ءبىر اپتاعا سوزىلعان الامان سايىسقا 11 ەلدىڭ 150-دەن استام كوكپارشىلارى باق سىناسىپ, الاڭدا ايانباي ايقاستى. جارىستىڭ العاشقى كۇنى بەس كەزدەسۋ ءوتىپ: تاجىكستان, تۇركيا, قازاقستان, قىتاي, قىرعىزستان كوماندالارى قارسىلاستارىن تىزە بۇكتىرسە, جارىستىڭ ەكىنشى كۇنى – 22 تامىزدا: موڭعوليا – اقش (10:4), تاجىكستان – تۇركيا (12:2), قىرعىزستان – وزبەكستان (11:2), اۋعانستان – ماجارستان (12:2), قىتاي – رەسەي (5:0) ەسەبىمەن جارىستى قورىتىندىلادى.
جارىستىڭ ءۇشىنشى كۇنى – 23 تامىزدا, موڭعوليا مەن وزبەكستان, تۇركيا مەن قىرعىزستان, قازاقستان مەن رەسەي, اقش پەن تاجىكستان جانە ماجارستان مەن قىتاي كوماندالارى اراسىندا ءوزارا كەزدەسۋ ءوتتى. قورىتىندى ەسەپ تومەندەگىدەي: موڭعوليا – وزبەكستان (8:4), قىرعىزستان – تۇركيا (13:3), قازاقستان – رەسەي (15:3), تاجىكستان – اقش (9:2), قىتاي – ماجارستان (8:2).
ال جارىستىڭ ءتورتىنشى كۇنى – 24 تامىزدا وتكەن بەس ويىننىڭ العاشقىسى تۇركيا مەن موڭعوليا كوماندالارى اراسىندا ءوتىپ, تارتىسقا تولى بۇل باسەكە كورەرمەندى ءبىر سەرپىلتىپ تاستادى. الپاسلان جەيلان باستاپ كەلگەن انادولى ازاماتتارىنىڭ تۇراعى تۇركيا دەمەسەڭىز دەنى ەتيكالىق قىرعىزدار. ولار موڭعوليانىڭ اتىنان كەلگەن باي-ولكەلىك باۋىرلارمەن جان بەرىپ, جان الىستى. ناتيجەسىندە روم اۋەسحان باستاپ كەلگەن باي-ولكە كوكپارشىلارى ايبارىس بولات, دوسان ەسجان, قۋانتاي قايىرجاندار قوس-قوستان سالىم الىپ (10:7) جەڭىسكە جەتتى. كەلەسى ويىنداردىڭ ەسەبى: وزبەكستان – اقش (11:1), قىرعىزستان – تاجىكستان (15:2), اۋعانستان – رەسەي (5:1), قازاقستان – قىتاي (14:5).
سايىستىڭ بەسىنشى كۇنى – 25 تامىزدا چەمپيوناتتىڭ ىرىكتەۋ ويىندارى باستالدى. «ب» توبىنان قازاقستان, «ا» توبىنان قىرعىزستان كوماندالارى ۇزدىك شىعىپ, باس جۇلدە ءۇشىن سايىسۋعا مۇمكىندىك السا, «ب» توبىنان جارتىلاي فينالدىق سايىس ءۇشىن موڭعوليا مەن تاجىكستان كوماندالارى ايقاسىپ, ناتيجەسىندە 10: 9 ەسەبىمەن تاجىك جىگىتتەرى باسىم ءتۇستى. ەكىنشى توپتان اۋعانستان مەن قىتاي كوماندالارى ءوزارا جەڭىمپازدى انىقتادى. مۇندا 4:2 ەسەبىمەن ەرمەك توقتاربەك باستاپ كەلگەن قىتايلىق قانداستارمىز جەڭىسكە جەتتى. ءسويتىپ, جارتىلاي فينال, ياعني قولا جۇلدە ءۇشىن تارتىس قىتاي مەن تاجىكستان كوماندالارى اراسىندا وتەتىن بولدى.
كەشە ساعات 16.00-دە قولا جۇلدە ءۇشىن تارتىس جوعارىداعى ەكى كوماندا اراسىندا باستالدى. ويىننىڭ العاشقى كەزەڭىندە قىتايلىق قانداسىمىز مۇحيت قۋانىش ۇلى ەسەپ اشقانىمەن, ەكىنشى تايمدا ويىن تىزگىنىن قولعا العان تاجىك كوكپارشىلارى حودجياكبار دوستيەۆ پەن رۋزيكۋل كاراەۆتار ءبىر-ءبىر سالىممەن ەسە قايتارىپ, تاجىك جىگىتتەرى جەڭىسكە جەتتى. ولار 3-ورىنعا تابان تىرەپ, جۇلدە قورىنا تىگىلگەن 3 ملن تەڭگەگە يەلىك ەتتى.
