تۇرىكمەنستان پرەزيدەنتى گۋربانگۋلى بەردىمۇحامەدوۆ قازاقستان پرەزيدەنتىن اشعاباتتا ءوتىپ جاتقان ازيا ويىندارىنىڭ اشىلۋ سالتاناتىنا قۇرمەتتى قوناق رەتىندە قاتىسۋعا ارنايى شاقىرعان بولاتىن. قازاقستان پرەزيدەنتى وزبەكستانداعى مەملەكەتتىك ساپارى اياقتالىسىمەن بىردەن تۇرىكمەنستانعا اتتاندى.
بورىكتىنىڭ نامىسى ءبىر...
نۇرسۇلتان نازارباەۆتى گۋربانگۋلى بەردىمۇحامەدوۆ اۋەجايدان ءوزى قارسى الدى. ازيا ويىندارىنىڭ اشىلۋ سالتاناتى باستالعانعا دەيىن تۇرىكمەنستان پرەزيدەنتى مەن قازاقستان پرەزيدەنتى ەكىجاقتى كەزدەسۋ وتكىزىپ, ەلدەر اراسىنداعى ىنتىماقتاستىق ماسەلەلەرىن تالقىلادى. «بورىكتىنىڭ نامىسى ءبىر» دەمەكشى, باۋىرلاس ەلدەردىڭ حالىقارالىق دەڭگەيدەگى وسىنداي اۋقىمدى شارالاردى وتكىزۋ كەزىندەگى ءبىرىن-ءبىرى قولداپ-قولپاشتاۋى وتە ماڭىزدى ەكەندىگىن اڭگىمەلەدى.
جاۋىنگەرلىك ونەر تۇرلەرى بويىنشا جابىق كەشەندە وتەتىن V ازيا ويىندارى – سپورت الەمىندەگى بەدەلى بيىك, بايراقتى باسەكەلەردىڭ ءبىرى.
مۇنداي حالىقارالىق جارىس بۇرىن ەكى جىلدا ءبىر وتكىزىلەتىن, تەك 2013 جىلدان بەرى ونى 4 جىلدا ءبىر رەت وتكىزۋ تۋرالى شەشىم قابىلداندى. سول جىلى شارا وڭتۇستىك كورەيادا وتكەن بولاتىن. وعان دەيىن مۇنداي ازيا ويىندارىنىڭ جالاۋى ۆەتنام (2005 جىلى), قىتاي (2007 جىلى), تايلاند (2009 جىلى) سياقتى ازيانىڭ الپاۋىت ەلدەرىندە جەلبىرەدى.
«وسىنداي كەزدە قولداۋ كورسەتۋ ءبىزدىڭ كورشىلىك, باۋىرلاستىق پارىزىمىز دەپ بىلەمىن. ءسىزدى جابىق كەشەندە وتەتىن ازيا ويىندارىنىڭ اشىلۋىمەن قۇتتىقتايمىن. وسى شارا قارساڭىندا كوپتەگەن سپورتتىق نىساندار سالىندى. ولاردىڭ ءبارى ەرتەڭگى كۇنى حالىق يگىلىگىنە قالادى. سونىمەن قاتار, مۇنداي شارالار تۇرىكمەنستاندى, ونىڭ استاناسىن جاقىن تاني تۇسۋگە, مەملەكەتتىڭ تاۋەلسىزدىك جىلدارى ىشىندەگى جەتىستىكتەرىن الەمگە كەڭىنەن پاش ەتۋگە مۇمكىندىك بەرەدى», دەدى قازاقستان پرەزيدەنتى. سونىمەن قاتار, مەملەكەت باسشىسى قازاق ەلى قىسقى ازيا ويىندارى, بۇكىلالەمدىك ستۋدەنتتەر ۋنيۆەرسياداسى سىندى الەمدىك دەڭگەيدەگى اۋقىمدى سپورتتىق شارالاردى لايىقتى دەڭگەيدە وتكىزگەنىن اتاپ ءوتتى.
