وڭىردەگى كيەلى ورىنداردىڭ ءبىرى – بەرەلدەگى پاتشالار جازىعى. مامىر ايىندا پروفەسسور زەينوللا ساماشەۆ س.امانجولوۆ اتىنداعى شقمۋ-دىڭ تاريح فاكۋلتەتى ستۋدەنتتەرىمەن بىرگە №5 قورىمدى قازىپ باستاعان بولاتىن. مۇندا اقسۇيەك ايەلدىڭ جەرلەنگەنى بەلگىلى بولىپ وتىر. مۇردەمەن بىرگە جەتكەن التىن اشەكەيلەر, قىمبات توننىڭ قيقىمدارى, ساۋكەلە بولىكتەرى, قانجار مەن بەلدىك قابىر يەسىنىڭ جاۋىنگەر بولعانىن كورسەتەدى.
وبلىس اكىمى دانيال احمەتوۆ قورىمنىڭ باسىندا بولىپ, زەينوللا ساماشەۆپەن بىرگە قابىرگە ءتۇسىپ, تابىلعان اشەكەيلەردەگى جانۋارلاردىڭ كەسكىنىن كوزبەن كوردى.
«بۇل كيەلى ورىن. وسى اۋماقتىڭ تابيعاتى دا ادامدى تامساندىرىپ, شابىت سىيلايدى. پاتشالار جازىعى اتالۋى دا تەگىن ەمەس. كورگەن دۇنيەلەر ماقتانىش سەزىمىن وياتادى. بۇعان دەيىن ءبىزدىڭ بابالارىمىزدى كوشىپ-قونۋدان باسقانى بىلمەگەن حالىق دەپ كەلدى. ال تابىلعان جادىگەرلەر بۇل جەردە التىندى اسقان ەپتىلىكپەن وڭدەيتىن وزىق تەحنولوگيا بولعانىن اڭعارتادى. مۇنداي تۋىندىلاردى دۇنيەگە اكەلۋ ءۇشىن كەنت نەمەسە وندىرىستىك ورتالىق قاجەت. ياعني, قازاق دالاسىندا وسىنداي ورىندار بولعان. ارحەولوگتارعا سونى تابۋ قاجەت», دەيدى دانيال احمەتوۆ.
بەرەل قورىمىنان تابىلعان جادىگەرلەردىڭ تاريحي ءمان-ماڭىزى جونىندەگى تولىق مالىمەتتى زەينوللا ساماشەۆ قىركۇيەك ايىنىڭ باسىندا وسكەمەن قالاسىندا وتەتىن حالىقارالىق كونفەرەنتسيادا جاريالايدى, دەپ حابارلادى وبلىس اكىمىنىڭ ءباسپاسوز قىزمەتى.
راۋشان نۇعمانبەكوۆا
سەمەي
