وسى ورايدا, جۋىردا عانا تاراز قالاسىنداعى «تورتكۇل» كەرۋەن سارايىندا مويىنقۇم اۋدانى ونەرپازدارىنىڭ «مويىنقۇمنىڭ دالاسى مەن اۋەنى» اتتى دۋماندى-سازدى كونتسەرتى بولىپ ءوتتى.
اتالعان شارا مويىنقۇم ءان-بي ءانسامبلىنىڭ ورىنداۋىندا كۇي اتاسى – قۇرمانعازىنىڭ «بالبىراۋىن» تۋىندىسىمەن اشىلدى. سونداي-اق, كونتسەرت بارىسىندا «قارلىعاش» بي توبى جانە ءجاميلا وماروۆا, ەرلان ايتقابىل سىندى تالانت يەلەرى ءوز ونەرىمەن كوپشىلىكتىڭ كوڭىلىنەن شىقتى. اۋەلەتە سالعان ءان مەن مىڭ بۇرالا بيلەگەن بي دە قازاق ونەرىنىڭ قۇدىرەتىن ەلگە تاعى ءبىر تانىتقانداي ەدى.
ال مويىنقۇمدىقتاردىڭ ونەرىن تاماشالاۋعا كەلگەن كوپشىلىك اشىق اسپان استىنداعى جازىلبەك قۋانىشباەۆ اتىنداعى مۇراجاي جانە اۋداندىق ورتالىقتاندىرىلعان كىتاپحانا كورمەسىمەن تانىستى. بۇل جەردە دە اتى اڭىزعا اينالعان اتاقتى شوپاننىڭ وتكەن ءومىر جولى مەن ەڭبەك جولى كەرەمەت ۇيلەسىم تاۋىپ, كوپشىلىككە جاقسى اسەر سىيلادى.
اتالعان دۋماندى كەش وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن ەكسپو-2017 حالىقارالىق كورمەسى اياسىندا وتكىزىلدى. ەل ىشىندەگى تالانتتاردى ەلگە تانىتۋ ماقساتىندا قولعا الىنىپ كەلە جاتقان مۇنداي دۋماندى كەشتەر قىركۇيەك ايىنىڭ ورتاسىنا دەيىن «تورتكۇل» كەرۋەن سارايىندا جالعاسىن تاباتىن بولادى.
كەلەسى اپتادا قالا تۇرعىندارى مەن قوناقتارى قورداي اۋدانى ونەرپازدارىنىڭ كونتسەرتىن تاماشالاماق.
حاميت ەسامان,
«ەگەمەن قازاقستان»
جامبىل وبلىسى
