قازاقستان تەاترلارى قاۋىمداستىعىنىڭ ۆيتسە-پرەزيدەنتى اسحات ماەميروۆ قازاقستاندا جاس رەجيسسۋرا وكىلدەرى وتە از دەگەن سىڭارجاق پىكىردىڭ بار ەكەنىن باسا ايتتى. وسىنداي پىكىرگە نۇكتە قويىپ, تالانتتى جاس رەجيسسەرلەردىڭ شىعارماشىلىعىنا قوعام مەن قالىڭ كوپشىلىكتىڭ نازارىن اۋدارۋ ماقساتىندا جاس رەجيسسەرلەردىڭ تۇڭعىش فورۋم-فەستيۆالىن ۇيىمداستىرىپ وتىرعاندارىن جەتكىزدى. تۇڭعىش فەستيۆالگە قازاقتىڭ جاڭاشىل تەاتر رەجيسسەرى قايرات سۇگىربەكوۆتىڭ ەسىمىنىڭ بەرىلۋى دە تەگىن ەمەس.
«قايرات سۇگىربەكوۆتىڭ فەنومەندىگى سول, ءوزىنىڭ اۆتورلىق ەستەتيكالىق تەاترىنىڭ مودەلىن جاساعان بىردەن ءبىر سۋرەتكەر. قازاقتىڭ تەاترلىق رەجيسسۋراسىنا اۆانگاردتىق باعىتتى اكەلدى, جاڭاشىل, يننوۆاتسيالىق باعىتتا جۇمىس ىستەدى. قازاق دراماتۋرگياسىنىڭ نەگىزىن سالعان ج.ايماۋىتوۆ, م.اۋەزوۆ, م.جۇماباەۆتاردىڭ شىعارمالارىن سويلەسۋدىڭ رەجيسسەرلىك ەرەكشە جولىن كورسەتتى. ع.مۇسىرەپوۆتىڭ «قوزى كورپەش - بايان سۇلۋ» شىعارماسىن «ماحاببات داستانى» دەپ اتاپ, قازاقتىڭ تاريحىن تەرەڭىنەن الىپ, تۇركىتىلدەس مەملەكەتتەرگە ابدەن تانىس اسسوتسياتسيالىق, مەتافورالىق تەڭەۋلەرمەن ساحنالادى. ءسويتىپ, ساحناعا ءسيمۆوليزمدى اكەلدى. ءبىر جاعىنان ەرتە كەتكەن ق.سۇگىربەكوۆتىڭ ەسىمىن ماڭگى ەستە ساقتاۋ جانە سۇگىربەكوۆ باستاعان سۇرلەۋ جولدى جالعاستىراتىن جاس رەجيسسەرلاردى كورسەتۋدى ماقسات تۇتىپ وتىرمىز», - دەدى اسحات ماەميروۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ىرىكتەۋ كەزەڭىندە جيىرمادان استام جۇمىس قابىلدانعان. ولاردىڭ اراسىنان ەلىك نۇرسۇلتان, داۋرەن سەرعازين, دينا قۇنانبايقىزى, رۇستەم جانىامانوۆ, بولات ابدراحمانوۆ, فارحاد مولداعاليەۆ, جۇلدىزبەك جۇمانباي, گۇلناز قامىسباەۆا, مەيرام حابيبۋللين, ايدىن سالبانوۆ سىندى 13 جاس رەجيسسەر تاڭداپ الىنعان. ولار فورۋم بارىسىندا ءتۇرلى پىكىرتالاستار, لەكتسيالار, شەبەرلىك-سىنىپتارى مەن سەمينارلارعا قاتىسادى.
بايقاۋدا ءاليا بوپەجانوۆا, دۋلىعا اقمولدا, گۇلسىم ەرعاليەۆا, ميراس ءابىل قازىلىق ەتەدى. ۇزدىك جۇمىستارعا باس جۇلدە, 1,2,3 ورىندار, كورەرمەندەر كوزايىمى جانە ومىردەن ەرتە وزعان تاعى ءبىر رەجيسسەر رۇستەم ەسداۋلەتوۆ اتىنداعى ارنايى سىيلىق بەرىلەدى.
2 قىركۇيەك كۇنى بەيبىتشىلىك جانە كەلىسىم سارايىندا ءى جاس رەجيسسەرلەر فورۋم-فەستيۆالىنىڭ اشىلۋ سالتاناتى وتەدى. وندا م.اۋەزوۆ اتىنداعى اكادەميا تەاترى «ماحاببات داستانى» قويىلىمىن كورسەتەدى.
اشىلۋدان بولەك, فورۋم-فەستيۆال اياسىندا استانا قوناقتارى مەن تۇرعىندارى التى كۇن بويى م. اۋەزوۆ اتىنداعى قازاق مەملەكەتتىك اكادەميالىق دراما تەاترى, ع.مۇسىرەپوۆ اتىنداعى بالالار مەن جاسوسپىرىمدەر تەاترى, رەسپۋبليكالىق اكادەميالىق نەمىس دراما تەاترى, استانا جاستار تەاترى, اقتوبە وبلىستىق الاقاي تەاترى, س.مۇقانوۆ اتىنداعى سولتۇستىك قازاقستان وبلىستىق قازاق دراما تەاترى , شىعىس قازاقستان وبلىستىق جاستار تەاترى, ج.شانين اتىنداعى وبلىستىق اكادەميالىق قازاق دراما تەاترى, الماتى قالاسى مەملەكەتتىك قۋىرشاق تەاترى, اتىراۋ وبلىستىق ماحامبەت وتەمىس ۇلى اتىنداعى قازاق دراما تەاترلارىنىڭ قويىلىمدارىن تاماشالاي الادى.
