تاعىلىمدى ەڭبەك

سەيىت قاسقاباسوۆ. ءويورىس. (فولكلور تۋرالى). “استانا پوليگرافيا”.جوعارى وقۋ ورىندارىندا ءبىلىمنىڭ ساپاسى مەن دەڭگەيى كوتەرىلۋى ءۇشىن عىلىمنىڭ سوڭعى جاڭالىقتارى مەن جەتىستىكتەرى وقۋ ۇردىسىندە ۇنەمى ەسكەرىلىپ وتىرۋى ءلازىم. بۇل رەتتە پرو­فەس­سور-وقىتۋشىلارعا قويىلار اسا قاجەتتى كاسىبي تالاپ ءوز سالاسى بويىنشا بىلىكتى مامان بولىپ, وقىتىلاتىن ءپانى مەن جۇرگىزەتىن ءدارىس-ساباقتارىندا عىلىمعا جاڭادان قوسىلعان سونى ماتە­ريال­دار مەن دالەل­دەن­گەن ءتۇيىن-قورىتىندىلاردى قولدانا الۋى, ءاردايىم ىزدەنىس ۇستىندە بولۋى. دارىسكەر ۇستاز ءۇشىن, شاكىرت-ستۋدەنت ءۇشىن دە قولىنداعى دايىن وقۋلىق پەن وقۋ قۇرالى­نىڭ باعدارشىلىق ورنى ەرەكشە. كەيىنگى جىلدارى قازاق فولكلورتانۋى تەوريالىق, ءادىس­تەمەلىك جاعىنان جەتىلىپ, بيىكتەي ءتۇستى. اتالعان باعىتتا اينالىمعا كىرگەن دەرەكتەر, جا­ريالانعان كولەمدى مونوگرافيا­لار مەن قورعالعان ديسسەرتاتسيا­لار سانى ءبىرشاما. سوعان قارا­ماس­تان, بۇل پاننەن جوعارى وقۋ ورىن­دارىن­دا پايدالانۋ ءۇشىن وتكەن عاسىر­دىڭ ەلۋىنشى جىل­دارىندا جازىل­عان مالىك عاب­دۋلليننىڭ “قازاق اۋىز ادە­بيەتى” اتتى كىتابىن قايتالاپ باستىرۋ­مەن عانا شەك­تەلىپ كەل­دىك. اتال­مىش وقۋلىقتى اۋىس­تىراتىن­داي, ۋاقىت تالابى­نا جاۋاپ بەرە الاتىن زاماناۋي قۇرال ازىرلەۋ­دىڭ زارۋلىگىن سالا ماماندارى الدەقاشان سەزىنگەن. وسى ولقىلىقتىڭ ورنىن تول­تىرۋ ماقساتىندا جاقىندا عانا جارىققا شىققان رەسپۋب­لي­كادا­عى جەتەكشى فولكلور­تانۋشى, اكادەميك سەيىت قاسقا­باسوۆتىڭ ء“ويورىس” اتتى ەڭبەگى جاڭاشىل سيپاتىمەن ەرەكشەلە­نەدى. اۆتور­دىڭ: “فولكلور جانر­­لا­رىن ەتنو­­گرافياعا سۇيەن­بەي زەرتتەۋ مۇمكىن ەمەس. ەتنوگ­رافيا فولك­لور­لىق جانر­لار­دىڭ ەرتە زامان­داعى سي­پا­تىن, ال­عاشقى دامۋ جولدارىن زەرت­تەۋ­دە وتە پايدالى. سەبەبى, جانر­لاردىڭ دا, سيۋجەتتەر مەن موتيۆ­تەردىڭ دە پاي­دا بولۋى عانا ەمەس, سونداي-اق ولاردىڭ ءومىر ءسۇرۋى مەن ءوز­گەرۋ, دامۋ جول­دارى دا تۇرمىس­پەن, بول­مىسپەن تىكەلەي