ارنايى مۋزىكالىق قۇرىلعىلارمەن جاساقتالعان قوعامدىق كولىك استانا قالاسىنىڭ كورىكتى جەرلەرى مەن ساياباقتارىنا ايالداپ, ونەرپازدار وڭتۇستىكتەن شىققان جەرگىلىكتى سازگەرلەردىڭ تانىمال اندەرىنەن شاشۋ شاشتى.
«وڭتۇستىك- ونەردىڭ التىن ورداسى. سوندىقتان بۇگىنگى ءان شەرۋىمىزدى قالا قوناقتارى مەن تۇرعىندارىنا ارنايى تارتۋ رەتىندە ۇسىنىپ وتىرمىز. «وڭتۇستىكتىڭ 7 كەرەمەتى» اياسىندا ۇيىمداستىرىلعان شارانىڭ ماقساتى – قازاق ونەرىن ناسيحاتتاپ, ەلباسىمىزدىڭ «بولاشاققا باعدار: «رۋحاني جاڭعىرۋ» ماقالاسىنداعى «تۋعان جەر» باعدارلاماسىنا قولداۋ ءبىلدىرۋ», - دەيدى وبلىستىق مادەنيەت باسقارماسىنىڭ باسشىسى نۇربولات احمەتجانوۆ.
مەركەلىك ونەر دۋمانىنىڭ شەرۋشىلەرى «دۋمان» ويىن-ساۋىق ورتالىعىنان باستاپ, «ماڭگىلىك ەل» قاقپاسى جانە «حان شاتىر», «Mega Silk Way» ويىن-ساۋىق ورتالىقتارى, قر ۇلتتىق مۋزەيى جانە «بايتەرەك» الاڭىنا دەيىن ءجۇرىپ ءوتتى. استانالىق تۇرعىندارعا وڭتۇسىكتىڭ ءان سالەمىن جولداۋعا ش.قالداياقوۆ اتىنداعى وبلىستىق فيلارمونيا, وبلىستىق وپەرا جانە بالەت تەاترىنىڭ بەلگىلى انشىلەرىنەن قۇرالعان 30-دان اسا ونەرپاز قاتىستى.
ايتا كەتەيىك, 29-31 تامىز ارالىعىندا «بەيبىتشىلىك جانە كەلىسىم» سارايىندا «وڭتۇستىكتىڭ ونىمدەرى» تاۋار وندىرۋشىلەردىڭ كورمەسى مەن «جەر كىندىگى - قازىعۇرت» اتتى كوركەمونەر كورمەسى كوپشىلىك نازارىنا ۇسىنىلعالى وتىر. سونداي-اق, «تۇركى ەلىنىڭ ءتۇپ تامىرى – وڭتۇستىكتەن مەرەيلى استاناعا سالەم!» ونەر كەرۋەنى, «سالەم استانا!, سالەم, ەكسپو!», «وڭتۇستىك ازىلدەرى» شوۋ-كونتسەرتتەرى ۇيىمداستىرىلادى.