«تاياۋدا عانا ەكسپو اياقتالدى. ءبىزدىڭ وڭىرىمىزدە مۇنداي وقيعالاردىڭ ءوتۋى وتە ماڭىزدى. ال بۇگىن ازيا ويىندارىنىڭ اشىلۋىنا زور ريزاشىلىقپەن قاتىساتىن بولامىز. ءبىزدىڭ قارىم-قاتىناستارىمىزعا قاتىستى ايتار بولسام, ءسىزدىڭ ساپارىڭىزدان كەيىن كوپ شارۋا جاسالدى. مەنىڭشە, ەكونوميكالىق ىقتىماقتاستىعىمىز ارتادى», دەدى پرەزيدەنت.
نۇرسۇلتان نازارباەۆ ءسوز اراسىندا وزبەكستانعا مەملەكەتتىك ساپارمەن بارىپ كەلە جاتقاندىعىن, جۇرگىزىلگەن كەلىسسوزدەر بارىسىندا كوپتەگەن ماسەلەلەردىڭ شەشىلگەندىگىن دە اتاپ ءوتتى.
تۇرىكمەنستان پرەزيدەنتى ءوز كەزەگىندە شاقىرۋ ۇسىنىسىن قابىل العانى ءۇشىن ەلباسىنا ريزاشىلىعىن ءبىلدىردى. «بۇل ءبىزدىڭ ورتاق مەرەكەمىز سانالادى. تۇرىكمەندەر مەن قازاقتار, تاجىكتەر سپورتتىق ءوڭىر سانالادى. مەنىڭشە, بارشامىزعا ورتاق وسىناۋ مەرەكەدە سالاماتتى ءومىر سالتىن قالاي قادىرلەپ, حالىقتى قالاي ۇيىستىرۋ كەرەكتىگىن بۇكىل الەمگە پاش ەتەتىن بولامىز», دەدى ءوز كەزەگىندە گۋربانگۋلى بەردىمۇحامەدوۆ. ايتۋىنشا, ازيا ويىندارىنا الەمنىڭ 64 مەملەكەتىنەن سپورتشىلار كەلگەن. بۇعان قوسا, بۇۇ وتىنىشىمەن بوسقىندار دا بۇل جارىسقا ارنايى كوماندا قۇرىپ, سىنعا تۇسپەك. وسى قادامى ارقىلى تۇرىكمەن حالقى وڭىردەگى تۇراقتىلىقتى, قاۋىپسىزدىكتى ساقتاۋعا مۇددەلى ەكەندىگىن كورسەتۋگە ۇمتىلۋدا.
ء«سىز ەكسپو-2017 كورمەسىن وتكىزدىڭىز. وسىناۋ ءوڭىر ءۇشىن بۇرىن-سوڭدى بولماعان اۋقىمدى شارانى ەڭ جوعارى دەڭگەيدە ۇيىمداستىرا الدىڭىزدار. بۇگىندە ءسىز بەن ءبىز وسىنداي بيىك شىڭداردى باعىندىرۋدامىز», دەدى تۇرىكمەنستان باسشىسى.
سپورت ساڭلاقتارىنا سەنىم زور
ەلباسى ەكىجاقتى كەزدەسۋدەن سوڭ اشعاباتتاعى جاۋىنگەرلىك ونەر تۇرلەرى بويىنشا جابىق كەشەندە وتەتىن V ازيا ويىندارىنا كەلگەن قازاقستاننىڭ ۇلتتىق قۇراماسىمەن جانە سپورتشىلار دەلەگاتسياسىمەن كەزدەستى.
كەزدەسۋ بارىسىندا ەلباسى ۇلتتىق قۇرامانىڭ دايىندىعىمەن تانىسىپ, اشعاباتقا سپورتشىلارىمىزدى قولداۋ ءۇشىن كەلگەنىن ايتتى.
«مۇندا ويىندارعا قاتىسىپ جاتقان ەلدەردىڭ ەڭ ۇزدىك سپورتشىلارى كەلىپ وتىر. ءبىزدىڭ قۇرامادا دا كوپتەگەن تانىمال چەمپيوندار بار», دەدى نۇرسۇلتان نازارباەۆ.
