بيىل 10-شى رەت ۇيىمداستىرىلىپ جاتقان فۋتبول الامانىنا 17 جاسقا دەيىنگى جاسوسپىرىمدەر قۇراماسى باق سىناۋدا. جارىسقا الىس-جاقىن شەتەلدەن كەلگەن سەگىز قۇراما قاتىسىپ, تۋرنير كورىگىن قىزدىرماق. ولار ءتورت-تورتتەن ەكى توپقا بولىنگەن. «ا» توبىندا قازاقستان, تۇرىكمەنستان, البانيا, گرۋزيا قۇرامالارى باق سىناسا, «ۆ» توبىندا قىرعىزستان, تاجىكستان, رەسەي, وزبەكستان جاسوسپىرىمدەرى ءوزارا مىقتىنى انىقتايدى.
فۋتبولدان قازاقستان رەسپۋبليكاسى پرەزيدەنتى كۋبوگىن جىل سايىن ءداستۇرلى تۇردە ۇيىمداستىرعاننىڭ ارقاسىندا بۇل تۋرنير 2011 جىلدان باستاپ, فيفا مەن ۋەفا-نىڭ جاسوسپىرىمدەر فۋتبولىن دامىتۋ كۇنتىزبەسىنە ەنىپ, جاسوسپىرىمدەر قۇرامالارىنىڭ ايقاسىنا اينالدى. سول جىلدان قازاقستان جاستار قۇراماسىنىڭ ناتيجەلەرى جاقسارا باستادى. ايتا كەتسەك, 2011 جىلى جاستار قۇرامامىز ءتورتىنشى ورىن يەلەنسە, كەلەسى جىلى ۇزدىك ۇشتىككە ەنىپ, پرەزيدەنتى كۋبوگىنىڭ قولا جۇلدەگەرى اتاندى. ال 2013 جىلى جاستارىمىز ايدى اسپانعا ءبىر-اق شىعارىپ, ءتۋرنيردىڭ باس جۇلدەسىنە يە بولدى.
بىلتىر شىمكەنت قالاسىندا وتكەن قازاقستان رەسپۋبليكاسى پرەزيدەنتى كۋبوگىندا جاستارىمىز ەكىنشى رەت چەمپيون اتاندى. فينالدىق كەزدەسۋدە قازاقستان قۇراماسى تاجىكستان قۇراماسىن 2:1 ەسەبىمەن جەڭگەن بولاتىن. بيىل رەسەيدە وتكەن گراناتكين ءتۋرنيرىنىڭ ۇزدىك شابۋىلشىسى اتانعان ەركەبۇلان سەيداحمەت ءدال وسى جارىستا مەرگەندىگىمەن كوزگە تۇسكەن ەدى. ءتورت كەزدەسۋدە ءۇش گول سوعىپ, جارىس قورىتىندىسى بويىنشا – ەڭ ۇزدىك شابۋىلشى اتاندى. ال كوماندا كاپيتانى ديماش قاشكەن – ەڭ ۇزدىك ويىنشى مارتەبەسىنە يە بولعان ەدى. بيىلعى تۋرنيردە دە وتانداستارىمىز بىلتىرعى بيىگىنەن تۇسپەيدى دەپ سەنەمىز.
ءالي بيتورە,
«ەگەمەن قازاقستان»
