سۋرەتتى تۇسىرگەن: ابزال قاليەۆ
كورپوراتسيا قىزمەتكەرلەرى بۇقارالىق اقپارات قۇرالدارىن ەڭ اۋەلى «1414» بىرىڭعاي بايلانىس ورتالىعىنىڭ جۇمىسىمەن تانىستىردى. ورتالىق باسشىسى انار ۋلمانوۆانىڭ سوزىنە سۇيەنسەك, كۇنىگە ءار قىزمەتكەر 200-گە جۋىق قوڭىراۋعا جاۋاپ بەرەدى ەكەن. قازىرگى تاڭدا call-ورتالىق تاۋلىك بويى جۇمىس ىستەيدى. كۇنىنە «1414» قىزمەتىنە 15 مىڭنان استام ادام جۇگىنسە, تۇنگى مەزگىلدە ورتا ەسەپپەن 500-دەي قوڭىراۋ تۇسەدى.
ا.ۋلمانوۆانىڭ ايتۋىنشا, «1414» قىزمەتىنە جۇگىنەتىندەر كوبەيگەندىكتەن, call-ورتالىققا حابارلاسۋ كۇننەن كۇنگە قيىنداپ كەلەدى. وسىعان بايلانىستى الداعى ۋاقىتتا ورتالىقتا جاڭارتۋ جۇمىستارى جۇرگىزىلمەك.
«ازاماتتارعا ارنالعان ۇكىمەتتىڭ» تاعى ءبىر ەرەكشەلىگى ‒ مۇندا مۇمكىندىگى شەكتەۋلى جانداردىڭ جۇمىس ىستەۋىنە جاعداي جاسالعان. بۇگىندە كورپوراتسيادا 470 مۇمكىندىگى شەكتەۋلى ادام جۇمىس ىستەيدى. ال «1414» بايلانىس ورتالىعىندا ولاردىڭ سانى 11 ەكەن. ولاردى جۇمىسقا اكەلۋ, ۇيىنە اپارىپ سالۋ ورتالىقتىڭ مىندەتىندە.
Call-ورتالىقتىڭ قىزمەتى جاقسارعانىن ءارى تانىمالدىعى ارتقانىن مىنادان دا بايقاۋعا بولادى. بيىل «1414»-كە 2 ميلليوننان استام قوڭىراۋ كەلىپ تۇسكەن. ال 2016 جىلى حابارلاسقاندار سانى 3,5 ميلليونعا جۋىق بولعان ەكەن. ورتالىق باسشىلىعىنىڭ ايتۋىنشا, قوڭىراۋعا جاۋاپ بەرۋگە مىندەتتى قىزمەتكەرلەردىڭ بارىنە ترەنينگتەر ۇيىمداستىرىلىپ تۇرادى. ولارمەن مەكەمەنىڭ ارنايى پسيحولوگى جۇمىس ىستەيدى.
سودان كەيىن بۇقارالىق اقپارات قۇرالدارى وكىلدەرى مەن بلوگەرلەر استانا قالاسىنداعى حالىققا قىزمەت كورسەتۋ ورتالىعىنا بارىپ, جۇمىس بارىسىمەن تانىستى. كورپوراتسيا باسشىلىعى قازىرگى تاڭدا حقو-دا كەزەك كۇتۋ ۋاقىتى ازايعانىن, ادامدار ءارى كەتسە 15 مينۋت كۇتەتىندىگىن جەتكىزدى. مۇنى تەكسەرىپ كورۋ ءۇشىن ورتالىق قىزمەتىنە جۇگىنىپ كورگەن ەدىك. ون مينۋت وتپەي-اق كەزەگىمىز كەلدى. بۇرىنعىداي ۇزىن-سونار كەزەك جوقتىڭ قاسى. حقو-داعى كەلەسى جاڭاشىلدىق ‒ قىزمەت الۋ جەڭىلدەتىلگەن. بۇعان دەيىن ەتسق مىندەتتى بولسا, ەندىگى جەردە ۇيالى تەلەفون ارقىلى كەرەكتى قۇجاتقا قول جەتكىزۋگە مۇمكىندىك بار.
«ازاماتتارعا ارنالعان ۇكىمەتتىڭ» 70 شۇعىل توبى تۇراقتى تۇردە شالعاي ايماقتارعا بارىپ حالىققا كەرەكتى قىزمەت كورسەتەدى. كورپوراتسيا باسقارما توراعاسىنىڭ ورىنباسارى اسەمگۇل بالتاشەۆا الداعى ۋاقىتتا شۇعىل توپتىڭ سانىن كوبەيتۋدى كوزدەيتىنىن جەتكىزدى. سونىمەن قاتار, كورپوراتسيا الداعى ۋاقىتتا «قازپوشتا» كومپانياسىمەن بىرلەسىپ, شالعاي اۋىلداردا حقو قىزمەتتەرىن ۇسىنۋدى جوسپارلاپ وتىر.
