مۇنداي قادام قىلمىستىق تەكسەرۋ بارىسىندا ادام بوستاندىعى مەن قۇقىعىن قورعاۋ ماقساتىندا جوسپارلانعان. مارات احمەتجانوۆ پىكىرىنشە, كەز كەلگەن جاعدايدا ازاماتتاردى تەمىر تورعا سۇيرەي بەرۋ دۇرىس ەمەس.
«ەگەر ءتارتىپ بۇزعان ادام قوعامعا زيانسىز بولسا, ونى تۇتقىنعا الۋدىڭ قاجەتى جوق. كەپىلگە قويۋ, ءۇي قاماق دەگەن سەكىلدى تاسىلدەر بار. ەگەر كۇدىكتى قىلمىستىق توپتىڭ مۇشەسى بولماسا, مۇنداي قادامدى ەكونوميكالىق قىلمىستارعا قولدانعان ءجون. كەي جاعدايدا تۇتقىنعا الۋ ارقىلى قىلمىستى موينىنا ءىلىپ جىبەرۋ ءۇشىن قىسىم جاسالادى. سوندىقتان, ۋاقىتشا ۇستاۋ مەرزىمىن 72 ساعاتتان 48 ساعاتقا ازايتقان ءجون», – دەدى مارات احمەتجانوۆ.
جيىن بارىسىندا قۇقىق قورعاۋ ورگاندارى, سوت جانە باسقا دا مەملەكەتتىك ورگانداردىڭ وكىلدەرى قۇقىق قورعاۋ قىزمەتىن جەتىلدىرۋ جانە قىلمىستىق پروتسەستى رەفورمالاۋدىڭ نەگىزگى جولدارىن تالقىلادى.
ەستەرىڭىزدە بولسا, مەملەكەت باسشىسىنىڭ تاپسىرماسى بويىنشا رەفورما جۇرگىزۋدىڭ جولدارىن ناقتىلاۋ ءۇشىن ۆەدومستۆوارالىق جۇمىس توبى قۇرىلعان. ونىڭ قۇرامىنا جوعارى سوتتىڭ, ادىلەت مينيسترلىگىنىڭ, قۇقىق قورعاۋ جانە ارنايى ورگانداردىڭ ءبىرىنشى باسشىلارى كىردى.
سپيكەرلەر جاڭادان ۇسىنىلعان قۇقىق قورعاۋ قىزمەتىن جەتىلدىرۋ جانە قىلمىستىق پروتسەستى رەفورمالاۋ جوباسى زاڭ ۇستەمدىك ەتەتىن قوعام قۇرۋعا ارنالعان ساياساتتىڭ جاڭا كەزەڭىن كورسەتەتىنىن اتاپ ءوتتى. وسى باعىتتا اتقارىلىپ جاتقان اۋقىمدى شارالار مەملەكەت باسشىسىنىڭ تاپسىرماسىمەن قولعا الىنعان ۇلت جوسپارىن جۇزەگە اسىرۋ شەڭبەرىندە جۇرگىزىلىپ كەلەدى.
جاڭا جوبادا قىلمىستىق پروتسەستەگى ادام قۇقىعىن قورعاۋدى نىعايتۋ, تاراپتاردىڭ تەڭدىگىن ارتتىرۋ, سوتتىق باقىلاۋدى كەڭەيتۋ جانە تەرگەۋ ورگاندارى, پروكۋراتۋرا مەن سوت قۇزىرەتىن ءبولىپ, ءبىر جۇمىستى ەكى مەكەمەگە جۇكتەمەۋگە باعىتتالعان.
مارات احمەتجانوۆتىڭ ايتۋىنشا, باس پروكۋراتۋرا مەن ءىىم بىرلەسە وتىرىپ, ەلىمىزدىڭ 7 وڭىرىندە پيلوتتىق جوبا وتكىزگەن ەكەن. جۇرگىزىلگەن جۇمىس ناتيجەسى بويىنشا بىرقاتار ۇسىنىستار ازىرلەنىپ, ناقتى شارالار قابىلدانعان. ماسەلەن, قىلمىستىق پروتسەسستەر تسيفرلىق جۇيەگە اۋىستىرىلا باستاعان. وسىعان بايلانىستى, «ەلەكتروندى قىلمىستىق ءىس» جۇيەسى قۇرىلىپتى. جاڭا جۇيە قىلمىستىق ىستەردىڭ جوعالىپ كەتۋىنىڭ نە وزگەرتىلۋىنىڭ الدىن الادى. سونىمەن قاتار, قىلمىستىق ءىستىڭ تەز شەشىلۋىنە جاردەمدەسىپ, بيۋدجەت قارجىسىن ۇنەمدەيدى. قازىرگى تاڭدا مۇنداي جۇيە جامبىل وبلىسىندا ەنگىزىلگەن. قىركۇيەكتىڭ ورتاسىنا دەيىن تاعى 5 وڭىردە «ە-قىلمىستىق ءىس» جوباسى ىسكە قوسىلادى.
اباي اسانكەلدى ۇلى
«ەگەمەن قازاقستان»
