قاتىسۋشىلار جۋىردا عانا قازاقستان, رەسەي, ارمەنيا, بەلورۋس پەن قىرعىزستاننىڭ جوعارعى وقۋ ورىندارى بازاسىندا قۇرىلعان مەملەكەتارالىق جەلىلىك قارجى ينستيتۋتىنىڭ قىزمەتى تۋرالى ءسوز قوزعاپ, جەلىلىك ءبىلىم بەرۋدىڭ ارتىقشىلىقتارى تۋرالى ءسوز قوزعادى. جيىندى مەملەكەتارالىق جەلىلىك قارجى ينستيتۋت پرەزيدەنتى ناتاليا كورجوۆا جۇرگىزىپ وتىردى. ول ءوز سوزىندە ەۋرازيالىق ەكونوميكالىق وداق اياسىندا بىرىڭعاي بىلىكتىلىك تالاپتارىن ەنگىزۋ قاجەتتىگىنە ەرەكشە توقتالدى. مالىمدەۋىنشە, ينتەگراتسيالىق بايلانىستى ارتتىرۋ ءۇشىن بىلىكتى قارجىگەرلەردى وقىتىپ, ورتاق ەڭبەك نارىعىنا بەيىمدەۋ كەرەك. بۇل ماقساتتا ەلىمىزدەگى قارجى اكادەمياسى سەكىلدى رەسەي, قىرعىزستان, ارمەنيا جانە بەلارۋس مەملەكەتتەرىندەگى مامان دايارلايتىن 6 وقۋ ورنى ءبىر جۇيەگە بىرىكتىرىلگەن. ونىڭ ىشىندە رەسەي ۇكىمەتى جانىنداعى قارجى ينستيتۋتى, سانكت-پەتەربۋرگ قارجى ەكونوميكالىق ينستيتۋتى, بەلارۋس ەكونوميكالىق قارجى ينستيتۋتى, رەسەي-ارميان جانە قىرعىز-سلاۆيان قارجى ۋنيۆەرسيتەتتەرى بار. سونداي-اق. قازاقستاننىڭ قارجى مينيسترلىگىنىڭ قارجى اكادەمياسى دا وسى قۇرامعا كىردى. مۇنداي بىرلەسكەن جۇمىستىڭ ماقساتى ەەو ەلدەرىنە باسەكەگە سايكەس مامان دايارلاۋ, سەرتيفيكاتتاۋ, بىلىكتىلىگىن مويىنداۋعا ارنالدى.
سەسسيا وتىرىسىندا ەاەو ەلدەرىنىڭ مەملەكەتتىك مەكەمەلەرى مەن كۆازيمەملەكەتتىك سەكتورلارىنا قارجى ماماندارىن دايارلاۋ ماسەلەسىنە ەرەكشە ءمان بەرىلدى. ايتالىق, ءبىلىم سالاسىنداعى ينتەگراتسيانىڭ ءورىسىن كەڭەيتۋ جۇمىسىن تىلگە تيەك ەتكەن قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ قازاقستان تاراپى ىزگى باستامالارعا دايىن ەكەنىن اتاپ ءوتتى.
«قازاقستان ءۇشىن ءبىلىم بەرۋ سالاسىنداعى ينتەگراتسيا مەن ىشكى ينتەگراتسيانىڭ ناقتى باستامالارى وتە ماڭىزدى. ءبىلىم بەرۋ سالاسى – ءبىزدىڭ ەۋرازيالىق ينتەگراتسياداعى ەڭ وزىق باعىتتاردىڭ ءبىرى. 90-شى جىلداردان بەرى ءبىزدىڭ ءبىلىم بەرۋ مەكەمەلەرىمىزدىڭ اراسىنداعى قارىم-قاتىناس جوعارى دەڭگەيدە نىعايىپ كەلەدى. وتكەن جىلدىڭ ساۋىرىندە ماسكەۋدە حالىقارالىق جەلىلىك ۋنيۆەرسيتەت قۇرۋ تۋرالى مەموراندۋمعا قول قويىلدى. قازىرگى تاڭدا قازاقستان وزىق تاجىريبەلەر مەن ءبىلىم بەرۋ يننوۆاتسيالارىنىڭ ەلدەردىڭ دامۋىنا جاردەمدەسۋىنە مۇددەلىلىك تانىتىپ وتىر. قازاقستاننىڭ 50-دەن استام جوعارى وقۋ ورىندارىندا ەاەو-نىڭ جوعارى وقۋ ورىندارىمەن بىرگە قوسديپلومدى باعدارلاماسى بار», دەدى ا.ورساريەۆ. ايتۋىنشا, قازاقستان جىل سايىن شەتەلدىك بىلىكتى مامانداردى تارتۋ ءۇشىن تەك قانا جوعارى وقۋ ورىندارىنىڭ رەسۋرستارىن عانا ەمەس, مەملەكەتتەن دە قاراجات بولەدى. ول باعىتتاعى جۇمىس قازاقستاندىق ءبىلىم بەرۋ ساپاسىن ارتتىرۋعا زور ۇلەسىن قوسىپ كەلەدى. «ەلىمىزدىڭ 9 ۋنيۆەرسيتەتى QS رەيتينگىنە ەندى. بيىلعى جىلى قازاقستاننىڭ بازاسى نەگىزىندە ورتالىق ازيا ءبىلىم بەرۋ حابى قۇرىلعانىن جاريالادىق. ءبىز قازاقستان ەۋرازيالىق كەڭىستىك شەڭبەرىندە ءبىلىم بەرۋ قىزمەتتەرىن كورسەتۋ سالاسىندا باسەكەگە قابىلەتتى بولۋىن قالايمىز», دەدى ا.ورساريەۆ.
جيىندا سونداي-اق, «سبەربانك» كاق باسقارما توراعاسىنىڭ كەڭەسشىسى ەلەنا تەپليتسكايا, «قارجى اكادەمياسى» اق رەكتورى گۇلزادا شاكۋليكوۆا, قىرعىز رەسپۋبليكاسى ساۋدا ونەركاسىپتىك پالاتاسى مەملەكەتتىك-جەكەمەنشىك ارىپتەستىگى جانە ينفراقۇرىلىمدى دامىتۋ, ەكسپورتقا جاردەم, ونەركاسىپتىك ساياسات جونىندەگى كوميتەت توراعاسى قۋاتبەك راحيموۆ, رەسەي فەدەراتسياسى كولىك ءمينيسترىنىڭ ورىنباسارى كەڭەسشىسى يۋليا زۆورىكينا, قازاقستاندىق «تالاپ» قولدانبالى زەرتتەۋلەر ورتالىعىنىڭ ديرەكتورى راقىم وشاقباەۆ, «ەۋرازيا الەمى» قوعامدىق ورىنىڭ پرەزيدەنتى ەدۋارد پولەتاەۆ, ەۋرازيالىق ەكونوميكالىق كوميسسيا القاسى توراعاسىنىڭ كومەكشىسى يۋليا چالايا جانە تاعى باسقالار ءسوز سويلەپ, ينتەگراتسيالىق ءبىلىم ماسەلەسىندەگى ويلارىن ورتاعا سالدى.
دينارا بىتىك,
«ەگەمەن قازاقستان»
سۋرەتتى تۇسىرگەن ەرلان ومار,
"ەگەمەن قازاقستان"
