قازىر مەدياتورلاردىڭ كومەگىنە جۇگىنىپ, كۇرمەۋى قيىن بولعان ىسىندە ەكى تاراپتى دا ريزا ەتەر وڭ شەشىمگە قول جەتكىزىپ جۇرگەندەر جوق ەمەس.
تاراپتاردى تاتۋلاستىرۋدىڭ وڭتايلى جولى سانالاتىن مەدياتسيا ءادىسى جوعارى باعالانىپ, 5 تامىز ەلىمىز بويىنشا مەدياتورلار كۇنى بولىپ بەلگىلەنگەن ەدى. اتالمىش مەرەكەنى ماڭعىستاۋ وبلىسىنىڭ قازاقستان حالقى اسسامبلەياسى, «قوعامدىق كەلىسىم» كمم جانىنان ارنايى اشىلعاننان بەرى ءوز جۇمىسىن تۇراقتى جانە جەمىستى جۇرگىزىپ كەلە جاتقان مەدياتسيا كابينەتى دە اتاپ ءوتتى. مەرەكەگە وراي اقتاۋداعى دوستىق ۇيىندە «اشىق ەسىك» كۇنى ءوتتى. «اشىق ەسىك» كۇنىن توقسان سايىن وتكىزىپ, الۋان ىستەردىڭ وڭ شەشىلۋىنە, سونداي-اق ايتارى بار تۇرعىنداردىڭ تالاپ-تىلەگىن تىڭداۋعا وتىراتىن كاسىبي مەدياتورلار بۇل كۇنى دە ىسكە بەلسەنە كىرىستى.
«اشىق ەسىك» كۇنى اقتاۋداعى «مەدياتسيانى دامىتۋ ورتالىعى» رقب كəسىبي مەدياتورلارى ا.يمانقۇلوۆا, ن.سىدىقوۆا, م.نۇرجانوۆ, ا.قادىروۆ س.نابيەۆ جانە ق.امانجول كەزەكشىلىك ەتىپ, قالا تۇرعىندارىنا تەگىن كەڭەستەر بەردى.
اشىق ەسىك كۇنى تۇرعىنداردىڭ وتىنىشتەرى نەمەسە باسقا دا مەدياتسيالىق پروتسەدۋرالار تەگىن جۇرگىزىلىپ, بۇزاقىلىق, ۇرلىق, قىزمەتىن اسىرا پايدالانۋ, اليمەنت ءوندىرۋ, قارىز اقشا ءوندىرۋ, اجىراسۋ داۋلارى بويىنشا مەدياتسيالىق كەلىسىمگە بىرنەشە ارىز قابىلداندى.
– مەدياتسيا كابينەتىنە حالىقتىڭ سۇرانىسى, قىزعۋشىلىعى جوعارى. كەلۋشىلەردىڭ تالعامىنا ساي قىزمەت ەتۋ – مەدياتورلاردىڭ دا باستى ماقساتى. سوندىقتان, ولار دا ءوز كاسىبي بىلىكتىلىگىن ۇدايى جەتىلدىرىپ, كۋرستار مەن سەمينارلاردا شىڭدالىپ وتىرادى, وزگە ءىس-تاجىريبەلەرمەن بىرگە, حالقىمىزدىڭ شەشەندىك سوزدەرىن وقىپ, بيلەر تاعىلىمىنا سۋسىندايدى. قيىن ىستەردە ەكىجاقتى كەلىسىمگە كەلىپ, ورتاق داۋلارعا وڭ شەشىمدەر تاۋىپ, تاتۋلاسىپ جاتقاندار دا از ەمەس, دەيدى «قوعامدىق كەلىسىم» مەكەمەسى ديرەكتورى ا.جايىلحانوۆا.
«اعايىن تاتۋ بولسا, اس كوپ» دەيدى حالىق تاعىلىمى. بەرەكەلى, مەرەكەلى ءومىر ءسۇرۋ – ءاربىر ادام ءۇشىن باستى قاجەتتىلىك.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