بايلانىستى. ءبىرىنشى – فولكلور مەن ادە­بيەتتىڭ بىردەي ەمەستىگى. مۇنىڭ سەبەبى, ولاردىڭ پايدا بولۋى مەن ءومىر ءسۇرۋ ءتۇرىنىڭ وزگەشەلىگىندە. بۇل وزگەشەلىك ولاردى زەرتتەۋ ادىستەرىنىڭ ەكى ءتۇرلى بولۋىن تالاپ ەتەدى” /55-ب/ – دەگەن سىندى تۇجىرىمى وسى ويىمىزدىڭ ايعاعى. ءويت­كەنى, قازاق ءتىلى مەن ادەبيەتى ما­ماندىقتارىنا ارنالعان قول­دانىستاعى وقۋلىقتا فولكلور­­دى تەك ءسوز ونەرى, اۋىز ادەبيەتى دەپ تار شەڭبەر اياسىندا ءبىر­جاقتى قاراستىراتىن. كىتاپ فولكلوردىڭ بولمىس-تابيعاتىن, سينكرەتتى, كوپفۋنك­تسيالى قىزمەتىن, ونىڭ بايىرعى دۇنيەتانىم, نانىم-سەنىمدەر­مەن, ونىڭ ىشىندە, توتەميزم, ما­گيا, تابۋ, شاماندىقپەن اس­تاس­قان قىرلارىن اشا كورسەتۋ­مەن باستا­لادى. مۇنان سوڭ فولك­لور­دىڭ ۋليتارلىق قىز­مەتىنە, دالىرەك ايتساق, تۇرمىس­پەن, ادەت-عۇرىپ­پەن كەلەتىن تۇسى, ءسوز ونەرى رەتىن­دەگى قاسيەت­تەرىنە تولىمدى تۇسىنىك بەرىلەدى. فولكلوردى تا­ريحي ۇزاق دامۋ جولدارىن باستان كەشىرگەن قۇ­بىلىس رەتىندە زەر­دەلەيتىن اۆ­تور ونىڭ ءتۇپ-تەگىنە ءۇڭىلىپ, قۇرا­مىندا ىرىمدار مەن عۇرىپتار, تىيىمدار مەن ارباۋ, جالبارى­نۋ تاراۋىنان ءميفتىڭ تۇرلەرى جايىندا تۇششىمدى مالىمەتتەر تابامىز, ادامزاتتىق العىس پەن قارعىستار ارالاسقان كۇيدە كەلۋى, انەركى (ماتريارحات) ءداۋىرىنىڭ كورىنىستەرى, بايىرعى ميفتەر, ەجەلگى ميفتىك كەيىپ­كەرلەر – ىلكى اتا مەن جاسامپاز قاھارمان, توتەم-بابا, كەيىنگى پاتريارحالدى زاماننىڭ ادەت­تەرىنىڭ جاڭعىرىق­تارى تۋرالى وي وربىتەدى. عالىم ساقتار, كونە تۇركىلىك, قازاق حاندىعى تۇسىن­داعى فولكلور­دىڭ دامۋ بارى­سىن ساراپتايدى. ال ءVىىى عاسىر­دان بەرگى فولك­لور­دى جاڭا ءداۋىر­دىڭ جەمىسى رەتىندە بايىپ­تاپ, بۇل مەزگىلدە تۋىن­دا­عان تا­ري­حي جىرلاردىڭ كوپتەپ ساق­تالعانىنا, اقىندار مەن جىر­شى­لاردىڭ, شەشەندەردىڭ ءداس­تۇر­دى ورلەتۋگە قوسقان ۇلەسى­نە, كۇنى بۇگىنگە دەيىنگى ارالىق­تاعى جانر­­لىق جىكتەۋلەر مەن تاقى­رىپ­­تىق تارامدالىپ, فۋنك­تسيو­نالدى ءوز­گەرىس­تەرگە تۇسۋىنە دەن قويادى. كىتاپ­تىڭ قازاق