بۇل تۋرالى العاش قر ءىىم تجك-نىڭ رەسمي وكىلى رۋسلان يمانقۇلوۆ ءمالىم ەتتى. وقىس وقيعادان كوز جۇمعان ءۇش كەنشىنىڭ ولىمىنە بايلانىستى ەڭبەكتى قورعاۋ قاعيدالارىن بۇزىلۋ فاكتىسى بويىنشا قىلمىستىق ءىس تىركەلدى. «قر قك 156-بابى 4-تارماعى «ەڭبەكتi قورعاۋ قاعيدالارىن بۇزۋ» بويىنشا ءۇش ادامنىڭ قازا تابۋ فاكتىسى سوتقا دەيىنگى تەرگەۋدىڭ بىرىڭعاي تىزىلىمىنە تىركەلدى», - دەپ حابارلادى قاراعاندى وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى باقىتجان قۇدياروۆ. ونىڭ ايتۋىنشا, قىلمىستىق ءىس توپتىق قايعىلى جاعداي فاكتىسى بويىنشا عانا تەرگەلۋدە. ء«ىس قانداي دا ءبىر تۇلعاعا قاتىستى ەمەس, فاكتى بويىنشا تەرگەلۋدە», - دەدى ءباسپاسوز قىزمەتىنىڭ جەتەكشىسى. قايعىلى وقيعا 31 تامىز كۇنى 4 ساعات 21 مينۋتتا 332 د6-ز № 1 جەلدەتكىش تۇيىسىمىندە ورىن العان. اپات كەزىندە شاحتادا تۇنگى اۋىسىمداعى 136 ادام بولعان.
ءۇش كەنشىنىڭ قازاسىن تەرگەۋ ماقساتىندا قۇرىلعان مەملەكەتتىك كوميسسيانىڭ قۇرامىنا ءۇش قۇرىلىم كىرگىزىلدى. مەتان گازىنىڭ كەنەت تارالۋىنىڭ سەبەبىن انىقتاۋ جانە جۇمىس ءجۇرىپ جاتقان قىرتىستاردا گاز بولۋى مۇمكىن ەكەندىگى تۋرالى بولجامنىڭ جاسالماۋىنا جاۋاپتى لاۋازىمدى تۇلعالاردى ايقىنداۋ جۇمىستارىن ينۆەستيتسيالار جانە دامۋ مينيسترلىگىنىڭ يندۋستريالدىق دامۋ جانە ونەركاسىپتىك قاۋىپسىزدىك كوميتەتىنىڭ, سونداي-اق ەڭبەكتى قورعاۋ باسقارماسىنىڭ قىزمەتكەرلەرى, ءوندىرىس جانە يندۋستريالدى-يننوۆاتسيالىق دامۋ باسقارماسىنىڭ ماماندارى جۇرگىزەدى. مەملەكەتتىك كوميسسيانىڭ تەرگەۋ ناتيجەلەرى ونىڭ قىزمەتى اياقتالعاننان كەيىن انىق بولادى. زاڭدىلىققا سايكەس, كوميسسيا كەنەتتەن مەتان گازىنىڭ تارالۋىنىڭ ءمان-جايىن 10 كۇن بويى تەكسەرەدى. قازا تاپقان مارقۇم رۋستام احمەتجانوۆ, ۆالەري رۋدەنكو, ماكسيم شەبانوۆتىڭ ەكى-ۇشتەن بالالارى جەتىم قالدى.
«گاز شاحتانىڭ باتىس جەلدەتكىش ۇڭعىسىندا 614 مەتر تەرەڭدىكتە تارالعانى انىقتالدى. اسكەريلەندىرىلگەن اپاتتىق قۇتقارۋ قىزمەتىنىڭ 49 قىزمەتكەرى مەن 9 تەحنيكا اپاتتى جويۋ جۇمىستارىن جۇرگىزۋگە تارتىلدى. كومپانيا باسشىلىعى مەن قىزمەتكەرلەرى قازا بولعانداردىڭ وتباسى مەن تۋىستارىنا قايعىسىنا ورتاقتاسا كوڭىل ايتادى. قازا تاپقانداردىڭ وتباسىنا تولىق كولەمدە كومەك كورسەتىلەدى. جەرلەۋ ءراسىمىنىڭ بارلىق شىعىندارىن كومپانيا ءوز موينىنا الادى», - دەيدى كومپانيانىڭ ءباسپاسوز قىزمەتى.
ميراس اسان,
«ەگەمەن قازاقستان»
قاراعاندى وبلىسى
