بەلگىلى جازۋشى الىبەك اسقاروۆ ۇيىمداستىرعان, ەلىمىزگە تانىمال قالامگەرلەر, عالىمدار مەن باسپاگەرلەر قاتىسقان جيىندا «مادەنيەت تۋرالى» قازاقستان رەسپۋبليكاسى زاڭىنا جاقىندا ەنگىزىلگەن وزگەرىستەرگە سايكەس, قوعامدىق ماڭىزى بار ادەبيەتتى ساتىپ الۋ, باسىپ شىعارۋ جانە تاراتۋ قاعيدالارى جان-جاقتى تالقىلانىپ, انىقتامالار مەن تۇسىنىكتەمەلەر بەرىلدى.
استانادان ارنايى كەلگەن مادەنيەت جانە سپورت مينيسترلىگىنىڭ باسپا ءىسى باسقارماسىنىڭ باسشىسى نۇراسىل توعىزباەۆ اتالمىش قاعيدالارعا قاتىستى اۆتورلاردان بۇرىن جارىق كورمەگەن شىعارمالارىن ساتىپ الۋدى انىقتاۋ ماقساتىندا 15 ادامنان تۇراتىن ساراپتاما كوميسسياسى قۇرىلعانىن, سول كوميسسيانىڭ عالىمدار مەن جازۋشىلار, جۋرناليستەر مەن ساياساتكەرلەر, وزگە دە قالامگەرلەر ۇسىنعان شىعارمالاردىڭ ارقايسىسىنا جەكە-جەكە ساراپتاما جۇرگىزىپ, قورىتىندى شىعارىپ وتىراتىنىن جەتكىزدى. ول ساراپتاما قورىتىندىلارى ساتىپ الىناتىن شىعارمالاردىڭ ءتىزىمىن بەكىتەتىن قازاقستان رەسپۋبليكاسى ۇكىمەتى جانىنداعى «قوعامدىق ماڭىزى بار ادەبيەتتى ساتىپ الۋ ماسەلەلەرى جونىندەگى ۆەدومستۆوارالىق كوميسسيانىڭ» قاراۋىنا ۇسىنىلماق ەكەن. «وسى باعدارلاما بويىنشا شىعاتىن كىتاپتار ەندى بۇرىنعىداي ەكى مىڭ ەمەس, بەس مىڭ تارالىممەن شىعىپ, ەلىمىزدىڭ الىس تۇكپىرىندەگى اۋىل كىتاپحانالارىنا دەيىن تارالاتىن بولادى. تاعى ءبىر ەسكەرەر جايت, بۇرىن تارالىمى 500 دانادان اسپاعان شىعارمالار دا جاڭا شىعارما رەتىندە وسى باعدارلاما اياسىندا جارىق كورۋى مۇمكىن», – دەدى نۇراسىل توعىزباەۆ.
قالامگەرلەردى تولعاندىراتىن باستى ءتۇيىننىڭ ءبىرى – قالاماقى ماسەلەسى بولسا, ەندى ونى شەشۋ ءىسى دە دۇرىس جولعا قويىلاتىن بولىپتى. ەكى بىردەي كوميسسيا سۇزگىسىنەن ءوتىپ, ۇزدىك دەپ تانىلعان شىعارمانىڭ ءبىر اۆتورلىق باسپا تاباعىنا (40 مىڭ بەلگىگە) 150 مىڭ تەڭگە كولەمىندە قالاماقى تولەنبەك.
اۆتورلاردىڭ الەۋمەتتىك جاعدايىن شەشۋ ءۇشىن جاسالىپ جاتقان قادامداردىڭ ءبىرى بولىپ سانالاتىن باعدارلامانى جۇزەگە اسىرۋ بارىسىندا كىتاپ شىعارۋ, تاراتۋ جۇمىستارى ءۇشىن باسپالار اراسىندا اشىق بايقاۋ وتكىزىلىپ, لايىقتى باسپا تاڭدالىپ الىنباق ەكەن.
ءسۇلتانالى بالعاباەۆ, مارال ىسقاقباي, تۇرىسبەك ساۋكەتاەۆ, يسرايل ساپارباي سىندى بىرقاتار ادەبيەت جاناشىرلارى ادەبيەتتەگى ۇرپاق ساباقتاستىعى ءۇشىن جاسالىپ جاتقان بۇل قادامعا رازىلىقتارىن جەتكىزە وتىرىپ, تەك جىلدا جاڭا شىعارما شىعارۋ باستاماسى ناۋقانعا ۇلاسىپ كەتپەسە ەكەن دەپ تىلەك ءبىلدىرىستى.
ايتا كەتسەك, بۇگىنگىنىڭ جازۋشىسىنا جازۋشى ەكەنىن ۇمىتتىرماي, اسىرەسە جاس قالامگەرلەردىڭ العا ۇمتىلۋعا دەگەن ىنتاسىن وياتاتىن بۇل باعدارلامادا جاس ەرەكشەلىگىنە شەكتەۋ قويىلماعان, سونداي-اق, كەز كەلگەن ادام ءوز تۋىندىسىن ۇسىنا الماق. ول ءۇشىن اعىمداعى جىلدىڭ 15 تامىزىنان 15 قىركۇيەگىنە دەيىن ۋاكىلەتتى ورگانعا ىرىكتەۋگە قاتىسۋ تۋرالى ءوتىنىمى مەن قۇجاتتارىن جولداسا جەتكىلىكتى.
قازىرگى ۋاقىتتا جارىق كورىپ جاتقان جاڭا شىعارمالار جوقتىڭ قاسى دەسەك تە, اتالمىش باعدارلاما – ءدال وسى ولقىلىقتىڭ ورنىن تولتىرىپ, ءتۇرلى قولبايلاۋمەن جارىق كورمەي جاتقان نەمەسە ءالى سياسى كەۋىپ ۇلگەرمەگەن, ءدال بۇگىنگى كۇن تالابى مەن ۇدەسىنەن شىعا بىلگەن شىعارمالاردىڭ كوپتەپ جارىق كورۋىنە كورسەتىلىپ وتىرعان زور قولداۋ ەكەنى انىق.
ميرا بايبەك,
«ەگەمەن قازاقستان»
الماتى
