پاۆيلون كوميسسارى پاسكال لورونىڭ ايتۋىنشا, قازاقستان مەن فرانتسيا ستراتەگيالىق سەرىكتەستەر بولعاندىقتان, جوعارى دەڭگەيلى شارالاردا ءبىر-بىرىنە قولداۋ كورسەتۋ ناعىز دوستىقتىڭ كورىنىسى.
«حالىقارالىق كورمە قازاقستانمەن ەتەنە تانىسۋعا ۇلكەن مۇمكىندىك سىيلادى. ءسىزدىڭ ەلىڭىزبەن, ازاماتتارىڭىزبەن تانىسقانىما وتە قۋانىشتىمىن. ءبىزدىڭ تەحنولوگيالىرىمىزعا قىزىعۋشىلىق بىلدىرگەن ءار كورەرمەنگە ايتار العىسىم شەكسىز. ءبىز مادەني شارالار ارقىلى مونمارتر قالاسىنىڭ بولشەگىن سىيعا تارتقىمىز كەلدى. مەنىڭ كوميسسار رەتىندەگى نەگىزگى مىندەتىم ەكى ەل اراسىنداعى بايلانىستىڭ ودان ءارى نىعايۋىنا ىقپال ەتۋ. ءوز جۇمىسىمدى ءۇش اي ىشىندە تولىققاندى ورىنداۋعا بار كۇشىمدى جۇمسادىم. ۇيىمداستىرۋشىلار تاراپىنان قازاقستانعا العىسىمدى ءبىلدىرىپ, كورمەنىڭ ءساتتى وتۋىمەن قۇتتىقتاعىم كەلەدى», دەدى كوميسسار لورو.
سونىمەن قاتار, پاۆيلون كوميسسارى بۇل كورمە الەم عالىمدارى مەن كاسىپكەرلەرىنىڭ ءبىر جەردە باس قوسىپ, ەنەرگيا تۋرالى وزەكتى ماسەلەلەردى تالقىلاۋىنا ماڭىزدى الاڭ بولعانىن ەرەكشە اتاپ ءوتتى.
«1889 جىلى پاريجدە وتكەن ەكسپو كورمەسىندە ەيفەل مۇناراسى تانىستىرىلعان بولاتىن. سول كەزدە جۇرتشىلىق بۇل جاڭالىقتى قۇشاق جايا قابىلدادى دەپ ايتا المايمىن. الايدا, ۋاقىت وتە كەلە بۇل مۇنارا فرانتسيانىڭ سيمۆولىنا اينالدى. بولاشاقتا «نۇر الەم» پاۆيلونى دا ەكسپو-2017 كورمەسىنىڭ عانا ەمەس, تۇتاس قازاقستاننىڭ بەتكە ۇستار عيماراتىنا اينالاتىنى نىق سەنەمىن», دەپ لورو مىرزا ءسوزىن ءتامامدادى.
ال فرانتسيا پاۆيلونىنىڭ كوممۋنيكاتسيالار ديرەكتورى مالگاجاتا تۋار كورمەنىڭ وتكىزىلۋ دەڭگەيىنە جوعارى باعا بەرىپ, شارانىڭ جەمىستى اياقتالۋىمەن قۇتتىقتادى.
«ەكسپو سەكىلدى شارانىڭ وتكەنىنە وتە قۋانىشتىمىن. ءۇش اي ىشىندە قىزىقتى شارالار وتكىزىپ, ەلىمىزدى تانىستىردىق. وتكەن اپتادا استانا قالاسىنىڭ «وقۋشىلار سارايىنان» ۇسىنىس كەلىپ ءتۇستى. ولار پاۆيلوندا ورنالاسقان كەيبىر ينستاللياتسيالاردى ءوز عيماراتتارىنا ورنالاستىرعىسى كەلەدى ەكەن. بۇل يننوۆاتسيالارىمىزدىڭ جۇرتقا پايداسىنىڭ ايعاعى. كورمەنىڭ ماقساتى دا سول ەمەس پە, ەلدەر اراسىندا تاجىريبە الماسۋ», دەدى مالگاجاتا تۋار.
فرانتسيا پاۆيلونىن 3 اي ىشىندە 600 مىڭعا جۋىق كەلۋشىلەر تاماشالاعان. سونىمەن قاتار, پاۆيلون Exhibitor Magazine حالىقارالىق جۋرنالىنىڭ «رەداكتسيا تاڭداۋى» ماراپاتىنا يە بولدى.
وسى جەتىستىكتەرمەن شەكتەلمەي, فرانتسيا پاۆيلونى 6 قىركۇيەكتە رەسمي قابىلداۋ ۇيىمداستىرىپ, 2025 جىلعى دۇنيەجۇزىلىك كورمەنى وتكىزۋگە فرانتسيا كانديداتۋراسىن ۇسىندى.
ايگۇل شەرنياز,
«ەگەمەن قازاقستان»
