ءداستۇرلى دەيتىنىمىز, جاس ۆەلوشاباندوزداردىڭ باسىن قوساتىن جارىس بيىل شىعىس قازاقستاندا وسىمەن 17-ءىنشى مارتە ۇيىمداستىرىلىپ وتىر. ءبىلىم جانە عىلىم مينيسترلىگى, ۆەلوسپورت فەدەراتسياسى مەن وبلىستىق ءبىلىم باسقارماسىنىڭ مۇرىندىق بولۋىمەن جالاۋى جەلبىرەگەن سايىسقا وزبەكستان مەملەكەتىنەن ەكى, ەلىمىزدىڭ ءار ايماعىنان 16 كوماندا, ۇزىن سانى 134 سپورتشى قاتىسىپ, ءدۇبىرلى دودانىڭ كورىگىن قىزدىرۋدا. «حالىقارالىق دەڭگەيدەگى جارىسقا قاتىسىپ كەلە جاتقانىمىزعا 16 جىل بولدى. شىعىس قازاقستاننىڭ تاۋلى تابيعاتى سپورتتىڭ بۇل تۇرىنە وتە قولايلى. وسى جولى ءبىز 11 جۇيرىگىمىزدى باپتاپ الىپ كەلدىك. ولار – ءبىزدىڭ ەلدىڭ چەمپيوندارى. ارينە, جۇلدەلى ورىندار ءۇشىن تالاسقا تۇسەمىز. بۇل ۆەلوبايگە كەلەسى جىلى وتەتىن ازيا چەمپيوناتىنا ىرىكتەۋ دەسەك تە بولادى», دەدى كوپكۇندىكتىڭ اشىلۋ سالتاناتىندا ءسوز العان وزبەكستان قۇراما كومانداسىنىڭ جاتتىقتىرۋشىسى يسمايلدجون كاريموۆ.
جارىستىڭ اشىلۋ سالتاناتىنان سوڭ ۆەلوشاباندوزدار ۇزىندىعى 64 شاقىرىمدى قۇرايتىن سامار تاس جولىن بەتكە الىپ, ءجۇرىپ كەتتى. ون ءۇشىنشى تامىزعا دەيىن جالعاساتىن باسەكە اياسىندا وقۋشىلار 7 باعىت بويىنشا وبلىستىڭ ءار اۋماعىندا باعى مەن بابىن بايقاپ كورەتىن بولادى.
ەرەكشە اتاپ وتەر جايت, جارىس باستالاردان ءبىر كۇن بۇرىن وسىنداي ءدۇبىرلى دودالارعا كەزىندە ءوزى دە قاتىسقان, ءالى دە ارا-تۇرا شايتان اربا تەبۋگە ۋاقىت تاۋىپ جۇرەتىن وبلىس اكىمى دانيال احمەتوۆ سايىسقا سايلانىپ كەلگەن ۇزدىك 30 ۆەلوشاباندوزبەن بىرگە 25 شاقىرىمعا جۋىق جەردى ءجۇرىپ ءوتتى. «قازاقستان وقۋشىسى-2017» ۆەلوجارىسىنىڭ ماڭىزى زور. مۇنداي سايىستار جاس ۇرپاقتىڭ شىمىر دا قايراتتى, دەنىنىڭ ساۋ بولىپ وسۋىنە ۇلكەن اسەرىن تيگىزەدى. بۇل جارىسقا كەزىندە ءوزىم دە بىرنەشە مارتە قاتىسقانمىن, قازىر مىنە بالعىن سپورتشىلارمەن بىرگە بىرنەشە شاقىرىمدى باسىپ ءوتتىم. دەڭگەيى جوعارى سپورتتىق شاراعا وزبەكستان كومانداسىنىڭ دا قاتىسىپ جاتقانىنا قۋانىشتىمىز. ءدۇبىرلى دودادا بارلىق ۆەلوشاباندوزدارعا تەك ساتتىلىك تىلەيمىن», − دەيدى ءبىر مەزەت كاستيۋمىن سپورتتىق فورمامەن الماستىرىپ, جاستارعا ۇلگى كورسەتكەن ايماق باسشىسى.
ازامات قاسىم,
«ەگەمەن قازاقستان»
وسكەمەن
