ەكسپو-2017 • 28 تامىز، 2017

ەكسپو-2017. 3 ميلليونىنشى مەيمان تىركەلدى

128 رەتكورسەتىلدى

ەكسپو قالاشىعى ءوزىنىڭ ءۇش ميلليونىنشى كەلۋشىسىن كۇتىپ الماس بۇرىن ۇيىم­داستىرۋشىلار باق وكىلدەرىن جيىپ، ساقاداي-ساي وتىردى. 25 تامىز كۇ­­نى كۇندىزگى ساعات 12-دەن 38 مينۋت وتكەندە ەسەپ جۇيەسى قالاشىق قاق­پا­لا­رى­نىڭ بىرىنەن قاننەن-قاپەرسىز اتتاعان يۋري شۋرىگين اتتى مەيماندى 3 ميل­­ليونىنشى كەلۋشى رەتىندە بەلگىلەپ، كۇزەت قىزمەتى ونى دەرەۋ مەديا ور­تا­­­لىققا الىپ كەلدى. ول ءوزىن كۇتىپ وتىرعان جۋرناليستەردى كورىپ ءتىپتى تاڭعال­دى.

ەكسپو قالاشىعى كۇتپەگەن توسىنسىيلار جاساپ تۇرادى. وسىنىڭ الدىندا دا ميلليونىنشى كەلۋشى مەن ەكى ميلليونىنشى كەلۋشىنى ءدال وسىلاي كۇتىپ الىپ، ولاردىڭ گازەتتەر مەن تەلەەكرانداردان كورىنۋىنە جاعداي جاساعان. سىيلىق بەرۋدى دە ۇمىتقان جوق-تىن. بۇل جولى دا ءدال سولاي بولدى. يۋرا ەڭ الدىمەن باق وكىلدەرىنىڭ ساۋالىنا جاۋاپ بەرىپ، سوسىن ۇيىمداستىرۋشىلار اتىنان ارنايى سىيلىقتاردى يەلەندى. 

ەكسپو-نىڭ 3 ميلليونىنشى قوناعى ماسكەۋلىك يۋري شۋرىگين استاناعا «ەۋرازيا اپتالىعى» اياسىندا ءوتىپ جاتقان ءىس-شارالارعا قاتىسۋ ءۇشىن كەلگەن. ول ەكسپو-نىڭ ءۇش ميلليونىنشى قوناعى بو­­­لىپ تىركەلمەي تۇرىپ، ءبىر كۇن بۇرىن قا­لا­شىقتى ارالاعان بولىپ شىقتى. «ما­عان «نۇر الەم» پاۆيلونى قاتتى ۇنادى. ال بۇگىن جۇمىس كەستەم تىعىز بولسا دا، رەسەي پاۆيلونىن ارالاۋ ءۇشىن ادەيى كەلگەن ەدىم»، – دەگەن ول ەكسپو كورمەسىنىڭ رە­سەيدىڭ ەكاتەرينبۋرگ قالاسىندا 2025 جى­لى ۇيىمداستىرىلۋى مۇمكىن ەكەنىن، مۇن­داي كورمەلەردىڭ ادامدارعا جاقسى اسەر سىيلايتىنىن ايتىپ ءوتتى.
ال «استانا ەكسپو-2017» ۇك» اق تو­راعاسى احمەتجان ەسىموۆ قۇرمەتتى قوناقتى قۇت­تىقتاپ، وعان ەستەلىك سىيلىقتار تارتۋ ەتتى. توراعا كورمەگە كەلۋشىلەردىڭ سانى كۇن ساناپ ءوسىپ كەلە جاتقانىن مالىمدەدى. كە­لۋ­شى­لەردىڭ 15 پايىزىنىڭ شەتەلدىك قوناقتار ەكە­نىن، ال شەتەلدىكتەردىڭ اراسىندا رەسەيلىك قو­ناقتاردىڭ ۇلەس سانى كوپ ەكەنىن ايتتى. 

ەسكە سالا كەتەيىك، ەكسپو قالاشىعىندا ميلليونىنشى مەيمان كورمە باستالعان سوڭ 31 كۇننەن كەيىن تىركەلگەن بولسا، ەكى ميلليونىنشى قوناق تامىزدىڭ 4-ءى كۇنى بەلگىلەنگەن. 

ايگۇل سەيىل،

"ەگەمەن قازاقستان"

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار