فوتو: جي كومەگىمەن جاسالعان
16 اقپانداعى مەدال سانىنا كوز جۇگىرتسەك, نورۆەگيا التىن مەن جالپى جۇلدە ەسەبىندە كوش باستاپ تۇر. اتالعان ەل قورجىنىندا – 12 التىن, 7 كۇمىس, 7 قولا مەدال بار.
جارىس قوجايىندارى يتاليا سپورتشىلارى نورۆەگيالىقتاردى وكشەلەپ كەلەدى. باسەكەنى ۇيىمداستىرۋشى تاراپتىڭ جالپى جۇلدە سانى – 22. ونىڭ ىشىندە – 8-ءى التىن, 4-ءى كۇمىس, 10-ى قولا مەدال.
ۇزدىك ۇشتىكتى جالپى جيىنىن 17 مەدالمەن اقش تۇيىندەپ تۇر. اتالعان ەل سپورتشىلارى بۇگىنگە دەيىن 5 التىن, 8 كۇمىس, 4 قولا ەنشىلەگەن.
كەيىنگى ءتورتىنشى جانە بەسىنشى ورىندارعا بەس التىنمەن نيدەرلاندى جانە شۆەتسيا جايعاسقان. شۆەتسيا نيدەرلاندىعا 1 كۇمىس مەدال ايىرماسى بويىنشا جول بەرىپ تۇر.
بۇگىنگى مەدال ەسەبىنە ساي قازاقستان جالپىكوماندالىق رەتتە مانەرلەپ سىرعاناۋشى ميحايل شايدوروۆتىڭ تاريحي التىن جۇلدەسىمەن 17-ءشى ورىنعا جايعاسقان. 32 جىل كۇتكەن جۇلدەگە تاعى مەدالدەر قوسىلا ما؟ ەندىگى جەردە قاي سپورتشىلاردىڭ جولىنا ۇمىتپەن قاراۋعا بولاتىنىن سپورت ساراپشىسى مەيرام ساپارعالي ۇلى ايتىپ بەردى.
«مانەرلەپ سىرعاناۋدان قۇراما كوشباسشىسى ميحايل شايدوروۆتان حالىق بولىپ جۇلدە كۇتكەنىمىز انىق. ول ءوز كەزەگىندە ەل سەنىمىن ارتىعىمەن اقتادى. شايدوروۆتان جۇلدە كۇتۋىمىز نەگىزسىز بولعان جوق. ويتكەنى مانەرلەپ سىرعاناۋشى وسى وليمپيادالىق تسيكلدە جارقىن جەڭىستەرىمەن كوزگە ءتۇسىپ ءجۇردى. سول سەكىلدى شورت-ترەكشىلەر دەنيس نيكيشا مەن ابزال اجىعاليەۆكە دە ارتار سەنىم مول. قوس سپورتشى 2025 جىلعى ازيا ويىندارىندا 5000 مەتر ەستافەتاسىندا التىن ەنشىلەسە, بۇگىنگى جارىس كەستەسىندە تۇرعان 500 مەتر قاشىقتىقتا 2024 جانە 2025 جىلدارداعى الەم بىرىنشىلىگىندە كۇمىس جۇلدەگە قول جەتكىزدى. ەندى شورت-ترەكشىلەر اتالعان جەڭىستىڭ كەزدەيسوق ەمەس ەكەنىن يتالياداعى ءدۇبىرلى دودادا دالەلدەي ءتۇسۋى ءتيىس.
1500 مەتر قاشىقتىقتا كونكيمەن جۇگىرۋدەن تاجىريبەلى سپورتشى نادەجدا موروزوۆا دا قورجىنعا جۇلدە سالۋى ىقتيمال. ول يتالياداعى قىسقى وليمپيادانىڭ وزىندە 5000 جانە 3000 مەتر قاشىقتىقتا ۇزدىك وندىققا ەندى. سونداي-اق 17 اقپان كۇنى مۇزعا شىعاتىن مانەرلەپ سىرعاناۋشى سوفيا سامودەلكينانىڭ دا جۇلدە سانىن ەسەلەي تۇسۋگە قاۋقارى جەتەدى», دەيدى مەيرام ساپارعالي ۇلى.
ساراپشىنىڭ پىكىرىنشە, ءدۇبىرلى دودالارداعى تاجىريبە مەن شىڭدالۋدىڭ ءوزى – قوماقتى ولجا. سوندىقتان كەي سپورت تۇرلەرى بويىنشا وسى جولى مايتالمان سپورتشىلارمەن يىق تىرەستىرە سىنعا ءتۇسۋ, تاجىريبە جيناۋ ماڭىزدى. بۇل مۇمكىندىكتى شەبەر پايدالانۋ الداعى ۋاقىتتا جەڭىسكە جول اشارى انىق. مەيرام ساپارعالي ۇلى بۇل رەتتە تاۋ شاڭعىسى بويىنشا ەل نامىسىن قورعاپ جاتقان 20 جاسار الەكساندرا سكوروحودوۆا مەن شاڭعىمەن تۇعىردان سەكىرۋشى يليا ميزەرنىحتىڭ ونەرىن جوعارى باعالاپ, بولاشاعىنان زور ءۇمىت كۇتتىرەتىنىن اتاپ ءوتتى.
«الەكساندرا سكوروحودوۆا تاۋ شاڭعىسىنىڭ سۋپەر گيگانت باعدارلاماسى بويىنشا تاباندىلىق تانىتتى. اۋا رايىنىڭ قولايسىزدىعىنا قاراماستان مارە سىزىعىن كەسىپ ءوتتى. وسى سىندا 7 وليمپيادا چەمپيونى مەن 1 الەم چەمپيونىنىڭ مارەگە جەتە الماعانىن ەسكەرسەك, سكوروحودوۆانىڭ تاباندىلىعى سۇيسىنتەدى. مۇنداي قاجىرلى مىنەز كەلەشەكتە جەڭىس تۇعىرىنان كورىنۋگە دە سەپتەسەدى. ال 19 جاستاعى يليا ميزەرنىح قىسقى وليمپيادانىڭ ءبىرىنشى ىرىكتەۋىندە تۇعىردان سەكىرۋدەن قازاقستان تاريحىندا ەڭ ۇزدىك ناتيجەنى تىركەپ ۇلگەردى. ول 140,5 مەترگە سەكىرىپ, 137 بالل ەنشىلەدى. كورسەتكىشى كوڭىل كونشىتتى. جاس مولشەرىنە قاراماستان جاھاندىق جارىستا توسىلماعان وتانداسىمىزعا بۇل باسەكەلەر جوعارى تاجىريبە جيناقتاپ, الداعى وليمپيادالاردا جۇلدەگە قول سوزۋىنا مۇمكىندىك بەرەدى», دەپ اتاپ ءوتتى ساراپشى.
ايتا كەتەيىك, يتاليا تورىندە ەل نامىسىن 10 سپورت تۇرىنەن 36 اتلەت قورعاپ جاتىر. ارينە, قىسقى سپورت تۇرلەرىنىڭ ناتيجەسىنە كەي تۇستا اۋا رايى مەن جارىس جولى اسەر ەتىپ جاتادى. سوندىقتان ەندىگى جەردە جارىس جولىنا شىعاتىن بارلىق وتانداسىمىزدىڭ جۇلدەگە تالاسى بارى انىق.
