انالاردى جىلاتقانى نەسى؟

رەداكتسيامىزعا شىعىس قازاقستان وبلىسى ءۇرجار اۋدانىنان رايحان قۇسايىنوۆا, بالعىن اكىمجانوۆا, كۇلاش اقىنتاەۆا جانە ت.ب. ونشاقتى انانىڭ قولى قويىلعان حات كەلدى. بۇلار كوپ بالالى انالار ەكەن. وزدەرىنە پرەزيدەنتتىڭ جارلىعىنا سايكەس بەرىلگەن «التىن القا» جانە «كۇمىس القا» توسبەلگىلەرىن العا­نى­مەن, قوسىمشا تولەنەتىن مەملەكەتتىك جاردەماقىعا قولدارى جەتپەگەن ولار شىرىلداپ, ءبىراز تابال­دى­رىق­ت­ى توزدىرىپتى. سونىڭ ىشىندە اۋدان اكىمىنە, زەي­نەت­اقى تولەۋ ورتالىعىنىڭ ديرەكتورىنا تالاي بارعان­دارى­مەن, ماڭدايلارى تاسقا تيگەندەي, ءمىز باقپاعان كۇيدى كورەدى. سودان كىمگە شاعىنارىن بىلمەي جۇرگەن جاندار ءماجىلىس دەپۋتاتى, «نۇر وتان» حدپ ساياسي كەڭەسىنىڭ مۇشەسى نۇرتاي سابيليانوۆقا بارادى. انالاردىڭ شارۋاسىنا باتىل ارالاسقان دەپۋتات مەملەكەتتىك بيۋد­جەتتەن بولىنگەن ءتيىستى اقشالارىنىڭ قولدارىنا تيۋىنە مۇرىندىق بولادى. ءتيىستى دۇنيەنىڭ ءوزىن زار قاعىپ العان انالاردىڭ نۇرتاي ساليح ۇلىنا ايتار العىسى شەكسىز. «سىزگە انالىق اق جۇرەگىمىزبەن ۇلكەن راحمەت ايتا وتىرىپ, دەنىڭىزگە ساۋلىق, وتباسىڭىزعا اماندىق تىلەيمىز. ەڭبەگىڭىز ەلەنىپ, حالىقتىڭ العىسىنا بولەنە بەرىڭىز», دەيدى كوپ بالالى انالار. دۇرىس ەكەن, ايتقاندارىنا «ءاۋمين» دەيىك. بىراق ءتيىستى اقشالارىن قالتالارىنان شىعاراتىنداي ۋاقى­تىن­دا بەرگىزبەي, جازىقسىز جانداردى شىرىلداتىپ, ەسىكتەن ەسىككە جۇگىرتىپ قويعان, ءسويتىپ, مىندەتتەرىنە جاۋاپسىزدىقپەن قاراعان ءۇرجار اۋدانىنىڭ اكىمى مەن ءتيىستى شەنەۋنىكتەرگە نە دەيمىز. كوپ بالالى انالاردىڭ وسى تاقىلەتتەس پروبلەمالارى باسقا جەرلەردەن دە ەستىلىپ قالىپ جاتادى. سوندا كەيبىر لاۋازىم يەلەرى مەن شەنەۋنىكتەر انادان تۋماعان با؟! بۇعان وبلىس اكىمدىگى نە ايتار ەكەن؟ جاقسىباي سامرات.