بۇل تۋرالى بۇگىن وكق-دا وتكەن بريفينگە قر بعم جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى گۇلزات كوبەنوۆا مالىمدەدى.
«كەلەسى اپتادا مينيسترلىك «التىن بەلگى» يەگەرلەرى ۇلتتىق بىرىڭعاي تەستىلەۋدەن از بالل الىپ قالعان مەكتەپتەردى تەكسەرۋدى باستاپ كەتەدى. مەكتەپ بىتىرۋشىلەر ءۇشىن بۇل تەكسەرىس ەشقانداي زيانىن تيگىزبەيدى. الايدا زاڭسىزدىق انىقتالىپ جاتسا, مەكتەپ باسشىلىعى قاتاڭ تۇردە جازالانادى», - دەيدى گۇلزات كوبەنوۆا.
بۇدان بۇرىن حابارلانعانداي, ەلىمىزدە «التىن بەلگى» يەگەرلەرىنە قوسىمشا 1487 گرانت بولىنەتىن بولادى. ال جيىندا كەلتىرىلگەن مالىمەتتەرگە سۇيەنسەك, بيىلعى جىلى وقۋ گرانتىن ءبولۋ بايقاۋىنا 4360 «التىن بەلگى» يەگەرى قاتىسقان.
«وزگە ابيتۋريەنتتەر جوعارى بالل الىپ كەتكەندىكتەن, اتالعان 1487 بالا نەگىزگى تىزىمنەن شىعىپ قالعان. سايكەسىنشە, 1487 بالا قر بعم مەن دەنساۋلىق ساقتاۋ مينيسترلىگىنىڭ قارجىسى ەسەبىنەن وقۋعا تۇسەتىن بولادى», دەيدى گۇلزات كوبەنوۆا.
