ماسەلەن, ءار ۇيدەن ون شاقتى بالا-شاعا وربىتكەن, كەڭەس وكىمەتى كەزىندە «پراۆدا» گازەتىنىڭ ءتىلشىسى ىزدەپ كەلىپ ماقالا جازعان اقتاس اۋىلىنداعى ادامداردىڭ ايرانداي ۇيىعان بىرلىگىن كورىپ قىزىعاسىز.
بۇل اۋىل وبلىس بويىنشا ءالى دە كوپبالالى بولۋىمەن ەرەكشەلەنەدى.
ات جالىن تارتىپ ءمىنىپ, ازامات بولعان سوڭ قالاعا وقۋ, ءبىلىم ىزدەپ كەتكەنى كەتتى, ال قالعاندارىنا جەكە شاڭىراق كوتەرۋ ءۇشىن ءۇي كەرەك. مۇندايدا بۇل اۋىلدا اسارعا اۋىلداستارىن شاقىرادى. قالادا عوي, ومىردەن وتكەنىنشە ەسىكپە-ەسىك وتىرعان قۇدايى كورشىسىنىڭ نىسپىسىن بىلمەي كەتەتىنى. ال بىرلىگى بەكەم بۇل اۋىلدىڭ ءجونى بولەك. اسارعا شاقىرىلعان ازاماتتار ارا, بالتا, كۇرەك سياقتى قۇرال-سايماندارىن ارقالاپ وزدەرى جەتەدى. ويتكەنى, بۇل ازاماتتاردىڭ كۇنى ەرتەڭ وزىنە كەرەك بولعاندا جانىنان تابىلارىن بىلەدى.
باتىر انا جۇماگۇل ابىلداەۆا مۇنىڭ سەبەبىن اۋىل ادامدارىنىڭ قازاقى باۋىرمالدىقتى, قينالعانعا قولۇشىن بەرەتىن جاقسى داستۇرلەرىمىزدى ساقتاپ قالعاندىعىمەن تۇسىندىرەدى.
– بالالار جەتىلدى, الدى ءۇي بولىپ جاتىر. تاۋبە, نەمەرەلەر كوبەيىپ كەلەدى, ولارعا بولمە كەرەك. سوندىقتان, ەسكى ءۇيى-
ءمىزدى بۇزىپ, اسارلاتىپ ۇلكەن ءۇي تۇرعىزىپ جاتىرمىز. تاۋ بەتكەيىندە تۇرعان سوڭ بىزگە قىس ەرتە تۇسەدى. سوندىقتان كۇزدىڭ العاشقى ايلارىنا جەتكىزبەي ءبىتىرىپ الامىز. ءبىزدىڭ اۋىلدىڭ ادامدارىندا الگى بۇرىننان ايتىلاتىنداي ۇيىنە كەلگەن قوناققا قويىن سويىپ كۇتىپ, جالعىز اتىن جەتەكتەتىپ جىبەرەتىن ۇلتىمىزدىڭ ساقىلىق مىنەزى ساقتالعان. ەشكىم ەشكىمگە مىندەتسىنبەي ءازىل ايتىپ ءجۇرىپ, ءبىر قازاننان اس ءىشىپ ءجۇرىپ دەمدە ءبىتىرىپ تاستايدى. باتىر انا وسىلاي دەيدى. بۇل اۋىلدىڭ ۇيىمشىلدىعى تەك اسارلاتىپ ءۇي سالۋمەن بىتپەيدى ەكەن. كورشى قوشقاراتا اۋىلىنىڭ ازاماتتارىمەن ۇجىمداسا مال ازىعىن دايىنداپ جاتىر. ەرتەڭ قىلىشىن سۇيرەتىپ «كارى قۇدا» كەلگەندە, قولعا قاراعان مالعا كوكتەمگە دەيىن جەتەتىن جەم-ءشوپ كەرەك.
اۋىل اقساقالى ورالبەك يماناليەۆ قاريا ەكپە جوڭىشقانى تولىق ورىپ بىتكەندەرىن ايتادى. ەندى تابيعي ءشوپ دايىندالىپ جاتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