تانىستىرۋ جۇمىستارى بارىسىندا اقپارات جانە كوممۋنيكاتسيالار ءمينيسترى داۋرەن اباەۆتىڭ قاتىسۋىمەن ءباسپاسوز جيىنى ءوتتى. وندا حالىققا قىزمەت كورسەتۋ ورتالىقتارىنا قاتىستى بىرقاتار ماسەلەلەر تالقىلاندى.
اقپارات جانە كوممۋنيكاتسيالار ءمينيسترى داۋرەن اباەۆتىڭ پىكىرىنشە, حالىققا قىزمەت كورسەتۋ ورتالىعىنداعى كەزەكتىڭ تۋىنداۋىنا اقپاراتتىق جۇيەدەگى اقاۋ سەبەپ بولادى. مينيستر بۇل ماسەلەنىڭ جىل سوڭىنا دەيىن شەشىلەتىنىن مالىمدەدى. ونىڭ ايتۋىنشا, اقاۋدىڭ كەسىرىنەن بيىل اقپاراتتىق جۇيەدە 35 ساعاتتىق ىركىلىس بولعان. سونىمەن قاتار, داۋرەن اباەۆ كەلەشەكتە سەنىم تەلەفوندارىنىڭ ءبارىن بىرىكتىرىپ, ونى «1414» ورتالىعىنا تاپسىرۋعا نيەتتى ەكەنىن جەتكىزدى. بۇل جوبا كەلەسى جىلى جۇزەگە اسادى.
«حقو-داعى كەزەك «ازاماتتارعا ارنالعان ۇكىمەت» مەكەمەسىنىڭ نەمەسە ونىڭ قىزمەتكەرلەرىنىڭ كەمشىلىگى ەمەس. ماسەلە اقپاراتتىق جۇيەنىڭ دۇرىس جۇمىس ىستەمەۋىنەن تۋىندايدى. ونى ءاردايىم جاڭالاپ وتىرۋ كەرەك. ونىڭ ۇستىنە, بىردە-ءبىر اقپاراتتىق جۇيە «ازاماتتارعا ارنالعان ۇكىمەتكە» تىكەلەي تيەسىلى ەمەس», دەدى داۋرەن اباەۆ جۋرناليستەرمەن كەزدەسۋىندە.
سونىمەن قاتار, مينيستر حالىققا قىزمەت كورسەتۋ ورتالىقتارى قىزمەتكەرلەرىنىڭ جالاقىسىن كوتەرۋ جونىندەگى ۇسىنىستى قولدايتىنىن جەتكىزدى. «وكىنىشكە قاراي, حقو قىزمەتكەرلەرىنىڭ جالاقىسى جوعارى ەمەس. مۇنى ۇكىمەت دەڭگەيىندە شەشۋ كەرەك. قازىر وسى ماسەلە بويىنشا جۇمىستار اتقارىلىپ جاتىر», دەدى داۋرەن اباەۆ.
بۇگىندە ەلىمىزدە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ 349 فرونت-كەڭسەسى جانە 637 بەك-كەڭسەسى بار. فرونت-كەڭسەدە قىزمەت الۋ ءدال سول ساتتە, مەكەمە ىشىندە جۇرگىزىلەدى. بەك-كەڭسەدە ۇسىنىلعان قىزمەت قولدانۋشى نازارىنان تىس جاعدايدا وتەدى. كورپوراتسيادا جالپى 22 مىڭعا جۋىق قىزمەتكەر جۇمىس ىستەيدى. بىلتىر مەكەمە كورسەتكەن قىزمەتتەردىڭ سانى 37 ميلليوننان اسىپ ءتۇسىپتى. سولاردىڭ 24,5 ميلليونى ەلەكتروندى تۇردە كورسەتىلگەن.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلاي وسپانوۆتىڭ ايتۋىنشا, ەلوردادا شەتەلدىكتەردى تىركەيتىن ارنايى حالىققا قىزمەت كورسەتۋ ورتالىعىن اشۋ جوسپاردا بار. سونداي-اق, اۆتوكولىكتەرگە ارنالعان تاعى ءبىر قىزمەت كورسەتۋ ورتالىعى ىسكە قوسىلادى.
ء«وز ۇسىنىستارىمىزدى ىشكى ىستەر مينيسترلىگىنە جىبەردىك. قازىرگە دەيىن كەلىسسوزدەر جۇرگىزىپ, ورتالىق ورنالاساتىن عيماراتتاردى تاڭدادىق. قىزمەتتى ءبولىسۋ ماسەلەسى الداعى ۋاقىتتا انىقتالادى», دەدى ابىلاي وسپانوۆ.
اباي اسانكەلدى ۇلى,
«ەگەمەن قازاقستان»
