«قازسپورت» تەلەارناسىنان تىكەلەي ەفيردە كورسەتكەنىندەي, ماتچ بارىسىندا قوس كوماندانىڭ دا گول سوعاتىن مۇمكىندىكتەرى بولدى. ەكىنشى كەزەڭنىڭ اياعىنا تامان «بارىس» ويىنشىلارى ابجىلدىك تانىتتى. سونداي ساتتەردىڭ بىرىندە, 40-مينۋتتا كاپيتان نايدجەل دوۋستىڭ پاسىنان كەيىن كومانداعا بيىل كەلگەن كانادالىق ليندەي ۆەيدىڭ سوققىسىن «سپارتاكتىڭ» قاقپاشىسى نيكيتا بەسپالوۆ قايتارعانىمەن, شايباعا ءبىرىنشى جەتكەن مارتەن سەن-پەر «بارىستىڭ» جاڭا ماۋسىمداعى العاشقى گولىنىڭ اۆتورى اتاندى.
ءۇشىنشى كەزەڭدە قازاقستاندىق مامان ەۆگەني كورەشكوۆ جاتتىقتىراتىن «بارىس» بارىنشا جيناقى ويناپ, باسىمدىلىقتى ساقتاپ قالۋمەن بىرگە وڭتايلى ساتتەردى پايدالانۋعا تىرىستى. ال ماسكەۋلىكتەر تارازى باسىن تەڭەستىرۋگە ۇمتىلىپ باقتى. ويىن بىتۋگە ءۇش مينۋت قالعاندا, «سپارتاك» سان باسىمدىلىعىنا يە بولدى. الايدا شۆەتسيالىق قاقپاشى حەنريك كارلسسون باستاعان «بارىستىڭ» قورعانىسىن بۇزا الماعان مەيمانداردىڭ وزدەرى ءتارتىپ بۇزىپ, فينليانديالىق قورعاۋشى ۆيللە لايۋنەن ايدىننان قۋىلدى. وسىعان قاراماستان, «سپارتاك» قاقپاشىسىنىڭ ورنىنا ويىنشى شىعارىپ, العا ۇمتىلدى. وسى كەزدە مارتەن سەن-پەر بوس قالعان قاقپانى ءدال كوزدەدى.
ءسويتىپ, «بارىس» جاڭا ماۋسىمداعى ءبىرىنشى جەڭىسىنە قول جەتكىزدى.
ايتا كەتەيىك, جاقىندا قازاقستاندىق شابۋىلشى تالعات جايلاۋوۆ تا كومانداعا قايتا ورالدى.
