تۇرعىن ءۇي قۇرىلىسىنا قاتىستى «نۇرلى جەر» جاڭا باعدارلاماسىنىڭ شەڭبەرىندە 2016 جىلدان باستاپ كوممەرتسيالىق بانكتەردىڭ يپوتەكالىق قارىزدارىن سۋبسيديالاۋ باعىتى قاراستىرىلعان. قارىز الۋشىنىڭ سۋبسيديالاناتىن قارىز بويىنشا تۇپكىلىكتى تولەمى 10 پايىز بولادى, قالعان بولىگىن قيك تولەيدى. ايتا كەتۋ كەرەك, قارىز بەرۋ مەن راسىمدەۋ ىسىندە بانكتەر ەشقانداي كوميسسيا ۇستامايدى. اتالعان باعدارلاما بويىنشا تەك باستاپقى باسپانا الۋعا عانا مۇمكىندىك بار, ول ءۇشىن تۇرعىن ءۇي قۇنىنىڭ 30 پايىزى العاشقى جارنا رەتىندە تولەنەدى, قالعان قارىز 10 جىلعا سۋبسيديالانادى. الماتى مەن استانادا نەسيەنىڭ سۋبسيديالاناتىن جوعارى مولشەرى 20 ملن تەڭگە, وبلىستاردا – 15 ملن تەڭگە.
«بۇگىندە يپوتەكا نارىعىندا مولشەرلەمە وتە جوعارى. بانكتەردە «ۇزاققا بەرىلەتىن» اقشا جوق, بولسا دا ونىڭ قۇنى قىمبات تۇرادى. بۇل قارىز الۋشى ءۇشىن دە, بانك ءۇشىن دە ءتيىمسىز. وسى ماسەلەنى شەشۋ ءۇشىن يپوتەكالىق قارىزدار بويىنشا مولشەرلەمەنى سۋبسيديالاۋ باعدارلاماسى قولعا الىندى. قارىز الۋشى يپوتەكانى ارزانعا الادى, ال بانك ءوز مولشەرلەمەسىن مەملەكەتتىك سۋبسيديالاۋ ارقىلى الادى. وسىنداي مەحانيزم يپوتەكالىق نارىقتى دامىتۋعا, تۇرعىن ءۇي قۇرىلىسىنا قارقىن بەرۋگە, جاڭا جۇمىس ورىندارىنىڭ اشىلۋىنا مۇمكىندىك بەرەدى. ءبىز قارجىلىق وپەراتور رەتىندە باعدارلامانىڭ جۇمىس ىستەۋىنە, ەل ەكونوميكاسى مەن حالىقتىڭ يگىلىگىنە پايدا اكەلۋگە بار كۇشىمىزدى سالامىز», - دەيدى «قازاقستان يپوتەكالىق كومپانياسى» يپوتەكالىق ۇيىمى» اق اتىراۋ ايماقتىق وكىلدىگىنىڭ ديرەكتورى ءالىمجان دابىسوۆ.
بۇگىندە «نۇرلى جەر» باعدارلاماسى بويىنشا اتىراۋداعى ءتورت بانك يپوتەكانى سۋبسيديالاۋعا ءوتىنىش قابىلداپ جاتىر. ولار: «بانك تسەنتر كرەديت», «اتف بانك», «سبەربانك» جانە «بانك ۆتب». جۋىردا «Bank RBK» مەن «نۇربانك» دا باعدارلاماعا قوسىلادى دەپ جوسپارلانۋدا.
اتىراۋ قالاسى بويىنشا «بانك تسەنتر كرەديتكە» جالپى سوماسى 32 888 900 تەڭگە بولاتىن 4 ءوتىنىش تۇسكەن. ونىڭ بارلىعى دا ماقۇلداندى.
جاڭا باعدارلامانىڭ جاقسىلىعىن كورگەن وتباسىلاردىڭ ءبىرى – ازامات پەن اننا. ادەن اتتى ۇلدارى مەن اگنيا اتتى قىزدارى بار جانۇيا اتىراۋعا رەسەيدەن ءتورت جىل بۇرىن قونىس اۋدارعان. وسى ۋاقىت بويى پاتەر جالداپ كەلگەن ولار باسپاناعا يە بولۋدىڭ بارلىق مۇمكىندىكتەرىن قاراستىرىپتى. وسى جىلدىڭ باسىندا ءبىر بانكتەن كەزدەيسوق «نۇرلى جەر» باعدارلاماسى تۋرالى اقپاراتتى كورەدى. كوپ ويلانباي, باعدارلاماعا قاتىسۋعا بەل بۋعان وتباسى «نۇرسايا» ىشقاماۋدانىنان جاڭا دا جايلى پاتەر الدى. «بانك قىزمەتكەرلەرىمەن سويلەستىك, ولار كەڭەس بەردى. قۇجات جيناپ, ءبىر-ەكى اپتا جاۋاپ كۇتتىك. باسپانالى بولاتىنىمىزدا ەستىگەندە قاتتى قۋاندىق. باعدارلامانىڭ ارتىقشىلىعى – پايىزدىق مولشەرلەمەسى تومەن, 5 پايىزىن مەملەكەت تولەيدى. سوندا ءبىز ايىنا 70 مىڭ تەڭگەدەي ۇنەمدەيدى ەكەنبىز. بۇعان دەيىن بۇرىن پايدالانىلعان پاتەرلەردى قاراپ جۇرەتىنبىز, ەندى مىنە ءوزىمىزدىڭ جاپ-جاڭا ءۇيىمىز بار», - دەيدى اننا سۇيىنباەۆا.
«نۇرلى جەر» باعدارلاماسى بويىنشا يپوتەكالىق قارىزداردى سۋبسيديالاۋعا جىل سايىن 10 ملرد تەڭگە بولىنەدى. بولجام بويىنشا بۇل باستاپقى باسپانا ساتىپ الۋ كەزىندە 120 ملرد تەڭگە بولاتىن 8 مىڭ قارىزدى قامتيدى. وسىلايشا «نۇرلى جەر» باعدارلاماسىن جۇزەگە اسىرۋ ەلىمىزدەگى تۇرعىن ءۇي قۇرىلىسىنىڭ دامۋىنا قارقىن بەرمەك.
باقىتگۇل باباش,
«ەگەمەن قازاقستان»
