مۇندا امەريكا, برازيليا, اۋستراليا, تاعى باسقا ىستىق جاقتاردا ءومىر سۇرەتىن تروپيكالىق قۇستار مەن اڭداردىڭ كوپتەگەن تۇرلەرى شوعىرلانعان. ولاردىڭ اراسىندا توتىقۇستىڭ نەشەمە تۇرلەرى كەزدەسەدى. ەڭ كىشكەنتايى – شۋاقتى اراتينگا. سالماعى 100-120 گرامم عانا, ۇزىندىعى 20 سانتيمەتردەن اسپايدى. ەڭ كارىسى – جاسىل قاناتتى ارا. جاسى 15-تە. سويلەگەندە ءسوزدىڭ ءتۇبىن تۇسىرەدى. سارى, قىزىل ايدارلى كاكادۋ, قىزىل لوري, مىسىر كۇلەگى ...قۇستار تىزبەگى وسىلاي جالعاسا بەرەدى.
بەس جاستاعى بونيا ەسىمدى اق قولدى گيببون مايمىلى جانىنان ۇرشىقشا ءۇيىرىلىپ شىقپايتىندار قاراسى قالىڭ. ەكى مىڭ مەتر بيىكتىككە دەيىن ەركىن ورمەلەي الادى دەسەدى. ابدەن قىزىققا كەنەلتتى. ءابجىل قيمىلىنا كوز ىلەسپەيتىنى سونشالىق, بالالاردىڭ كوبىنە تەلپەگىن «ۇرلاۋعا» قۇمار. سوسىن «ساۋدالاسادى-اي» كەلىپ. بانان ۇسىنساڭ, لەزدە قايتارىپ بەرەدى. سوعان قاراعاندا باسقالارعا سالماق سالماي ءوز تاماعىن ءوزى تاۋىپ جۇرگەن ءتارىزدى. زووباق قىزمەتكەرى الينا ەرەمينانىڭ ايتۋىنشا, ونىڭ ويلاۋ قابىلەتى ءۇش جاستاعى سابيدىكى سياقتى. تۋكاننىڭ دا نەگىزگى قورەگى – تەك جەمىس. سكۋنس, جانات توردىڭ ىشىندە تىپىرشىپ, جاندارىن قويارعا جەر تاپپاي جۇرسە, ۇيقى كەلگەندە ەشتەنەگە قارامايتىن كينكاجۋدىڭ ەشكىممەن شارۋاسى جوق سەكىلدى. مەكسيكا ورماندارىن مەكەندەيتىن بۇل گۇل ايۋى تۇندە عانا جورتىپ, كۇندىز اعاش قۋىسىنا كىرىپ الىپ, ۇيقىنى سوعاتىن كورىنەدى.
قىزىقتى كانيكۋل كۇندەرى ۇلكەن شاتتىققا كەنەلگەن بالالاردىڭ زووباق يەسى يگورعا ايتار العىستارى شەكسىز.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
