«بيىل كومپانيانىڭ ىرگە قالاعانىنا جيىرما جىل تولدى. بۇگىندە «قازاقستان تەمىر جولى» اق بارلىق كولىكتىڭ ينفراقۇرىلىمى مەن قىزمەت تۇرلەرىن شوعىرلاندىرعان ۇلتتىق كولىك وپەراتورى دەڭگەيىنە كوتەرىلگەن», دەگەن ۆيتسە-پرەزيدەنت سالاداعى جانە جولاۋشىلار تاسىمالىنداعى سەرپىندى جاڭعىرۋلار تۋرالى باياندادى. ونىڭ ايتۋىنشا, «نۇرلى جول» مەملەكەتتىك باعدارلاماسى بىرەگەي تارتىپپەن جانە ەل وڭىرلەرىن ىقپالداستىرۋ ارقىلى جۇزەگە اسۋدا. كومپانيادا جۇردەك جولاۋشىلار پويىزى قوزعالىسىن دامىتۋ باعدارلاماسى جاسالىپ, ىرگەلى ىستەر قولعا الىنۋدا.
«قازىرگى تاڭدا قازاقستاننىڭ بارلىق ءىرى قالالارى وتاندىق وندىرىستەن شىققان «تۇلپار-تالگو» جولاۋشىلار ۆاگوندارىنان جاساقتالعان 15 جۇردەك جولاۋشىلار پويىزى باعدارى جەلىسىمەن قامتىلعان. ول ارقىلى پويىزداردىڭ جول ءجۇرۋ مەرزىمى 1,5-2 ەسەگە دەيىن قىسقاردى. بىلتىردان بەرى «تۇلپار-تالگو» وندىرىسىندە جاڭا دا جايلى, كەڭ قوراپتى ۆاگوندار قۇراستىرىلۋدا. 2022 جىلعا دەيىن 21 جىلجىمالى قۇرامدى الماستىرۋ جوسپاردا بار», دەدى ا.سۇلتانوۆ. ونىڭ سوزىنە قاراعاندا, «تسيفرلى تەمىر جول» جوباسى اياسىندا جولاۋشىلار تاسىمالداۋ قىزمەتىن تسيفرلى جۇيەگە كوشىرۋ بويىنشا اۋقىمدى شارۋالار اتقارىلۋدا.
بۇگىندە ۇلتتىق تاسىمالداۋشى كومپانيا 120 باعدارعا قىزمەت كورسەتىپ, جىلىنا 20 ميلليوننان استام جولاۋشى تاسىمالدايدى. بيىلعى جارتى جىلدا 10 ميلليونداي ادام «قازاقستان تەمىر جولىنىڭ» قىزمەتىنە جۇگىنگەن. بۇل كورسەتكىش وتكەن جىلدىڭ سايكەس مەرزىمىمەن سالىستىرعاندا ەكى پايىزعا جوعارى كورىنەدى. «تۇلپار-تالگو» پويىزدارىمەن 1 ميلليون 200 مىڭ جولاۋشى ءجۇرىپتى. ال بۇل – بىلتىرعى ەسەپتى مەرزىمنىڭ ناتيجەسىنەن 30 پايىزعا كوپ.
شارا بارىسىندا تمد تەمىر جول كولىگى كەڭەسى ديرەكتسياسىنىڭ توراعاسى پ.كۋچەرەنكونىڭ, «جولاۋشىلار تاسىمالى» اق پرەزيدەنتى ن.قيلىبايدىڭ, «رەسەي تەمىر جولى» ااق جولاۋشىلار تاسىمالداۋ جونىندەگى ديرەكتورى د.پەگوۆتىڭ, فەدەرالدىق جولاۋشىلار تاسىمالداۋ كومپانياسىنىڭ باس ديرەكتورى پ.يۆانوۆتىڭ, بەلارۋس تەمىر جولى جولاۋشىلارعا قىزمەت كورسەتۋ باسقارماسىنىڭ باستىعى ا.زاحارەۆيچتىڭ جانە «ليتۆا تەمىر جولدارى» اق ديرەكتورىنىڭ ورىنباسارى ە.لازەۋسكاستىڭ باياندامالارى تىڭدالدى. قاتىسۋشىلار ەلارالىق باعدارداعى جولاۋشىلار تاسىمالىن ءارى قاراي دامىتۋداعى قىزمەت ساپاسى مەن تيىمدىلىگىن جەتىلدىرۋ, ۆاگونداردىڭ جايلىلىعىن جاقسارتۋ, سالاعا جاڭا تەحنولوگيانى ەنگىزۋ, نارىقتى مەملەكەتتىك رەتتەۋ بارىسى توڭىرەگىندەگى ماسەلەلەردى تالقىلادى.
اسحات رايقۇل,
«ەگەمەن قازاقستان»