مەملەكەت باسشىسىنا قازاقستاننىڭ ۇلتتىق قۇراماسىنىڭ كاپيتانى ءارى وسى ويىنداردا تاەكۆوندودان ونەر كورسەتەتىن نۇرلان مىرزاباەۆ العىس ءبىلدىردى. «ەڭ الدىمەن, سىزگە ەلىمىزدەگى سپورتتى دامىتۋعا ۇدايى قولداۋ كورسەتىپ وتىرعانىڭىز ءۇشىن العىس ايتامىن. مەملەكەتىمىزدىڭ الەمدىك سپورت ارەنالارىنداعى بارلىق جەتىستىكتەرىنە ءسىزدىڭ قوسقان ۇلەسىڭىز زور. بىزدەر – قازاقستان ۇلتتىق قۇراماسىنىڭ مۇشەلەرى اشعاباتتا ءوتىپ جاتقان ويىنداردا ءتول تۋىمىزدىڭ بيىكتە ءجيى جەلبىرەۋى ءۇشىن بار كۇش-جىگەرىمىزدى سالامىز», دەدى قازاقستان قۇراماسىنىڭ كاپيتانى.
پرەزيدەنت مەملەكەت تاراپىنان ەلىمىزدە سپورتپەن شۇعىلدانىپ, سالاماتتى ءومىر سالتىن ۇستانۋعا بارلىق جاعداي جاسالىپ جاتقانىن ايتىپ, سالاماتتى ۇلت قالىپتاستىرۋ ءۇشىن وتاندىق اتلەتتەرىمىزدىڭ جەتىستىكتەرى ماڭىزدى ەكەنىن اتاپ ءوتتى.
«قازاقستاننىڭ بارلىق وڭىرىندە ءتۇرلى سپورت نىساندارى سالىنۋدا, اتلەتتەرىمىز جوعارى دەڭگەيدەگى سايىستارعا قاتىسۋدا. ارالارىڭىزدا جەتىستىكتەرگە جەتكەن ايگىلى سپورتشىلار بار. ءبىزدىڭ جاستارىمىز – دارىندى. جىل سايىن سپورتتا جاڭا ەسىمدەر شىعىپ جاتىر. جالپى, جاس جەتكىنشىكتەر سىزدەردىڭ جەڭىستەرىڭىزگە قاراپ, سپورتپەن شۇعىلدانۋعا ۇمتىلاتىن بولادى. ول سالاماتتى ۇلت قالىپتاستىرۋدىڭ باستى شارتى بولىپ سانالادى. سىزدەر وسكەلەڭ ۇرپاققا ۇلگى بولۋلارىڭىز كەرەك», دەدى ەلباسى.
تانىمال قازاقستاندىق جەڭىل اتلەت, لوندونداعى وليمپيادا ويىندارىنىڭ چەمپيونى جانە بەيجىڭ مەن ريو-دە-جانەيروداعى وليمپيادا ويىندارىنىڭ قولا جۇلدەگەرى ولگا رىپاكوۆا ءسوز سويلەپ, مەملەكەت باسشىسىنا العىس ايتتى. «جۇمىس كەستەڭىزدىڭ تىعىز ەكەنىنە قاراماستان, بىزگە قامقورلىق پەن قولداۋ كورسەتىپ جاتقانىڭىز ءۇشىن سىزگە بارلىق سپورتشىلارىمىزدىڭ اتىنان زور العىسىمىزدى ايتۋعا رۇقسات ەتىڭىز. ءسىز بىزبەن كەزدەسىپ اڭگىمەلەسۋگە, اق تىلەگىڭىزدى ايتىپ, باتاڭىزدى بەرۋگە ءاردايىم ۋاقىت تاباسىز. ءبىز ءوزىمىزدى تەك جاقسى قىرىمىزدان تانىتىپ, ءسىزدى جانە بارشا قازاقستاندىق جانكۇيەرلەردى قۋانتۋعا بارىمىزدى سالامىز», دەدى ولگا رىپاكوۆا.
سوڭىندا مەملەكەت باسشىسى قازاقستانداعى ميلليونداعان جانكۇيەرلەر سپورتشىلارىمىزدىڭ تابىستى ونەر كورسەتەتىنىنە سەنىمدى ەكەنىن ايتىپ, ولاردىڭ جارىستى ءساتتى باستاپ, ايقىن جەڭىسكە جەتۋىنە تىلەكتەستىگىن ءبىلدىردى.
دينارا بىتىك,
«ەگەمەن قازاقستان» –
اشعاباتتان
سۋرەتتەر پرەزيدەنتتىڭ ءباسپاسوز قىزمەتىنەن الىندى