فولك­لو­رىنىڭ جانرلىق قۇرا­مىن سارا­لاعان ميف­تىك سانا, ويلاۋ ساتى­لا­رىن تىلگە تيەك ەتەدى. رۋحاني فولك­­لور­­دىڭ ءداستۇرى باعزى ءداۋىر­­لەردەن باستالاتىن قابات-قىر­تىسى قات­پار­لى بولعان­دىقتان, مۇنداي كوپ­قاباتتاردى ايقىنداۋ قيىن دا كۇردەلى, سول سەبەپتى ەتنوگرا­فيا, ارحەو­لوگيا, تاريح, لينگ­ۆيس­تيكا سالالارىنىڭ ايعاق-دالەلدەمە­لەرى­­نە جۇگىنۋ مەيلىن­شە مول. قۇرالدا فول­كلور­دىڭ قازىر­گى مادە­نيەتپەن, مۋزىكا­مەن, تەاتر­مەن, كينومەن, بەينەلەۋ ونەرى­مەن, تەلەديدار­مەن بايلا­نىسى باياندالادى. ەڭبەكتىڭ ستۋدەنتتەرگە فول­ك­لورتانۋدىڭ ىرگەلى پروب­لە­مالارىن يگەرۋگە سەپتەسەتىن تۇس­تارى – فولكلورلىق جانرلار تەورياسى, فولكلوردىڭ تاريحي تيپولوگياسى, پوەتيكاسى, تەكس­تو­لوگياسى تۋراسىنداعى ءبولىم­دەرى ەكەندىگىن اتاپ وتكەن ءجون. س.قاسقاباسوۆتىڭ عالىم رەتىندە ۇزاق جىلداردان بەرگى كەشەندى زەرتتەۋلەرىنە سۇيەنىپ, حالىق پروزاسىن ىشتەي ميف, حيكايا, ءاپسانا, حيكايات, اڭىز, ەرتەگىلەردى جانۋارلار, قيال-عاجايىپ, باتىرلىق, نوۆەللا­لىق, ساتيرالىق دەگەن جانرلىق تۇرلەرگە ءبولىپ, ولاردىڭ ارقاي­سىنا ءتان بەلگىلەرىن اجىراتادى. ەپيكالىق تۇرلەرگە ارنالعان بولىمدە “قوبىلاندى”, “قوزى كور­پەش-بايان سۇلۋ”, “قىز ءجى­بەك”, “كەنەسارى”, “ايمان-شول­پان”, “ناۋرىزباي-قان­شايىم” جىر­لارى جايلى كەڭى­رەك تال­دانادى. زەرتتەۋشىنىڭ, اسىرەسە, ەپي­­كالىق جانرلار سا­­نا­تىنا “باللادالىق جىر” دەگەن دەربەس ءتۇردى قوسىپ, وعان بۇرىن ليرو-ەپوس, تاريحي جىرلار سانا­­تىندا ءسوز بولىپ جۇرگەن “اي­مان-شول­پان”, “ناۋرىزباي-قان­شايىم”, “ەرنازار-بەكەت” ءتارىز­دى ۇلگىلەردى جاتقىزۋى – جاڭاشا پايىمداۋ. بۇل ەڭبەك سوڭعى الەم, ورىس, قا­زاق عالىم­دارىنىڭ ءتاجىري­بەلەرىن قاپەردە ۇستاي وتىرىپ, دايىن­دالعا­نىمەن ەشكىمدى قاي­تا­لاي­ماي­تىن, فول­كلوردىڭ زاڭ­دى­لىق­­تارىن ايقىن دا وزىندىك جيناق­­تاۋشىلىق ۇستانىم­دارى­مەن قۇندى. جەتپىس بەلەستەن ىجداعاتتى ىزدەنىس ۇستىندە اسقان س.