ەل ءۇمىتىن ۇكىلەگەن ەلوردامىزدىڭ جىلدان-جىلعا كەڭ قانات جايۋىنا بايلانىستى وقۋشىلار سانى دا ارتىپ كەلەدى. وتانداستارىمىز ءوزىنىڭ ءومىرى مەن قىزمەتىن, بالالارىنىڭ بولاشاعىن استانا قالاسىمەن بايلانىستىرعىسى كەلەتىنى دە زاڭدى. وسىعان بايلانىستى تەك بيىلعى جاڭا وقۋ جىلىندا عانا استانا مەكتەپتەرىنە باراتىن وقۋشىلار سانى 13 مىڭ بالاعا ارتىپ وتىر. ماسەلەن, وتكەن وقۋ جىلىندا ەلوردا مەكتەپتەرىندەگى بالالار سانى 130 مىڭ بولسا, بيىل 143 مىڭ وقۋشى ءدارىس الادى دەپ كۇتىلۋدە. 2011-2012 وقۋ جىلىندا استانا قالاسىنىڭ مەكتەپتەرىندە 70 مىڭ وقۋشى بولسا, بەس جىلدان استام عانا ۋاقىتتا بالا سانى ەكى ەسەدەن استام ءوسىپ وتىر.
كوشى-قون ءۇردىسىنىڭ كۇرت ارتۋىنا بايلانىستى بيىلعى جىلى ەلوردانىڭ 27 مەكتەبىندە كۇردەلى جاعداي قالىپتاسقان. وسى پروبلەمانى شەشۋ ماقساتىندا قالا اكىمدىگى بيىلعى جىلى بىرقاتار مەكتەپتەردە جاپسارلاس قۇرىلىس سالۋ ءىسىن قولعا العان بالاتىن. جاڭا وقۋ جىلى قارساڭىندا 5 مەكتەپتە 2600 ورىندىق جاپسارلاس سالىنعان قۇرىلىس نىساندارى پايدالانۋعا بەرىلدى. استانا قالاسىنىڭ اكىمى اسەت يسەكەشەۆتىڭ مالىمدەۋىنشە, الداعى ۋاقىتتا بۇل ماسەلەنى تۇبەگەيلى شەشۋ ماقساتىندا قالامىزدا 11 مىڭ وقۋشىعا ارنالعان 10 جاڭا مەكتەپ عيماراتىنىڭ قۇرىلىسىن سالۋ قولعا الىنعان كورىنەدى. جاڭا وقۋ جىلىندا قالاداعى 46 مەكتەپ تولىقتاي روبوتتىتەحنيكا كابينەتتەرىمەن جاراقتاندىرىلىپ, 10 مەكتەپ پەن 4 كوللەدجدە ءىت-ماماندارىن دايارلايتىن اكادەميالىق جۇيە جۇمىس ىستەي باستايدى. بۇل ءوز كەزەگىندە حالىقارالىق سەرتيفيكاتتار الاتىن 300 بىلىكتى ءىت-ماماندارىن دايارلاۋعا مۇمكىندىك بەرەدى.
