ارينە, الەمدىك دەڭگەيدەگى شارانىڭ باسى-قاسىندا جۇرەتىن جاستاردىڭ موينىندا ۇلكەن جاۋاپكەرشىلىك بار. ەرىكتى اتانۋ ءۇشىن قويىلاتىن تالاپتار دا جوعارى. 18 جاسقا تولعان ازامات قازاق, ورىس, اعىلشىن جانە وزگە شەت تىلدەرىن ءبىلۋى كەرەك. بىراق, ەڭ باستىسى, كورمەگە ۇلەس قوسۋعا ىستىق ىقىلاس تانىتۋ.
ەرىكتى اتقارعان جۇمىسى ءۇشىن ماتەريالدىق پايدا تاپپايتىنى بەلگىلى. دەگەنمەن, ەلىمىزدە ءتۇرلى شارالارعا قاتىسىپ, تەگىن جۇمىس ىستەيتىندەردىڭ قاتارى كوبەيىپ كەلەدى.
مەن وڭتۇستىك قازاقستان وبلىسى, ماقتارال اۋدانىنىڭ تۋماسىمىن. استانا قالاسىندا ءوتىپ جاتقان ەكسپو-2017 حالىقارالىق مامانداندىرىلعان كورمەسىنىڭ ەرىكتىسىمىن, ياعني ۆولونتەرمىن. مەنىڭ جاسىم 25-تە. تىلدەردى وقىتۋ جانە دامىتۋ ورتالىعىندا اعىلشىن ءتىلى مۇعالىمى بولىپ جۇمىس ىستەيمىن.
مەن ءۇشىن ەرىكتى بولۋ دەگەنىمىز – جاقىنىڭا جاردەمدەسۋ, ەلىمىزدىڭ دامۋىنا تيتتەي دە بولسىن ۇلەس قوسۋ. «وڭ قولىڭ بەرگەندى سول قولىڭ كورمەسىن», – دەيدى عوي قازاقتا. قولىڭنان كەلىپ تۇرعان ءىستى جاساۋ ءبىز سياقتى جاستار ءۇشىن تۇك قيىن ەمەس. جاڭادان دوس-جاران, پىكىرلەس, سۇحباتتاس ادامداردى تابۋىڭ ءوز الدىنا. مەرەكەلىك شارالاردا ەلىمىزگە تانىمال تۇلعالارمەن تىلدەسۋگە مۇمكىندىك بار. مەن ءۇشىن باس قالامىزدىڭ كۇننەن-كۇنگە كوركەيۋىنە كۋاگەر بولۋدىڭ ءوزى باقىت.
ەكسپو-2017 حالىقارالىق كورمەسى تاريحتا قالاتىنداي وتكىزىلسە دەگەن ارمانىم بار. شەتەلدىك مەيماندار ەلىمىزدى جاقسى جاعىنان ءبىلىپ قايتسا دەيمىن. ال ءبىز سەنىپ تاپسىرىلاتىن شارۋالاردى تياناقتى ورىنداۋدى مىندەت سانايمىز.
باستى مىندەتىمىز – جاردەمدەسۋ.
نۇرساۋلە تەمىروۆا,
تىلدەردى وقىتۋ جانە دامىتۋ ورتالىعىنىڭ اعىلشىن ءتىلى مۇعالىمى
