– بالالارىمىز ءۇشىن وسىنداي كونتسەرت ۇيىمداستىرعان اكىمدىككە ۇلكەن راحمەت. وسىنداي مەرەكەلەر كوپ بولسىن. جەكسەنبى سايىن بالالارىمىزبەن, نەمەرەلەرىمىزبەن بىرگە اسەرلى كونتسەرتتەر تاماشالاپ, راحاتقا بولەندىك, – دەيدى زەينەتكەر دامەتكەن ءابدىراحمانوۆا.
اپتا سايىنعى «دۋماندى سارىارقا» جەكسەنبىلىك كونتسەرتتەر اياسىندا تانىمال قازاقستاندىق ارتىستەر دوسىمجان تاڭاتاروۆ, مارجان اراپباەۆا, گۇلزيرا بوكەيحان, دوس, اعايىندى جۇگۇنىسوۆتەر تريوسى, سونداي-اق, سىقاقشى قانات ءالجاپپاروۆ پەن قايرات ادىلگەرەي جانە تاعى باسقالار ونەر كورسەتۋدە. مەرەكەلىك شارالار پريگورودنىي, ينتەرناتسيونالنىي, ميچۋرين, كۇيگەنجار, ءوندىرىس, جەلەزنودوروجنىي, ۇركەر, كوكتال جانە پرومىشلەننىي تۇرعىن الاپتارىندا وتكىزىلدى. كونتسەرتتىك باعدارلاما بارلىق جاستاعى كورەرمەندەرگە ارنالعان. بارشاعا بەلگىلى ورىنداۋشىلاردان باسقا كونتسەرتتەرگە بي جانە مۋزىكالىق ۇجىمدار, كوشە تەاترلارىنىڭ ارتىستەرى, انيماتورلار, بويشاڭ قۋىرشاقتار قاتىسادى, ينتەراكتيۆتى ويىن-ساۋىق باعدارلامالار ۇيىمداستىرىلادى. كورەرمەندەردىڭ كوزايىمىنا اينالعان «دۋماندى سارىارقا» كونتسەرتتەرىنىڭ باعدارلاماسى وسىنداي. بالالار ەرتەگى كەيىپكەرلەرىنە قوسىلىپ بي بيلەيدى, ءان ايتادى جانە ءتۇرلى ويىندار وينايدى.
– ەكسپو-2017 حالىقارالىق مامانداندىرىلعان كورمەسىن وتكىزۋ اياسىندا قالا اكىمدىگى كوپشىلىك نازارىنا اۋقىمدى مادەني-بۇقارالىق شارالار ۇسىندى – حالىقتىق سەرۋەن, مادەني-بۇقارالىق, وتباسىلىق دەمالىس, فەستيۆالدەر, كورمەلەر, تەاترلاندىرىلعان جانە تسيرك قويىلىمدارى جانە باسقا شارالار وتكىزىلدى. قالا ماڭىنداعى ەلدى مەكەندەردىڭ تۇرعىندارى دا مەرەكەدەن تىس قالماۋى ءۇشىن ءار دەمالىس سايىن مۇندا دا بەلگىلى ارتىستەردىڭ قاتىسۋىمەن كونتسەرتتەر ۇيىمداستىرامىز, – دەيدى استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى بولات ماجاعۇلوۆ.
استانادا ەكسپو كورمەسى شەڭبەرىندە بەلگىلەنگەن مادەني-بۇقارالىق شارالار لەگى 1 ماۋسىمدا وتاندىق جانە رەسەيلىك ۇزدىك ارتىستەردىڭ قاتىسۋىمەن وتكەن Open Air كونتسەرتىمەن اشىلعان ەدى. «قازاق ەلى» مونۋمەنتىنىڭ الدىنداعى اشىق الاڭدا وتكەن شاراعا 50 مىڭنان استام كورەرمەن جينالدى. بۇدان باسقا, جوعارى ليگانىڭ سوڭعى جىلدارداعى چەمپيوندارىنىڭ قاتىسۋىمەن وتكەن كۆن جازعى كۋبوگى, وليمپيادا چەمپيونى ەۆگەني پليۋششەنكونىڭ الەمدىك تۋرنەسى اياسىندا ۇيىمداستىرىلعان مۇز ايدىنىنداعى «ششەلكۋنچيك» عاجايىپ شوۋ-ەرتەگىسى, استاناداعى سان-رەمو يتاليالىق مۋزىكا فەستيۆالى, «استانا ارقاۋ» ءداستۇرلى قازاق مۋزىكاسىنىڭ كونتسەرتتەرى جانە تانىمال قازاقستاندىق ەسترادا ورىنداۋشىلارىنىڭ «مۋزارت» توبىنىڭ, «دەرۆيشي» توبىنىڭ شىعارماشىلىق كەشتەرى, سەكەن تۇرىسبەكتىڭ, التىنبەك قورازباەۆتىڭ, روزا رىمباەۆانىڭ, ايقىن تولەپبەرگەننىڭ جانە باسقا شىعارماشىلىق كەشتەردىڭ ەلوردا جۇرتشىلىعى مەن قوناقتارىن تاماشا اسەرگە بولەگەنىن ەرەكشە اتاپ ايتقان ءجون.
دەمالىس كۇنگى «دۋماندى سارىارقا» كونتسەرتتەرى 11 ماۋسىمدا باستاۋ العان بولاتىن. ەكى ايدان ارتىق ۋاقىتتىڭ ىشىندە 120-عا جۋىق كونتسەرت وتكىزىلدى.
ايتا كەتەرلىك جايت, «دۋماندى سارىارقا» قورىتىندى كونتسەرتى كونستيتۋتسيا كۇنىنە ورايلاستىرىلىپ, 30 تامىزدا وتكىزىلەدى.
27 تامىزدا ەلوردا تۇرعىندارى مەن قوناقتارى تاعى دا ءبىر اۋقىمدى شارانى تاماشالايدى. استانادا العاش رەت قازىرگى زامانعى مۋزىكا ورىنداۋشىلارىنا مۇسىنشەلەر تابىستاۋ سالتاناتى ءوتتى. ءبىرىنشى جىل سايىنعى «استانا داۋىسى» حالىقارالىق فەستيۆالىندە 15 مەملەكەتتىڭ جىلدىڭ ۇزدىك انشىلەرى باعىن سىنادى. قازاقستاننىڭ تورىندە ءبىر ساحنادا مۋزىكا يندۋسترياسىنا باعىت بەرەتىن ارتىستەر – گريگوري لەپس, سۆەتلانا لوبودا, بيانكا, ۆيللي ۋيليامس, يلياس يالچينتاش, اراش, DJ Sava, ەۆا سيمونس جانە تاعى باسقالار ونەر كورسەتتى. فەستيۆالعا قازاقستاننىڭ اتىنان بەلگىلى ءانشى قايرات نۇرتاس قاتىسىپ, ءان شىرقادى. اۋقىمدى كونتسەرت بەيبىتشىلىك جانە كەلىسىم سارايىندا ءوتتى.
جىلقىباي جاعىپار ۇلى
ەگەمەن قازاقستان
سۋرەتتى تۇسىرگەن ەرلان ومار
ەگەمەن قازاقستان