ەلىمىزدە بالا تۋ كورسەتكىشىنىڭ ارتۋىنا جانە استانا قالاسىنا قونىس اۋداراتىندار تاسقىنىنىڭ تولاستاماۋىنا بايلانىستى ەلورداداعى مەكتەپ جاسىنا دەيىنگى مەكەمەلەردەگى ورىن تاپشىلىعى ازاياتىن ەمەس. قازىرگى تاڭدا استانالىق بۇلدىرشىندەردىڭ بالالار باقشالارىمەن قامتاماسىز ەتىلۋى 70 پايىزدى قۇراپ وتىر. بۇگىندە ەلوردادا 264 مەكتەپ جاسىنا دەيىنگى تاربيە مەكەمەسى جۇمىس ىستەيتىن بولسا, ونىڭ 116-سى جەكەمەنشىك بالالار باقشاسى. 2017 جىلدىڭ باسىندا مەملەكەتتىك بالالار باقشاسىنان ورىن الۋ كەزەگىنە 94646 ءبۇلدىرشىن تىركەلسە, ونىڭ 33240-ى 3 جاستان 6 جاسقا دەيىنگى بالالار بولىپ تابىلادى. وسىعان قاراماستان, استانا قالاسى ءبىلىم بەرۋ باسقارماسى باسشىسىنىڭ مىندەتىن اتقارۋشى ءانۋار جانعوزيننىڭ مالىمدەۋىنشە, ەلوردالىق بۇلدىرشىندەردىڭ بالالار باقشالارىمەن قامتىلۋى 2019 جىلى تولىق شەشىلەتىن كورىنەدى. ونىڭ سەبەبى, ءدال قازىرگى كۇنى جەكەمەنشىك بالالار باقشاسىن اشۋ كاسىپكەرلەر ءۇشىن تابىس كوزىنە اينالىپ وتىرعان جايى بار.
ماسەلەن, جوعارىدا ايتىلعان 116 جەكەمەنشىك بالالار باقشاسىنىڭ 96-سى مەملەكەتتىك تاپسىرىس بويىنشا جۇمىس ىستەيدى. ياعني, وسى 96 جەكەمەنشىك بالالار باقشاسىنا قابىلدانعان ءاربىر ءبۇلدىرشىن ءۇشىن مەملەكەت اي سايىن 23 مىڭ تەڭگە كولەمىندە قارجى اۋدارىپ وتىرسا, اتا-انالار 20800 تەڭگە تولەيدى. وسىعان بايلانىستى سوڭعى كەزدە مەملەكەتتىك بالالار باقشاسىنا قاراعاندا, جەكەمەنشىك بالالار باقشاسى كوپتەپ اشىلۋدا.
2020 جىلعا دەيىن استانا قالاسىندا بالالار باقشاسىنا دەگەن سۇرانىستى تولىق جابۋ ماقساتىندا قالا اكىمدىگى كەشەندى شارالاردى ءىس جۇزىنە اسىرىپ كەلەدى. تەك ۇستىمىزدەگى جىلدىڭ وزىندە باس قالامىزدا 7200 ورىندىق بىرنەشە بالالار باقشاسىنىڭ عيماراتى سالىنىپ پايدالانۋعا بەرىلمەك. مەملەكەت-جەكەمەنشىك ارىپتەستىگى تارتىبىمەن تاعى 6 بالالار باقشاسى عيماراتىن سالۋ جۇمىسى باستالدى. 2019 جىلى پايدالانۋعا بەرىلۋگە ءتيىس بۇل عيماراتتاردا 1680 استانالىق ءبۇلدىرشىن مەكتەپكە دەيىنگى تاربيە جۇمىستارىمەن قامتىلماق.
بۇگىنگى بۋىرقانعان وركەنيەت باسەكەسىنە قوسىلعان باس قالامىزدىڭ وسكەلەڭ ۇرپاققا ساپالى ءبىلىم, سانالى تاربيە بەرۋ ماقساتىندا اتقارىپ جاتقان جۇمىسى اۋقىمدى. بۇل رەتتە وسكەلەڭ زامان تالابىنا ساي ماتەريالدىق بازانىڭ اتقارار مىندەتى دە ولشەۋسىز. سوندىقتان قالالىق اكىمدىك ەلوردانىڭ مەكتەپ جانە مەكتەپ جاسىنا دەيىنگى بالالار مەكەمەلەرىنە دەگەن سۇرانىسىن تولىق قاناعاتتاندىرۋ ماقساتىندا كەشەندى مىندەتتەردى جۇزەگە اسىرا بەرمەك.
جىلقىباي جاعىپار ۇلى,
"ەگەمەن قازاقستان"
سۋرەتتى تۇسىرگەن ەرلان ومار,
"ەگەمەن قازاقستان"
