ايبەك نۇعىماروۆ وزبەكستاندىق مۋحسين حيسوميددينوۆتى ۇپاي سانىمەن ۇتىپ كەتتى. ال ەلامان ەرعاليەۆ ۋكراين بالۋانى انتون رۋدنيكتىڭ جاۋىرىنىن ءبىر مينۋتقا جەتكىزبەي جەر يىسكەتتى. ايتا كەتۋ كەرەك, ەلامان قارسىلاستارىنىڭ ءبارىن مەجەلى ۋاقىتقا جەتكىزبەي تازا جەڭىسپەن ۇتىپ كەلە جاتىر.
تاعى ءبىر شيرەك فينالدىق بەلدەسۋدە موڭعوليا اتىنان سىنعا ءتۇسىپ جاتقان قازاق بالۋانى سەرىك بەردىمۇرات لاتۆيالىق نيكيتا بوندارستى تىزە بۇكتىردى. ەستەرىڭىزگە سالا كەتەيىك, سەرىك بەردىمۇرات 2014 جىلى «ەۋرازيا بارىسى» حالىقارالىق ءتۋرنيرىنىڭ جەڭىمپازى اتانعان بولاتىن.
ءتورتىنشى جەكپە-جەكتە ايبات سەيتەن گرەك ماسمانيديس تەنتورەدەن ۇپاي سانىمەن ۇتىلىپ قالدى. كەزدەسۋدىڭ ورتاسىنا تامان ايبات جاراقات الىپ قالعان ەدى. سول اسەر ەتتى مە, سەيتەننىڭ مەسەلى قايتىپ قالعانداي كورىنگەن. جارتىلاي جەڭىس ۇپايىمەن ۇتىلىپ جاتقان ايبات ايباتىنا ءمىنىپ, ەسەپتى تەڭەستىرىپ كەتتى. ايتسە دە, قويان-قولتىق بەلدەسۋدە گرەكيالىق بالۋان ابجىلدىك تانىتىپ, جارتىلاي فينالعا ءوتتى. سيريالىق بالۋانمەن شەبەرلىك بايقاسقان ەرجان شىنكەەۆ قارسىلاسىن الىپ جىعىپ, شيرەك فينالعا جولداما الدى.
