58,49 ملرد تەڭگە جۇمسالىپ, جۇمىسى مارەسىنە جەتكەن 19 جوبا حالىق يگىلىگىنە قىزمەت ەتۋدە. قازىرگى تاڭدا قۇرىق پورتىندا سالىنىپ جاتقان پاروم كەشەنىن ماگيسترالدى تەمىر جولمەن جالعاستىراتىن «بورجاقتى – ەرساي» تەمىر جول جەلىسى, قۇرىق پورتىنداعى ءبىرىنشى ىسكە قوسۋ كەشەنى جانە اقتاۋ تەڭىز پورتىن سولتۇستىك باعىتتا كەڭەيتۋ جوباسىنىڭ اياسىندا جاڭا استىق تەرمينالى پايدالانۋعا بەرىلدى. باعدارلاما اياسىندا اقتاۋ قالاسىنداعى جاڭا تۇرعىن ءۇي قۇرىلىستارىن ينجەنەرلىك-كوممۋنيكاتسيالىق ينفراقۇرىلىممەن جانە اباتتاندىرۋمەن قامتاماسىز ەتۋ جۇمىسى جۇرگىزىلىپ, اقتاۋدى كورىكتەندىرە ءتۇسۋ باعىتىنداعى جۇمىستارعا سەرپىن بەردى. سونداي-اق, باعدارلاما نەگىزىندە وبلىس ورتالىعىندا 747 پاتەر پايدالانۋعا بەرىلسە, قالانىڭ جىلۋمەن جابدىقتاۋ جەلىسىنە, قۇبىر جەلىسىنە قايتا قۇرىلىمداۋ جۇرگىزىلىپ, قازاندىق ورناتىلدى. قازاندىق ءوز كەزەگىندە مۇنايلى اۋدانىنىڭ ماڭعىستاۋ اۋىلىندا 50 ءۇيدى جىلۋمەن قامتاماسىز ەتۋگە مۇمكىندىك بەردى.
ماڭعىستاۋدا وزەكتىلىگى مەن وتكىرلىگىن جىلدار بويى جويا الماي كەلە جاتقان اۋىز سۋ ماسەلەسىن جەڭىلدەتۋدە دە «نۇرلى جول» باعدارلاماسىنىڭ ماڭىزى زور – تاۋلىگىنە 20 مىڭ تەكشە مەتر سۋ وندىرەتىن اقتاۋ قالاسىنداعى «كاسپي» سۋ تۇششىتۋ زاۋىتى جۇرگىزىلگەن جاڭعىرتۋ جۇمىستارىنىڭ ءبىرىنشى كەزەڭىنەن سوڭ ونىمدىلىكتى تاۋلىگىنە 30 مىڭ تەكشە مەترگە دەيىن جەتكىزبەك. ينفراقۇرىلىم سالاسىنداعى جاڭالىقتاردى تەك اقتاۋ قالاسى عانا ەمەس, اۋداندار مەن الىس اۋىلدار دا بولىسۋدە. مىسالى, قاراقيا اۋدانىنىڭ بوستان اۋىلىندا ەلەكترمەن جابدىقتاۋ جەلىسى مەن گاز قۇبىرى تارتىلسا, قۇرىق اۋىلىندا جاڭادان سالىنعان تۇرعىن ۇيلەر ءۇشىن ەلەكترمەن جابدىقتاۋ جەلىلەرى, ال تۇپقاراعان اۋدانىنىڭ سايىن اۋىلىنداعى جاڭادان بولىنگەن ۋچاسكەلەردە ەلەكترمەن جانە گازبەن جابدىقتاۋ ىستەرى جاسالدى.
الەۋمەتتىك سالادا دا از ىستەر اتقارىلعان جوق. ءۇش اۋىسىممەن وقىتۋ ماسەلەسىن شەشۋ جولىندا بەينەۋ اۋىلىندا 900 ورىندىق جاڭا مەكتەپ سالىنسا, قاراقيا اۋدانىنىڭ جەتىباي اۋىلىندا جانە جاڭاوزەن قالاسىندا ارقايسىسى 280 ورىندىق ەكى بالاباقشا سالىندى. بۇل ارقىلى 2016 جىلى وبلىستاعى 3-تەن 6 جاسقا دەيىنگى بالالاردى مەكتەپكە دەيىنگى ءبىلىم بەرۋمەن قامتۋدى 84,5 پايىزعا دەيىن ارتتىرۋعا قول جەتكىزىلدى.
2017 جىلعا دا مەجەلەنگەن جوبالار از ەمەس. بيىل قۇنى 256,2 ملرد تەڭگەنى قۇرايتىن 15 جوبا ىسكە اسىرىلۋدا. «شەتپە – بەينەۋ» جانە «شەتپە – جەتىباي – اقتاۋ» اۆتوكولىك جولدارىن جوندەۋ جانە بىرقاتار جاڭا تۇرعىن ۇيلەرگە ينجەنەرلىك-كوممۋنيكاتسيالىق ينفراقۇرىلىم سالۋ جوبالارى اياقتالىپ, قۇرىق پاروم كەشەنىنىڭ ەكىنشى كەزەڭىنىڭ قۇرىلىسى, سونداي-اق, «جەتىباي – جاڭاوزەن», «بەينەۋ – اقجىگىت – وزبەكستان رەسپۋبليكاسى (نوكىس)» ۋچاسكەلەرىندەگى جولداردى جوندەۋ جانە باۋتين اۋىلىنداعى تۇرعىن ۇيلەرگە سۋ قۇبىرىن تارتۋ جۇمىستارى باستالماق. ال, الەۋمەتتىك سالا بويىنشا مەكتەپتەردە ءۇش اۋىسىممەن وقىتۋعا جول بەرمەۋ ماقساتىندا بارلىعى 3 مىڭ وقۋشى ورنى بولاتىن 4 جاڭا مەكتەپتىڭ – جاڭاوزەن قالاسىنىڭ راۋان شاعىن اۋدانى جانە راحات اۋىلىنداعى ارقايسىسى 900 ورىندىق, مۇنايلى اۋدانىنىڭ باسقۇدىق جانە قىزىلتوبە اۋىلدىق وكرۋگتەرىندەگى ارقايسىسى 600 ورىندىق مەكتەپتەردىڭ قۇرىلىستارى قاراستىرىلعان.
ماڭعىستاۋ وبلىسىنا ۇلتتىق قوردان بارلىعى 61,6 ملرد تەڭگە قارالعان بولسا, ونىڭ ىشىندە 2017 جىلعا 9,4 ملرد تەڭگە كوزدەستىرىلگەن. قازىرگى تاڭدا, ياعني جىل باسىنان بەرگى التى ايدا 2017 جىلعا بولىنگەن قاراجاتتىڭ يگەرىلۋى 50,0 ملن تەڭگەنى قۇراعان.
مۇنايلى ءوڭىردى شىرايلى ولكەگە اينالدىرۋ ءۇشىن جاسالار جۇمىس كوپ دەسەك, «نۇرلى جول» باعدارلاماسى وسى ماقساتقا باستايتىن باسپالداق قىزمەتىن اتقارىپ كەلەدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