قاسقا­باسوۆ كوپشىلىك الدىندا شىعار­­­ما­شىلىق ەسەپ بەرگەندەي ءوزىنىڭ عىلىمي ەڭبەكتەرىن ءتورت توم ەتىپ باستىرعان. عالىمنىڭ وسى توپ­تا­­مانىڭ جالعاسى ەتىپ ۇسىنعان ء“ويورىس” اتتى كىتابى قازاق ستۋدەنتتەرىنىڭ فولكلور حاقىن­داعى تەوريالىق ۇعىم-تۇسىنىگىن بايىتىپ, وي-ءورىسىن كەڭەيتەتىن, جاڭا ساپا, مازمۇن­داعى تەرەڭ, يگىلىكتى جۇمىس دەپ باعالايمىن. ءشامشادين كەرىم, پروفەسسور. ءبىرتۋار تۇلعا بولمىسى حالىقارالىق “قازاق ءتىلى” قوعا­مى اقتوبە وبلىستىق ۇيى­مى­نىڭ توراعاسى كەمەيدۋللا تولەۋ­باي­ ۇلى­نىڭ قۇراستىرۋى­مەن “شەكتى موڭكە بي تىلەۋ­ ۇلى” دەپ اتالاتىن ەلەۋلى ەڭبەك جارىق كوردى. بۇل سۇبەلى تۋىن­دى — تۋعان حالقى سوزىنە ءسۇيىنىپ, تورەلىگىنە جۇگىنگەن ءبىرتۋار ءموڭ­كە بابانىڭ ەسىمىن جاڭعىر­تۋ, ونىڭ بىرەگەي بولمىسىن كەيىنگى ۇرپاققا تانىتۋ جولىندا جاسالعان بۇكىل­حالىقتىق قىز­مەت­تىڭ حرونيكاسى, تەكتەس تاقى­رىپتىق جاريا­لا­نىم­داردىڭ جىلناماسى. سونى­مەن بىرگە, بۇل كىتاپتى وسىناۋ كۇردەلى ءىستىڭ باسى-قاسىندا بولىپ, تىكەلەي باس­شىلىق جاساعان, كوپتەگەن ۇيىم­داس­تىرۋ شارالارىن شار­شاماي, شالدىق­پاي, وزگەشە ءبىر ىسكەرلىك­پەن اتقارعان قۇراستىرۋ­شى-اۆتور كەمەيدۋللا تولەۋ­باي­ ۇلىنىڭ دا تەڭدەسسىز ەڭبەگى­نىڭ قايتارىمى دەگەن ورىندى بولادى. موڭكە بي مۇرالارىن ەل يگى­لى­گىنە قايتا ورالتۋ ورايىنداعى ءبۇ­كىلحالىقتىق ءىستىڭ شەجىرەسىن حاتتاعان ءھام بولمىسى بولەك بي با­با­مىزدىڭ ەسىمى مەن شى­عار­ما­­شى­لى­عىنا قاتىستى بۇرىنعى-بۇگىنگى جاريالانىمداردىڭ جۇيە­لى تىزبەگىن تۇزگەن كىتاپتىڭ اكادەميالىق ارقاۋىن, تاريحي سانانى جاڭعىرتۋ ەرەكشەلىگىن, عىلىمي اينالىمعا ەنگىزگەن مالىمەت-دەرەكتەرىنىڭ مول ەكەن­دىگىن اتاپ كورسەتكەن ءجون. ورتاق اتاۋمەن شارتتى تۇردە “ۇرپاقتانۋ” سالاسى دەپ جال­پى­لا­ما اتايتىن بولساق, ەكى مىڭىن­­شى جىل­داردان باستالعان موڭكەتانۋ عى­لىمى قازىر جۇيەلى ارناسىنا ءتۇستى. بىرقاتار جاريا­لانىمدار ارقىلى موڭكە ءبيدىڭ قايراتكەرلىگى, بيلىگى, بولجامپاز­دىعى, جىراۋ­لى­عى, ت.