كونفەرەنتسياعا حالىقارالىق جانە جەرگىلىكتى ءدىن كونفەسسيالارىنىڭ وكىلدەرى قاتىستى.
كۇن تارتىبىندە «ورتاق ءۇيىمىزدى» قورعاۋ جانە «جاسىل» ەنەرگيانى دامىتۋعا الەم دىندەرىنىڭ ۇلەس قوسۋى ماسەلەلەرى تالقىلاندى. وسىعان بايلانىستى ءدىن كوشباسشىلارى ورتاق ۇيىمىزگە قاتىستى ەڭ كۇردەلى ماسەلەلەردى شەشۋ ءۇشىن كوپۆەكتورلى باسقارۋ قۇرۋ بويىنشا حالىقارالىق جانە ايماقتىق اتسالىسۋدىڭ ماڭىزدىلىعىن اتاپ ءوتتى.
قر ءدىن ىستەرى جانە ازاماتتىق قوعام بويىنشا ءمينيسترى قاتىسۋشىلاردى قارسى الىپ, العاش بولىپ ءسوز سويلەدى. ءوز سوزىندە ول ەكى ەل باسشىلارىنىڭ – نۇرسۇلتان نازارباەۆ پەن پاپا ريمسكي فرانتسيسكونىڭ اراسىنداعى ورناعان جاقىن ءارى سەنىمدى قارىم-قاتىناستىڭ ماڭىزدىلىعىن اتاپ ءوتتى.
– بۇگىندە ۆاتيكان اپوستولدىق نۋنتسياتۋرا اتىنان ەلدە بەيبىتشىلىك پەن ۇلىستار اراسىندا كەلىسىم ورناتۋدا قازاقستاننىڭ ماڭىزدى سەرىكتەسى بولىپ تابىلادى. ءبىزدىڭ حالقىمىزدىڭ مادەنيەت پەن رۋحاني ءومىرىنىڭ دامۋىندا ءوز ءرولى بار. بيىل ءبىز قازاقستان مەن ۆاتيكان اراسىندا ديپلوماتيالىق قاتىناستىڭ 25 جىل ورناعانىن اتاپ وتەمىز. ءبىز بۇل ماڭىزدى حالىقارالىق فورۋمدا ءدىن وكىلدەرىنىڭ تاجىريبەنى جالعاستىرا وتىرىپ, بەلسەندى قاتىساتىندارىنا, جوعارى دارەجەدە وتەتىنىنە سەنىم بىلدىرەمىز, - دەدى مينيستر ن.ەرمەكباەۆ.
ءوز كەزەگىندە كاردينال پيتەر كودۆو اپپياح تاركسون فورۋمنىڭ وتۋىنە قولداۋ تانىتقانى ءۇشىن العىسىن ءبىلدىرىپ, بارلىق ادامدار جانۇياسى قىزمەتىندە قاجەتتى «بولاشاقتىڭ ەنەرگياسى» جۇيەسىنىڭ ماڭىزدىلىعىن تىلگە تيەك ەتتى.
فورۋم سوڭىندا قاتىسۋشىلار شارانى وتكىزۋ قازاقستان مەن قاتىسقان ۇلىستار وكىلدەرى اراسىنداعى قارىم-قاتىناس تاريحىن نىعايتۋعا ايتارلىقتاي ۇلەس قوسادى دەگەن پىكىر ءبىلدىردى.
