مەملەكەت باسشىسى بەكىتكەن 2015–2025 جىلدارعا ارنالعان سىبايلاس جەمقورلىققا قارسى ستراتەگيانى ىسكە اسىرۋ ماقساتىندا قوعام بەلسەندىلەرىنىڭ تىكەلەي ارالاسۋىمەن جەڭ ۇشىنان جالعاساتىن جەگى قۇرتتىڭ تامىرىنا بالتا شابۋ ءۇشىن ارنايى توپ قۇرىلىپ, قىزمەتكە كىرىسكەنى بەلگىلى. اتالعان توپتىڭ كەزەكتى باسقوسۋىنا جەتەكشىلىك ەتكەن نۇرلان ەرىمبەتوۆ وسى كۇندەرى قارجى مينيسترلىگىنىڭ سىبايلاس جەمقورلىققا قارسى جۇرگىزىپ وتىرعان جۇمىسى كوڭىل كونشىتپەيتىنىن ايتىپ, سىن تەزىنە الدى. ال مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ ارنايى توپ وكىلدەرىمەن جۇرگىزىلگەن بىرلەسكەن تالداۋ قورىتىندىسى كەيبىر ورگانداردىڭ زاڭنامالىق اكتىلەردە جانە ۇيىمداستىرۋشىلىق-باسقارۋشىلىق قىزمەتىندە بىرقاتار سىبايلاس جەمقورلىق تاۋەكەلدەرىن انىقتاعانىن مالىمدەدى.
«تاۋەكەلدەردىڭ جارتىسىنان كوبى مەملەكەتتىك ورگانداردىڭ ءوز قىزمەتىندە باسشىلىققا الاتىن نورماتيۆتىك-قۇقىقتىق اكتىلەردە انىقتالعان. ءبىز مۇنى اگەنتتىك پەن «اتامەكەن» ۇلتتىق كاسىپكەرلەر پالاتاسىمەن بىرلەسكەن جول كارتاسىن ىسكە اسىرۋ ناتيجەلەرىن تاۋەلسىز ساراپشىلارمەن قاراستىرۋ بارىسىندا سىبايلاس جەمقورلىققا قارسى اۋقىمدى شارالارعا جۇرگىزىلگەن تالداۋ-ساراپتاما دەرەكتەرىنە سۇيەنە وتىرىپ ايتقىمىز كەلەدى», دەدى ول.
ا.شپەكباەۆتىڭ ايتۋىنشا, ەلىمىزدە بيزنەستى دامىتۋمەن بايلانىستى مەملەكەتتىك ورگاندار قىزمەتىنىڭ 16 سالاسى جىل باسىنان بەرى مۇقيات زەرتتەلگەن. تالداۋ ناتيجەسىندە, جەمقورلىق وقيعاسىن جويۋ جونىندە 280 ۇسىنىم قابىلدانعان بولسا, ونىڭ 62 پايىزى (174) ءتۇرلى دەڭگەيدەگى نورماتيۆتىك-قۇقىقتىق اكتىلەرگە وزگەرىستەر ەنگىزۋدى قۇپتايدى. قالعان 38 پايىزىندا مەملەكەتتىك قىزمەتتەردى كورسەتۋ سالالارىن رەتتەۋ, باقىلاۋ جانە رۇقسات بەرۋ فۋنكتسيالارى مەن مەملەكەتتىك ساتىپ الۋدى وتكىزۋ پروتسەدۋرالارى جانە پەرسونالمەن جۇمىس جۇرگىزۋگە قاتىستى ۇسىنىمدار بولىپ تابىلادى ەكەن.
جيىن بارىسىندا كەدەن قىزمەتىنىڭ جۇمىسكەرلەرىن ءپورتاتيۆتى بەينەتىركەۋلەرمەن قامتاماسىز ەتۋ نورمالارىن بەكىتە وتىرىپ, ونى ناقتى قولدانىسقا ەنگىزبەسە, اتالعان سالاداعى سىبايلاس جەمقورلىق ارەكەتتەرىن ازايتۋ مۇمكىن ەمەستىگى دە ايتىلدى. مەملەكەتتىك كىرىستەر كوميتەتى قىزمەتكەرلەرىنىڭ جۇمىسىنا ايقىندىق پەن اشىقتىق قۇرالدارىن ەنگىزۋ ماڭىزدىلىعى جونىندەگى پىكىردى ارنايى بايانداما جاساعان سىبايلاس جەمقورلىققا قارسى ساياسات دەپارتامەنتىنىڭ ديرەكتورى سالاۋات مۇكسىموۆ ءبىلدىردى.
ءوز كەزەگىندە ءسوز العان قارجى ءمينيسترىنىڭ ورىنباسارى باۋىرجان تورتاەۆ مينيسترلىك بەكىتىلگەن جوسپار بويىنشا ءىس-شارالار لەگى جىل سوڭىنا دەيىن تولىق ىسكە اسىرىلاتىندىعىنا سەندىرىپ باقتى.
«كەدەن قىزمەتىنىڭ جۇمىسشىلارى ءۇشىن بەينەتىركەۋلەردى الۋ قۇجاتىنا قازىرگى كەزدە قول قويىلعان. سالىقتىق جانە كەدەندىك اكىمشىلەندىرۋ جونىندەگى «استانا-1» اقپاراتتىق جۇيەسى قورىتىندى تەستىلەۋ دەڭگەيلەرىنەن وتۋدە جانە بۇل جۇيە دە جاقىن كۇندەرى ىسكە قوسىلاتىن بولادى», دەدى ب.تورتاەۆ.
وتىرىس قورىتىندىسىندا ارنايى مونيتورينگتەۋ توبىنىڭ مۇشەلەرى قارجى مينيسترلىگىنە سىبايلاس جەمقورلىققا قارسى ستراتەگيانى جۇزەگە اسىرۋعا قاتىستى اگەنتتىك ۇسىنىمدارىن ورىنداۋ قاجەتتىگىن ەسكەرتتى. سونىمەن قاتار, مۇنداي تالاپ-تىلەكتەر قاپەرگە الىنباعان جاعدايدا جاۋاپتى لاۋازىمدى تۇلعالاردى تارتىپتىك جاۋاپكەرشىلىككە تارتۋ جونىندە اگەنتتىك اتىنان پرەزيدەنت اكىمشىلىگى مەن ۇكىمەتكە ارنايى حات جولداۋ جايى دا ايتىلدى.
نۇرلىبەك دوسىباي,
«ەگەمەن قازاقستان»