ال كەزەكتى چەمپيوناتتىڭ باس جۇلدەسىن ساراپقا سالعان قازاقستان مەن قىرعىزستان كوكپارشىلارى عاسىردا ءبىر بولاتىنداي سايىس ونەرىن كورسەتتى. ويىننىڭ العاشقى سالىمى قازاقستاندىق شاباندوز تەمىرحان ايتباەۆتىڭ ەنشىسىنە بۇيىرسا, كوپ كەشىكپەي كانىگى قىران باقتىباي شىرىنقۇلوۆ ەسەپتى 2:0-گە جەتكىزدى. ءبىرىنشى كەزەڭنىڭ 12-ءشى مينۋتىندا ابىلاي نىشانبەك سالىمدى ەسەلەپ, قوناقتاردىڭ تاۋ قۇلاتار ەكپىنىن سايابىرسىتتى. دەسە دە قىرعىز كوكپارشىلارى قاراپ قالعان جوق, ويىننىڭ بىتۋىنە 2 مينۋت قالعاندا رۋستام تىناليەۆ سالىم الىپ, ءبىرىنشى كەزەڭ 3:1 ەسەبىمەن اياقتالدى.
سايىستىڭ ەكىنشى كەزەڭى قازاقستاندىقتاردىڭ بەرىك قورعانىس شەبىن قۇرۋىمەن ەستە قالدى. الما-كەزەك الاپات تارتىس اياقتالۋعا جاقىن قالعان 16-شى مينۋتتا ماڭعىستاۋ كوكپار كومانداسىنىڭ ويىنشىسى الەكساندر پۋپەنكو سوڭعى سالىمدى سالدى. ءسويتىپ, 4:1 ەسەبىمەن جەڭىسكە جەتكەن قازاقستان كوكپارشىلارى چەمپيونات كۋبوگىمەن قاتار 10 ملن تەڭگە جۇلدە قورىنا قول جەتكىزسە, 2-ورىن يەسى قىرعىزستان كومانداسىنا 5 ملن تەڭگە بۇيىردى.
قۋانىشبەك قۇراماەۆ, قازاقستان كوكپار قۇراما كومانداسىنىڭ جاتتىقتىرۋشى:
– كوكپار ورتالىق ازيادا ءومىر ءسۇرىپ جاتقان تۇركىتەكتەس حالىقتاردىڭ بارىنە ورتاق. بىراق چەمپيوناتتىڭ قازاقستاندا ءوتۋى – ەلدەگى تۇراقتىلىق پەن تىنىشتىقتىڭ كەپىلى. بۇعان دەيىن 2013 جىلى كوكپاردان ازيا چەمپيوناتىن ۇيىمداستىرعان بولاتىنبىز. ەندى مىنە, الەم چەمپيوناتىن وتكىزۋگە قول جەتكىزدىك. ءبىزدىڭ جەڭىسكە قول جەتكىزگەنىمىز ۇلكەن جاتتىعۋدىڭ ناتيجەسى دەپ ويلايمىن.
تالاس بەگاليەۆ, قىرعىزستان كوكپار قۇراما كومانداسىنىڭ جاتتىقتىرۋشىسى:
– قىرعىزستاندا 50-دەن استام كوكپار كومانداسى بار. وسىلاردان ىرىكتەپ-سۇرىپتاپ كوماندا جاساپ اكەلدىك. بۇعان دەيىن دە كەلگەنبىز. فينالعا دەيىن بارلىق قارسىلاستارىمىزدى قالپاقپەن قاعىپ الدىق دەسەك قاتەلەسەيمىز. بۇعان دەيىن ءبىزدىڭ جىگىتتەر جاساندى سەركەمەن كوكپار تارتىپ كورمەگەندىكتەن قيىن بولدى. كوكپار ويىنىنىڭ ءوز ەسەبى بار. ال شەڭبەر جاعدايىندا بۇل ەسەپ ءتىپتى باسقاشا. سول سەبەپتى ازداعان جاڭىلىسۋلار بولدى. كوماندالىق ەسەپتە ەكىنشى ورىن الدىق. وسىعان قاناعات!
بەكەن قايرات ۇلى,
«ەگەمەن قازاقستان»
