن «قازاقستان كورەيلەرى ەنتسيكلوپەدياسى» ساپالىق, مازمۇندىق تۇرعىدا دارالاناتىنىن اتادى.
ايتۋلى شارادا تالايدى تولقىتقان ەستەلىكتەر ايتىلدى. ۇعا پرەزيدەنتى اكادەميك مۇرات جۇرىنوۆ كورەي دوستارى جايلى جان تەبىرەنتەرلىك جاقسى ەستەلىكتەرىمەن ءبولىسىپ ەنتسيكلوپەديا جوباسىنىڭ جەتەكشىسى يۆان پاك باستاعان اۆتورلار ەكى حالىقتىڭ دوستىعى جايلى سىر شەرتتى. تۇساۋكەسەردە كورەيانىڭ الماتىداعى باس كونسۋلدىعىنىڭ باس كونسۋلى چجون سىنگ مين بار بولعانى ءۇش جىلدا وسىنداي سۇبەلى جيناقتىڭ جارىق كورۋىمەن قۇتتىقتادى.
سالتاناتتى جيىن بارىسىندا دەپورتاتسيالاۋدىڭ قيىندىقتارىن باستان كەشىرگەن جانە قازاقستاننىڭ دامۋىنا ۇلەس قوسقان ارداگەرلەرگە قۇرمەت كورسەتىلىپ, كۇننىڭ ەكىنشى جارتىسىندا رەسپۋبليكا سارايىندا مەرەكەلىك كونتسەرت ءوتتى.
ايناش ەسالي,
«ەگەمەن قازاقستان»
الماتى