ب. تۇلعالىق تۇتاستىعى جۇرت­شى­لىق زەردەسىنە جەتتى. بۇل وراي­­­داعى ىزدەنىستەر باعىتى ءبىر عانا موڭكە ءبيدىڭ ءومىرى مەن شىعارما­شى­لىعى توڭىرەگىندە شەكتەلمەي, ول عۇمىر كەشكەن ءداۋىر­دىڭ, بي با­با­مىز­دىڭ ارعى-بەرگى اتا-بابا­لا­رى­نىڭ تاعى­لىم­دى تاريحىمەن تىعىز بىرلىكتە ورىستەۋ ۇستىندە. موڭكە بي مۇراسىن زەرتتەۋ مەن ناسيحاتتاۋدىڭ ەندىگى باعىت­تارى قانداي بولماق كەرەك؟ ءبىز­دىڭ ويى­مىزشا, موڭكەتانۋ­شىلار الداعى ۋاقىتتا ناق وسى ماسەلە توڭىرەگىنە توپتاسقانى ءجون سياق­تى. موڭكە تىلەۋ ۇلى­نىڭ تاريحي تۇلعاسى, قو­عام­دىق قايراتكەرلىگى, شى­عار­ما­شىلىق قۋاتى جونىندەگى الداعى جا­زىلاتىن جاريالانىم­دار بۇ­رىن­عىداي بايانداۋشىلىق سيپاتىنان گورى تاقىرىپتىق, ءماتىن­دىك تالداپ, سارالاۋ, ءبيدىڭ بەرەكەلى بەرەن ءسوزىن تەرەڭ ءتۇسىن­دىرۋ, تولعانىستى تول­عاۋ­لارىنىڭ قۇدىرەتىن ۇعىندىرۋ ورايىنداعى فيلولوگيالىق-فيلو­سوفيالىق تۇرلاۋلى تۇجىرىمدارعا قاراي باعىت الا باستاۋى كەرەك. جانە دە سول ايتىلعان جايتتەر ونىڭ بول­جامپازدىق قاسيەتىن عانا اسپەت­تەۋمەن شەكتەلمەي, شىعار­ما­شىلىق تۇلعاسى مەن تابيعي تا­لان­تى­­نىڭ قۇبىلىستىق قا­سيە­ت­ىنە, سيۋجەتسىز پوەما ەلە­مەنت­­تەرىن بو­يىنا سىڭىرگەن تول­عاۋ­لارىنىڭ جان-جاقتى, تياناق­تى تارازىلا­نۋى­نا قىزمەت ەتسە دەيمىز. موڭكە بي مۇراسىن كەڭى­نەن تانىتۋدىڭ جاڭا كەزەڭى ەندى باستالدى. مىنە, ءسوز بولىپ وتىر­عان كىتاپتىڭ تۇ­تاس­تاي تا­نىمدىق تاعىلىمى ءبىزدى وسىن­داي وڭدى ويلارعا باستايدى. كى­تاپ وسى سيپاتىمەن قۇندى, وسى ەرەك­شە­لىگىمەن وقشاۋ كورىنەدى. سەرىكقالي بايمەنشە, فيلولوگيا عىلىمدارىنىڭ دوكتورى. ماسكەۋ. جىر تولقىدى الماتىدا الماتىنىڭ تۇرعىندارى تاماشا پوەزيانى اڭساعان ەكەن. تەرەڭ ءسوزدى پارىقتاپ, ءمىنسىز ليريكانى ءپىر تۇتاتىن كوپشىلىك اباي اتىنداعى مەملەكەتتىك اكادەميالىق وپەرا جانە بالەت تەاترىندا اقىن فاريزا وڭعارسىنوۆانىڭ مەرەيتويلىق جىر كەشى وتەدى ەكەن دەگەن حاباردى ەستىگەننەن, ابىر-سابىر بيلەت ىزدەستىرە باستاعا­نىن بىلەمىز. سەنبى كۇنى بيلەت تيمەسە دە, شاقىرۋ الماسا دا بەكزات ونەر ورداسىنا ءبىر كۇنگە كوشىپ كەلگەن ولەڭ پاديشاسىنىڭ پاتشا­لىعىنا باس سۇعۋعا اسىق بولىپ جاتقان­داردى كورۋ عانيبەت ەدى. قازاقتىڭ پوەزياعا قۇشتار بولمىسى تۇرعاندا اقىندارى ەلدىڭ الاقانىندا جۇرە بەرەتىنى اقيقات. بۇل كەشكە اقىندى ىزدەپ اكىم دە, مينيستر دە, ەلىمىزدىڭ اتقامىنەر ازاماتتارى دا كەلدى. وپەرا جانە بالەت تەاترىنا قاراقۇرىم حالىق, قۇشاق-قۇشاق راۋشان گۇلدەرى ەنىپ, جىر كەشىنىڭ شىمىلدىعى ءتۇرىلدى. تەاترلاندىرىلعان كورىنىستەر فاريزا اقىن­نىڭ ولەڭ پاتشالىعىنىڭ ەسىگىن ەركىن, ەشكىمدى قايتالامايتىن ءور داۋىسپەن اشىپ كەلگەن جاستىق شاعىن كورەرمەننىڭ كوز الدىنا اكەلدى. زالدا وتىرعان حالايىق سوناۋ 70-ءشى جىل­دارعا ساياحات شەگىپ, مۇڭىن ماحاببات داس­تان­­دارىنا, شەرىن ومىرگە دەگەن شەكسىز قۇشتار­لىققا اينالدىرا العان وندىردەي جاس اقىن فاريزامەن (اكتريسا نازگۇل قارابالينا) قاۋىشتى. تالانت تەرەزەسى تەڭ تۇرعان فاريزا مەن مۇقاعاليدىڭ سىرلاسۋى ەل اراسىندا ەكەۋارا, اۋىزبەن ايتىلاتىن اڭگىمەلەردىڭ اقيقاتىن ايتىپ, شىندىققا تولى ديالوگتاردىڭ شەتىن تارقاتتى. وسىدان كەيىن اقىن ساحناعا كوتەرىلدى. الدىمەن اقىندى وسى كەشتى ۇيىمداستىرۋعا ۇيىتقى بولىپ جۇرگەن ەلىمىزدىڭ مادەنيەت جانە اقپارات ءمينيسترى مۇحتار قۇل-مۇحاممەد قۇت­تىق­تاپ: ونەرسۇيەر, پوەزيا قادىرلەيتىن قاۋىم! فاريزا اپامىزدىڭ پوەزيادا جاس قاۋىرسىن بولىپ العاش قوسىلعان پەرىشتە كەزى­نەن باستاپ بۇگىنگى قازاق پوەزياسىنىڭ پاديشا­سى­نا اينالعانعا دەيىنگى بۇكىل ومىرىنە, بۇكىل شى­عار­­ماشىلىعىنا ءبىر جا­عى ريزا بولىپ, ءبىر جاعى ەرەكشە سىيلاپ, قادىر­لەپ كەلە جاتقان ءبىر زا­مان­داسى بار. ول – قا­زاق­­ستان رەسپۋب­لي­كا­سى­نىڭ تۇڭعىش پرەزي­دەنتى نۇرسۇلتان ءابىش­ ۇلى نازار­باەۆ! الدىمەن ەل­باسىنىڭ قۇتتىق­تاۋىن وقىپ بەرۋگە رۇق­سات ەتىڭىزدەر, دەپ مەملەكەت باسشىسىنىڭ اماناتىن ورىنداۋعا كىرىستى. – قۇرمەتتى فاريزا مولداسىنقىزى, ءسىزدى ءۇل­كەن مەرەيتويىڭىزبەن شىن جۇرەكتەن قۇتتىق­تايمىن! ءسىز ۇلتتىق پوەزيامىزداعى وزىندىك دارا داۋىسىڭىزبەن ەرتە تانىلعان دارا تالانتتاردىڭ ءبىرىسىز. نازىك