«ەۋروحيم» كومپانيالار توبى رەسپۋبليكالىق بيۋدجەتكە مول كولەمدە سالىق تولەپ وتىرعان ءىرى ينۆەستورلاردىڭ قاتارىندا. تەك بيىلعى جارتىجىلدىقتىڭ قورىتىندىسى بويىنشا 900 ميلليون تەڭگەدەن استام قارجى اۋدارىلعان. كومپانيا قازىرگى كەزدە جامبىل وبلىسىنداعى قاراتاۋ فوسفوريت الابىنىڭ كەن ورىندارىن يگەرۋگە ارنالعان ينۆەستيتسيالىق جوبالاردى جۇزەگە اسىرۋدا. يندۋستريالاندىرۋ كارتاسىنا ەنگەن بۇل جوبا ەلىمىزدى قاجەتتى مينەرالدى تىڭايتقىشتارمەن قامتاماسىز ەتەتىن بولادى. بۇل تۋرالى «ەۋروحيم – قاراتاۋ» جشس باقىلاۋ كەڭەسىنىڭ مۇشەسى ەركەبۇلان مىرزاعاليەۆ مالىمدەدى.
«ەكسپو كورمەسىندە بىرەگەي حيميالىق كەشەننىڭ جوباسىن تانىستىرۋ ءبىز ءۇشىن قۋانىشتى جاڭالىق. ونى جوبالاۋدا «ەۋروحيم» كومپانياسىنىڭ سونى تەحنولوگيالارى قولدانىلدى. وسىنىڭ ارقاسىندا فوسفات كەنىن دايىن ءونىم ەتىپ تولىعىمەن قايتا وڭدەپ, قورشاعان ورتاعا زيانىن تيگىزەتىن بارلىق قالدىقتاردىڭ كولەمىن بارىنشا تومەندەتۋگە مۇمكىندىك الىپ وتىرمىز. سۋمەن قامتيتىن تۇيىق جۇيە سۋدىڭ اعىپ كەتۋىنىڭ الدىن الىپ, تۇتىنىلاتىن سۋ كولەمىن ازايتسا, قايتالاما ەنەرگيا قورلارىن وزىمىزدە ءوندىرۋ ارقىلى تۇتىنىلاتىن ەلەكتر قۋاتى تومەندەيدى» – دەدى ول.
شارا سوڭىندا ەركەبۇلان مىرزاعاليەۆ «الماتى-2005» بالالار حوككەي كومانداسىن قۇتتىقتاپ, ماراپاتتادى. ايتا كەتەيىك, بالالار حوككەي كومپانياسى «EuroChem 2017» حالىقارالىق حوككەي سايىسىنان جەڭىسپەن ورالعان ەدى. قازاقستاندىق جاس حوككەيشىلەر فينالدا رەسەيلىك كوماندانى جەڭگەنى ەستە. ال «ەۋروحيم – قاراتاۋ» كومپانياسى بالالار حوككەي قۇراماسىنىڭ دەمەۋشىسى ءارى شابىت بەرۋشىسى.
ايگۇل سەيىل,
"ەگەمەن قازاقستان"
