جوبا ەلباسىنىڭ ەلىمىزدە تسيفرلى تەحنولوگيالاردى دامىتۋ تۋرالى تالابىنىڭ اياسىندا جۇزەگە اسىرىلۋدا. وسى ماقساتپەن باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىمەن بيۋدجەتتەن قوسىمشا شىعىنسىز «ە-قىلمىستىق ءىس» باعدارلاماسى ازىرلەندى.
باعدارلاما قىلمىستىق پروتسەستىڭ قىلمىستىڭ تىركەلۋىنەن باستاپ, ونىڭ تەرگەلۋى جانە ۇكىم ورىندالعانعا دەيىن بارلىق ساتىسىن قامتيدى.
باس پروكۋرور جاقىپ اسانوۆتىڭ ايتۋىنشا, تسيفرلى تەحنولوگيالارعا كوشكەن جاعدايدا, قوعامنىڭ جانىنا باتىپ جۇرگەن ءبىراز پروبلەمالارى شەشىلەدى. ولار وزدىگىنەن جويىلادى. سوندىقتان وسىعان قاتتى ءمان بەرىلىپ وتىر.
باعدارلامانىڭ ساپالى ەنگىزىلۋى ماقساتىندا جوعارىدا اتالعان ۆەدومستۆولارمەن بىرلەسكەن بۇيرىققا قول قويىلىپ, ۆەدومستۆوارالىق جۇمىس توبى قۇرىلدى.
باعدارلامانى ءبىرىنشى بولىپ استانا جانە جامبىل وبلىسى, 10 قىركۇيەكتەن باستاپ – اتىراۋ جانە شىعىس قازاقستان ال 20 قىركۇيەكتەن باستاپ باتىس جانە وڭتۇستىك قازاقستان وبلىستارى سىناقتان وتكىزەدى.
ەلەكتروندى قىلمىستىق ءىستىڭ بەرەرى نە؟
a) قىلمىستىق ءىستى بۇرمالاۋ بولمايدى, ىستەر جوعالمايدى;
ب) قاجەتى جوق, ارتىق قاعازدان قۇتىلامىز;
ۆ) ەلەكتروندى فورماتقا كوشسەك, ىستەر تەزىرەك تەرگەلمەك. جۇيەدە 100 شاقتى پروتسەسسۋالدىق قۇجاتتىڭ شابلونى بولادى. سوتتان سانكتسيانى ەلەكتروندى تۇردە الۋعا بولادى;
گ) تالداۋ كۇشەيەدى. ءاربىر قىلمىستىق ىسكە تەرەڭ ءۇڭىلىپ, مەملەكەت بويىنشا بىركەلكى پراكتيكا قالىپتاستىرۋعا مۇمكىندىك اشىلماق;
د) جابىرلەنۋشى, ايىپتالۋشى, ادۆوكات ءىستىڭ قالاي تەرگەلىپ جاتقانىن كەز كەلگەن ۋاقىتتا ونلاين رەجىمدە كورە الادى;
ج) ەلەكتروندى شاعىمدار ءمودۋلى جۇمىس ىستەي باستايدى. تاراپتار تەرگەۋشىنىڭ ءىس-ارەكەتىنە شاعىم كەلتىرسە, ونى پروكۋرور بىردەن ونلاين تەكسەرە الادى.
باعدارلاما بوگدە ادامداردىڭ, سونىڭ ىشىندە جۇيەنىڭ اكىمشىلەرىنەن قىلمىستىق ءىس ماتەريالدارىنا رۇقساتسىز قول جەتكىزۋىنەن قورعايدى. ءىستىڭ ماتەريالدارىنا تەك ءىستى جۇرگىزەتىن تەرگەۋشى جانە پروكۋرور قول جەتكىزە الادى.
«ەگەمەن-اقپارات»