تە سىرشىل, وتكىر دە ءورشىل ليريكاڭىزبەن بىردەن-اق ولەڭسۇيەر قاۋىمنىڭ ىستىق ىقىلاسىنا بولەندىڭىز. حالقىڭىز ءسىزدىڭ وتتى دا جىگەرلى پوەزياڭىزدان ءاردايىم سۋسىنداپ, ءاردايىم رۋحاني قۋات الىپ كەلەدى. ءىزباسار­لارىڭىزدىڭ اراسىنان دارىندى اقىندار شىقتى. ءسىز سونداي-اق, تاماشا جۋرناليست, بىلىكتى ۇجىم جەتەكشىسى رەتىندە دە كوپ ىستەر تىندىردىڭىز. پارلامەنت دەپۋتاتى بولىپ سايلانىپ, ەلىمىزدىڭ قۇقىقتىق مەملەكەت اتانۋىنا ۇلكەن ۇلەس قوستىڭىز. وسىنداي سان-سالالى قىزمەتىڭىزبەن, قابىرعالى ىستەرىڭىزبەن حالقىڭىزدىڭ لايىقتى قۇرمەت-قوشەمەتىنە يە بولدىڭىز. ەڭبەكتەرىڭىز جوعارى مەملەكەتتىك ناگرادالارمەن اتاپ ءوتىلدى. وسىنىڭ ءبارى اقىن-ازامات ءۇشىن ۇلكەن مارتەبە, زور باقىت. باقىتى­ڭىز باياندى, دەنساۋلىعىڭىز مىقتى بولىپ, حالقىڭىزدىڭ وزىڭىزگە دەگەن شەكسىز ماحابباتى­نا بولەنە بەرىڭىز! – دەپتى قۇتتىقتاۋ حاتىندا مەملەكەت باسشىسى. وسىدان كەيىن فاريزا وڭعارسىنوۆانىڭ سوزىنە جازىلعان اندەرگە كەزەك بەرىلدى. فاريزا اقىنعا قالام ۇستاعان شىعارما­شى­لىق قاۋىم اتىنان قازاقستان جازۋشىلار وداعىنىڭ توراعاسى, اقىن نۇرلان ورازالين ءسوز ارنادى. اقىن جانىن اقىننان ارتىق كىم تۇسىنەر؟! نۇرلان مىرقاسىم ۇلى قاشاندا وزىنە ءتان سۇلۋ ءسوزدىڭ كومبەسىمەن كوپشىلىكتىڭ كوڭىلىندەگى ورتاق ويدى قوزعادى. – ...سوناۋ ءبىر جىلدارى “لەنينشىل جاس” گازەتىندەگى “مەن ساعان عاشىق ەمەس ەم...” دەيتىن جالىندى جىرلارىمەن جۇرتتى وزىنە جالت قاراتىپ, پوەزياعا ادۋىندى مىنەزىڭىزبەن, ادەمى سۇلۋ جىرىڭىزبەن كەلىپ ەدىڭىز.., – دەگەن نۇر­لان اقىننىڭ ءسوزىن تىڭداي وتىرىپ, فاريزا شابىتتى كۇندەردىڭ ەستەلىگىنە شومىلىپ وتىر­عان­داي اسەر قالدىردى. ءوزىنىڭ جىر كەشىندە فاريزا وڭعارسىنوۆا ءار كەزدەرى جازىلعان جىرلارىن وقىدى. ع.ەسى­موۆ, ن.ءنۇسىپجانوۆ, م.ءجۇنىسوۆا, ە.ءابدى­حالىقوۆا, ج.جەكسەن ۇلى, ت.دوسىموۆ, گ.اقۇر­پەكوۆا سياقتى ونەر قايراتكەرلەرى مەن ەسترادا جۇلدىزدارىنىڭ ورىنداۋىندا اقىننىڭ سوزىنە جازىلعان تانىمال اندەر شىرقالدى. ايناش ەسالي, الماتى.