قازاقستان كاسىپوداقتارى فەدەراتسياسىنىڭ توراعاسى ابىلعازى قۇسايىنوۆ قوعامدىق سانانى جاڭعىرتۋدىڭ نەگىزگى باسىمدىعى قازاقستاندىقتاردىڭ تابىستى جانە باسەكەگە قابىلەتتى بولۋى ءۇشىن ءوز-وزىنە سىني كوزقاراستارىن قايتا قاراۋى قاجەتتىگىن اتاپ ءوتتى. سونىمەن قاتار, ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىن تالقىلاۋعا ارنالعان فورۋم جۇمىسى ءتورت كۇنگە سوزىلاتىنىن جەتكىزدى.
«قازىر ءسوزدىڭ ەمەس, ءىستىڭ زامانى تۋدى. ەلباسى اتالعان ماقالادا قاي جۇمىستى قالاي اتقارۋ كەرەكتىگىن, ونى قالاي جۇزەگە اسىرعاندا ناتيجەلى قورىتىندى بەرەتىندىگىن اتاپ كورسەتتى. باسقوسۋعا ەلىمىزدىڭ عانا ەمەس, شەتەلدەن شاقىرىلعان ساراپشىلار دا قاتىسىپ وتىر. بۇگىنگى تاڭدا كاسىپوداق قۇرامىندا 2 ميلليونعا جۋىق مۇشە بار. ولارعا وتىرىستا ورتاعا سالىنعان ويلاردى تۇجىرىمداپ, جەتكىزۋ – ءبىزدىڭ مىندەتىمىز», دەدى ءا.قۇسايىنوۆ.
سونداي-اق, ول كاسىپوداقتىڭ اتقاراتىن نەگىزگى مىندەتتەرىنە جالاقىنى ۋاقىتىندا بەرۋدى قامتاماسىز ەتۋ, جاقىندا قابىلدانعان ەڭبەك كودەكسىنىڭ ءاربىر بابىنىڭ ورىندالۋىن تالقىلاۋ, ءبىر سوزبەن ايتقاندا, قاراپايىم حالىقتىڭ قۇقىعىن قورعاۋ كىرەتىندىگىن باياندادى.
فورۋمدا رەسەي فەدەراتسياسىنىڭ عىلىمي قاۋىمداستىعى اتىنان ءسوز سويلەگەن پروفەسسور ب.تيتوۆ: «سانانى جاڭعىرتۋ – قازاقستاندىقتاردىڭ سانالى تاڭداۋى. بۇل قازاقستاننىڭ ادام كاپيتالى دامۋىنىڭ جوعارعى يندەكسىنە يە تابىستى مەملەكەتتەر قاتارىندا بولۋىنىڭ باستى شارتى», دەدى.
باسقوسۋعا قاتىسۋشىلار الەۋمەتتىك جاڭعىرۋدىڭ باستى نىشانى تەحنولوگيالىق ويلاۋ دەڭگەيىنە ساپالى كوشۋ, زامان تالاپتارىنا سايكەس الەۋمەتتىك جانە رۋحاني ۇيىمشىلدىق, جاڭاشىلدىققا ۇمتىلۋ جانە ءبىلىم الۋ ارقىلى الەم ەلدەرىمەن الەۋەتىمىزدى تەڭەستىرۋ ەكەنىن جەتكىزدى.
كاسىپوداقتار فەدەراتسياسى «سانانى جاڭعىرتۋ» باعدارلاماسىن ساپالى جۇزەگە اسىرۋدىڭ ماڭىزدىلىعىن ءتۇسىنىپ, وبلىستارداعى كاسىپوداق بولىمشەلەرىندە ءتۇرلى جيىن وتكىزىپ, ءتۇسىندىرۋ توپتارىن قۇرعان. ۇيىمداستىرۋشىلاردىڭ ايتۋىنشا, ءۇش كۇنگە سوزىلاتىن فورۋم اياسىندا پلەنارالىق وتىرىس, سەمينار تۇرىندەگى سەكتسيالىق ترەنينگتەر, «سانانى جاڭعىرتۋ» سىندى جاسامپاز ۇدەرىستەگى كاسىپوداقتاردىڭ رولىنە بايلانىستى وزەكتى ماسەلەلەرگە ارنالعان پىكىرتالاستار وتكىزۋ جوسپارلانعان.
راۋان قايدار,
«ەگەمەن قازاقستان»
