سالتاناتتى جيىندى قۇتتىقتاۋ سوزبەن اشقان قازاقستاننىڭ ينۆەستيتسيالار جانە دامۋ ۆيتسە-ءمينيسترى تيمۋر توقتاباەۆ بىرىككەن اراب امىرلىكتەرىنىڭ قاتىسۋى ۇلكەن ماڭىزعا يە ەكەنىن جەتكىزدى. ونىڭ ايتۋىنشا, سوڭعى جىلدارى ەكى ەل باسشىلارىنىڭ ەرىك-جىگەرىنىڭ ارقاسىندا ساۋدا-ەكونوميكالىق باعىتتتاعى ءوزارا ىنتىماقتاستىق قارقىندى دامىعان. سونىڭ ءبىر دالەلى– قازاقستان پرەزيدەنتى نۇرسۇلتان نازارباەۆتىڭ بيىلعى قاڭتار ايىندا بىرىككەن اراب امىرلىكتەرىنە جاساعان رەسمي ساپارى.
بۇگىندە ساۋدا سالاسىندا باە اراب تۇبەگىندەگى ەلدەر اراسىندا ءبىرىنشى ورىنعا شىعىپ, بىلتىر تاۋار اينالىمى 3,5 ەسەگە ارتىپ, 380 ملن اقش دوللارىن قۇراپتى. ينۆەستيتسيا سالاسىندا دا تۇراقتى ءوسىم بايقالىپ, سوڭعى 12 جىلدا بىرىككەن اراب امىرلىكتەرىنىڭ ەلىمىزگە سالعان تىكەلەي ينۆەستيتسيالارىنىڭ كولەمى 2 ملرد اقش دوللارىنا جەتكەن. ال قازاقستاننان ءباا ەكونوميكاسىنا قۇيىلعان ينۆەستيتسيالاردىڭ كولەمى شامامەن 1 ملرد دوللاردى قۇرايدى. قازىرگى كۇنى ەلىمىزدە امىرلىك كاپيتالىنىڭ قاتىسۋىمەن 190-نان استام بىرلەسكەن كاسىپورىن جۇمىس ىستەيدى.
سونداي-اق, ۆيتسە-مينيستر «استانا» حالىقارالىق قارجى ورتالىعىن قۇرۋ بارىسىندا دۋبايدىڭ ءدال وسىنداي ورتالىعىن اشۋ تاجىريبەسى ايتارلىقتاي سەپتىگىن تيگىزگەنىن اتاپ ءوتتى. «ەندى «استانا» قارجى ورتالىعى ينۆەستورلارعا جاڭا مۇمكىندىكتەر اشادى, باە ازاماتتارىنىڭ ۆيزاسىز رەجيمى دە بارلىق سالاداعى ىنتىماقتاستىقتى دامىتۋعا ىقپال ەتەرى ءسوزسىز», دەيدى ت.توقتاباەۆ.
ال بىرىككەن اراب امىرلىكتەرى ۇلتتىق مەديا كەڭسەسىنىڭ باس ديرەكتورى مانسۋر ءال-مانسۋري بۇگىنگى ۇلتتىق كۇن – ەكى ەل اراسىنداعى 25 جىل بويى جالعاسىپ كەلە جاتقان ارىپتەستىك پەن ىنتىماقتاستىقتى بىلدىرەتىن ەرەكشە مەرەكە ەكەنىن اتاپ ءوتتى.
–استاناداعى ەكسپو كورمەسى ەنەرگيانىڭ ەكولوگيالىق تازا تۇرلەرىن پايدالانۋ الەم ەكونوميكاسى ءۇشىن اسا ماڭىزدى ەكەنىن تاعى ءبىر دالەلدەدى. جاھاندىق كورمەنىڭ تاقىرىبى بىرىككەن اراب امىرلىكتەرىنىڭ تازا ەنەرگيانى پايدالانۋ ستراتەگياسىنا تولىعىمەن سايكەس كەلەدى, دەيدى ول.
جۇرەكجاردى لەبىزدەردەن كەيىن وسى ەلدىڭ سالت-ءداستۇرىن ايشىقتايتىن اۋەندەر شىرقالىپ, ۇلتتىق بيلەرى كورەرمەن قاۋىمعا ۇسىنىلدى.
جالپى امىرلىكتەر – اراب مەملەكەتتەرى اراسىنان «استانا ەكسپو-2017» كورمەسىنە قاتىساتىنىن رەسمي تۇردە راستاعان العاشقى مەملەكەت. ولاردىڭ ەلوردادا تىككەن پاۆيلونى دا كورمە الاڭىنداعى ەڭ ىرىلەردىڭ ءبىرى. كورمە جۇمىسى باستالعالى پاۆيلونعا 500 مىڭنان استام ادام كەلىپتى. مۇندا بالامالى ەنەرگيا كوزدەرىن وندىرەتىن ەڭ وزىق تەحنولوگيالار قويىلعان. بۇعان قوسا, ءار كەلۋشى 2020 جىلى دۋبايدا وتەتىن ەكسپو كورمەسىنە جانە مارس عالامشارىنا ۆيرتۋالدى تۇردە ساياحات جاساي الادى. «2020 جىلى ءبىز دە وسىنداي ءىرى جاھاندىق شارانى قولعا العالى وتىرمىز. وعان كەمى 25 ملن ادام كەلەدى دەگەن ءۇمىتىمىز بار. 2020 جىلدىڭ 20 قازانىنان 2021 جىلدىڭ 10 ءساۋىرى ارالىعىندا وتەتىن حالىقارالىق كورمەگە دايىندىق قازىردەن باستالىپ كەتتى. ال استانا كورمەسى سول ايتۋلى شاراعا دەگەن تاجىريبەمىزدى شىڭداي ءتۇستى», دەيدى امىرلىك وكىلدەرى.
قىمبات توقتامۇرات,
«ەگەمەن قازاقستان»
