«سيريالىق رەتتەۋدەگى قاۋىپتى جاعدايدى استانا پروتسەسى كادىمگىدەي قۇتقارىپ شىقتى», دەدى م.لايچاك نيۋ-يوركتەگى بۇۇ شتاب-پاتەرىندە جاقىندا قازاقستان سىرتقى ىستەر ءمينيسترى قايرات ابدىراحمانوۆپەن كەزدەسۋى بارىسىندا.
سلوۆاك ساياساتكەرى ءوزىنىڭ باس اسسامبلەيادا توراعالىق ەتۋ كەزىندەگى جانجالداردىڭ الدىن الۋ, كوشى-قون ماسەلەلەرى جانە بۇۇ رەفورماسىندا باس حاتشىنى قولداۋ سەكىلدى ءۇش باسىمدىعى تۋرالى ايتتى. ول بۇۇ كۇن تارتىبىندەگى بارلىق وزەكتى ماسەلەلەر بويىنشا قازاقستانمەن تىعىز قارىم-قاتىناستا جۇمىس ىستەۋگە ازىرلىگىن ءبىلدىردى.
ق.ءابدىراحمانوۆ قازاقستان پرەزيدەنتى نۇرسۇلتان نازارباەۆتىڭ 29 تامىزدا ماگاتە-ءنىڭ تومەن بايىتىلعان ۋران بانكىنىڭ اشىلۋ ءراسىمى بارىسىندا جاريالاعان باستامالارى تۋرالى حاباردار ەتتى. اتاپ ايتقاندا, يادرولىق قارۋ يەلەنۋشى ەلدەردىڭ ءسامميتىن شاقىرۋ, يادرولىق قارۋسىز وڭىرلەرگە كىرەتىن بارلىق مەملەكەتتەردىڭ كۇش-جىگەرىن بىرىكتىرۋ ماسەلەلەرى ءسوز بولدى. ءمينيستردىڭ ايتۋىنشا, قازاقستان يادرولىق قاۋىپسىزدىك جونىندەگى جاھاندىق ءسامميتتى استانادا وتكىزۋگە دايىن.
كەزدەسۋ بارىسىندا بۇۇ-نىڭ الماتىدا حالىقارالىق وڭىرلىك حابىن قۇرۋدىڭ پراكتيكالىق اسپەكتىلەرى تالقىلاندى.
بۇۇ باس اسسامبلەياسى 72-ءشى سەسسياسىنىڭ اياسىندا قازاقستان سىرتقى ىستەر ءمينيسترى بۇۇ باس حاتشىسىنىڭ تەرروريزمگە قارسى كۇرەس جونىندەگى ورىنباسارى ۆلاديمير ۆورونكوۆپەن جانە قارۋسىزدانۋ ماسەلەلەرى جونىندەگى ورىنباسارى يسۋمي ناكوميتسۋمەن كەزدەستى.
قازاقستاننىڭ بۇۇ قاۋىپسىزدىك كەڭەسىندە توراعالىق ەتۋگە دايىندىعىنا بايلانىستى ق.ءابدىراحمانوۆ موڭعوليا, بىرىككەن اراب امىرلىكتەرى, ماجارستان, بۋرۋندي, گامبيا, گابون جانە بۋركينا-فاسو سىرتقى ىستەر مينيسترلەرىمەن دە ەكىجاقتى كەزدەسۋلەر مەن كونسۋلتاتسيالار وتكىزدى.
افريكا مەملەكەتتەرى بۇۇ قاۋىپسىزدىك كەڭەسىنىڭ كۇن تارتىبىندەگى دامۋشى الەمنىڭ مۇددەلەرىن قوزعاۋعا قاتىستى قازاقستاننىڭ دايەكتى جانە ءادىل ۇستانىمىنا ريزاشىلىقتارىن ءبىلدىردى. قازاقستان تاراپى افريكا قۇرلىعىنىڭ وكىلدەرىنە استاناداعى ەكسپو-2017 كورمەسىنە بەلسەندى قاتىسقاندارى ءۇشىن العىس ايتتى.
