كاپسۋلا تەستتىك ۆاكۋمدى قۇبىرمەن قوزعالۋ ارقىلى رەكوردتىق جىلدامدىققا جەتتى. بۇل كاپسۋلانى ميۋنحەن تەحنيكالىق ۋنيۆەرسيتەتىنىڭ (گەرمانيا) ستۋدەنتتەرى جاساپ شىعاردى. 30 ستۋدەنتتەن تۇراتىن توپتىڭ اتى WARR Hyperloop.
ۋنيۆەرسيتەت سايتىنداعى مالىمەت بويىنشا, سالماعى 80 كيلوگرامم قۇرىلعى, 50 كيلوۆاتت قۋاتى بار ەلەكتر قوزعالتقىشى ارقىلى 324 كم/ساع جىلدامدىققا جەتكەن. كوماندا سوڭعى جارتى جىل بويى WARR (Workgroup for Rocketry and Space Flight) پروتوتيپىمەن اينالاسىپ كەلەدى. وسى جوبامەن جاس ونەرتاپقىشتار قاڭتاردا وتكەن Hyperloop pod competition سايىسىنىڭ جەڭىمپازدارى اتانعان ەكەن.
SpaceX باستاماسىمەن وتكىزىلگەن جارىس كاليفورنيالىق حوتورن قالاسىندا ءوتتى. بۇعان دەيىنگى رەكوردقا ونەرتاپقىشتار 2017 جىلدىڭ 2 تامىزىندا جەتكەن بولاتىن. نەۆادا شتاتىندا ورنالاسقان DevLoop تراسساسىندا كاپسۋلا 310 كم/ساع جىلدامدىققا دەيىن جەتتى.
ايگۇل شەرنياز,
«ەگەمەن قازاقستان»
