بۇۇ باس حاتشىسى پان گي مۋننىڭ «يادروcىز الەم ءۇشىن» حالىقارالىق فورۋمىنا قاتىسۋشىلارعا
جولداۋى
نيۋ-يورك, 2011 جىلعى 12 قازان جوعارى مارتەبەلى نۇرسۇلتان نازارباەۆ, قۇرمەتتى مينيسترلەر, قۇرمەتتى قوناقتار, حانىمدار مەن مىرزالار! ەڭ الدىمەن پرەزيدەنت نازارباەۆقا ءوزىمنىڭ العىسىمدى بىلدىرۋگە رۇقسات ەتىڭىزدەر. بۇل باسقوسۋ قازاقستان باسشىسىنىڭ الەمدىك يادرولىق قارۋسىزدانۋ سالاسىنداعى كوشباسشىلىعىنىڭ تاعى ءبىر مىسالى بولىپ تابىلادى. جوعارى مارتەبەلىلەر جانە قۇرمەتتى قوناقتار! ءوزىمنىڭ بىلتىرعى جىلعى سەمەيگە بارعان ساپارىمدى ەشقاشان ۇمىتپايمىن. بۇل جەر ونداعان جىلدار بويى «قىرعي-قاباق سوعىستىڭ» ەپيتسەنترى بولدى. ءسىزدىڭ 20 جىل بۇرىن قابىلداعان باتىل شەشىمىڭىزدىڭ ارقاسىندا عانا سەمەي جەرىندە ءۇمىتتىڭ وتى مازدادى. جانە بۇل مىسال بارلىق يادرولىق سىناقتاردىڭ تۇپكىلىكتى اياقتالۋدىڭ ۇمىتىنە اينالدى. ول الەمدى يادرولىق قارۋدان ازات ەتۋ ءۇمىتىن وياتتى. وسىدان ءۇش جىل بۇرىن مەن يادرولىق قارۋسىزدانۋ مەن تاراتپاۋ بويىنشا بەس تارماقتان تۇراتىن جوسپار ۇسىندىم. قازىر وعان دەگەن تالپىنىس بۇكىل الەم شەڭبەرىندە ورىستەپ كەلەدى. بۇل ىستە بيلىك پەن ازاماتتىق قوعام توپتارى ءوزارا ۇيلەسىمدى جۇمىس اتقارۋدا. ءبىز بۇل جۇمىستى ودان ءارى جالعاستىرۋىمىز قاجەت. يادرولىق قارۋدىڭ جانتۇرشىگەرلىك قاۋپىن ءبارىمىز بىلەمىز. قاۋىپ-قاتەردەن ساقتانۋ ءۇشىن قارۋدى جويۋ كەرەك ەكەنىن دە بىلەمىز. ىلگەرىلەۋشىلىككە قول جەتكىزۋ – جاھاندىق ىنتىماقتاستىققا بايلانىستى. وسى ورايدا استانا فورۋمى شەشۋشى مانگە يە بولار دەگەن ۇمىتتەمىن. مەن ونىڭ جالعاسىن تاپقانىن قالايمىن جانە ءوز تاراپىمنان تولىق قولداۋ كورسەتەتىنىمدى بىلدىرەمىن. ءبارىمىز بىرگە كەلەشەك ۇرپاق ءۇشىن يادرولىق قارۋ-جاراقتان ازات الەمگە قاراي وتەيىك. ____________________اقش پرەزيدەنتى باراك وبامانىڭ «يادروسىز الەم ءۇشىن» اتتى استانا فورۋمىنا قاتىسۋشىلارعا
جولداۋى
ۆاشينگتون, اق ءۇي, 2011 جىلعى 10 قازان يادرولىق قارۋسىز الەم ءۇشىن حالىقارالىق كونفەرەنتسيانىڭ بارلىق قاتىسۋشىلارىنىڭ جۇمىستارىنا ساتتىلىك تىلەيمىن. سەمەي يادرولىق سىناق پوليگونىنىڭ جابىلۋىنا 20 جىل تولۋىنا وراي قازاقستان رەسپۋبليكاسىنا جانە پرەزيدەنت نۇرسۇلتان نازارباەۆقا بولاشاق يادرولىق قارۋدى ازايتۋ جانە تاراتپاۋ ءىسىنىڭ نەگىزىن قالاۋعا كومەكتەسكەن وسىنداي تاريحي شەشىمدى قابىلداعانى ءۇشىن ءوز ريزاشىلىعىمدى بىلدىرەمىن. بۇل ءراسىم – يادرولىق قارۋ سىناقتارىن وتكىزۋدى توقتاتۋ الەم قاۋىمداستىعى ءۇشىن ەڭ نەگىزگى باسىمدىق رەتىندە قالا بەرۋگە مىندەتتى ەكەندىگىن ەستەرىمىزگە سالادى. امەريكا قۇراما شتاتتارى مەن قازاقستان جيىرما جىلعا جۋىق ۋاقىت بويى بيولوگيالىق قارۋدان قورعانۋ جانە ونى جويۋ ءۇشىن بىرلەسىپ جۇمىس اتقارىپ كەلدى. ءبىزدىڭ ىنتىماقتاستىعىمىز ەلدەرىمىزدىڭ ورتاق جاۋاپكەرشىلىكتى قابىلداۋعا جانە ورتاق پروبلەماعا توتەپ بەرۋدە بىرىگۋدىڭ ايعاعى بولىپ تابىلادى. وسىنداي دارەجەدەگى ىنتىماقتاستىق بيىلعى جەلتوقساندا بولاتىن «بيولوگيالىق جانە توكسيندىك قارۋلار بويىنشا كونۆەنتسيانىڭ» 7-ءشى شولۋ كونفەرەنتسياسى بارىسىندا كورسەتىلەتىنىنە ءۇمىت ارتامىن. قازاقستان ۇزاق ۋاقىت بويى يادرولىق قارۋدى تاراتپاۋ مەن يادرولىق قاۋىپسىزدىك سالاسىنىڭ ليدەرى جانە امەريكا قۇراما شتاتتارىنىڭ دوسى بولىپ كەلەدى. وسى سالاداعى بىرلەسكەن جوبالارىمىزدىڭ جالعاسۋىن اسىعا كۇتەمىن.
