(سۋرەت ontustik.gov.kz سايتىنان الىندى)
وسىدان ءبىر اپتا بۇرىن وڭتۇستىك قازاقستان وبلىسىندا ەڭبەك جانە حالىقتى الەۋمەتتىك قورعاۋ مينيسترلىگىنىڭ كۇندەرى باستالعان بولاتىن. ال كەشە اتالمىش سالا ءمينيسترى تامارا دۇيسەنوۆا جۇمىس ساپارىمەن كەلىپ اپتالىقتى قورىتىندىلادى.
ناقتىراق ايتساق, تامارا قاسىمقىزى وڭىردەگى «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان» باعدارلاماسى مەن «ورلەۋ» جوباسى سىندى ماڭىزدى باعدارلامالاردىڭ ورىندالۋ بارىسىن وڭ باعالادى. مينيستر, سونداي-اق, وبلىس اكىمى جانسەيىت تۇيمەباەۆپەن مىندەتتى الەۋمەتتىك مەديتسينالىق ساقتاندىرۋ جۇيەسىن حالىققا ءتۇسىندىرۋ جۇمىستارىن ودان ءارى جانداندىرۋ جايىن تالقىلاپ, وڭدى ناتيجەلەرگە جەتۋدىڭ جولدارىن ۇسىندى. الەۋمەتتىك سالالار اياسىندا اتقارىلىپ جاتقان جۇمىستار بويىنشا قالاداعى بىرنەشە نىسانداردى ارالاعان مينيستر مەن اكىم الدىمەن, «ورلەۋ» جوباسىنا قاتىسۋشى شىمكەنتتىك تۇرعىن اينۇر جامانقۇلوۆامەن كەزدەسىپ, تىگىن تسەحىنىڭ جۇمىسىمەن تانىستى. كاسىپكەر جوبا يگىلىگىن پايدالانىپ, 500 مىڭ تەڭگەگە جۋىق قارجى العان. بۇگىندە ءوز ۇيىنەن شاعىن تىگىن تسەحىن اشىپ, ايەلدەرگە ارنالعان ءساندى كيىمدەر تىگۋمەن اينالىسۋدا. ايلىق تابىسى 150 مىڭ تەڭگەنىڭ كولەمىندە. كاسىپكەر الداعى ۋاقىتتا «ورلەۋدىڭ» كەزەكتى مۇمكىندىكتەرىن ءتيىمدى پايدالانۋدى كوزدەپ وتىر.
«ستاندارت تسەمەنت» زاۋىتىندا بولىپ, جۇمىسشىلارمەن اڭگىمەلەسكەن مينيستر ت.دۇيسەنوۆا مەملەكەت تاراپىنان جاسالىنىپ وتىرعان جەڭىلدىكتەردى باياندادى. بۇگىندە 700-گە جۋىق جۇمىسشىسى بار «ستاندارت-تسەمەنت» زاۋىتى 2011 جىلى قۇرىلعان. تسەمەنت ءوندىرىپ, ونى ساتۋمەن اينالىساتىن سەرىكتەستىك جىلىنا 2 ملن. توننا ءونىم وندىرەدى. مۇنداعى تسەمەنت ونىمدەرى قازاقستاننان بولەك, وزبەكستان مەن تاجىكستانعا ساۋدالانادى. ءوز كەزەگىندە جۇمىسشىلار ءوندىرىس ورنىندا بارلىق جاعداي جاسالىپ جاتقانىن ايتىپ, زاۋىت باسشىلىعىنا العىستارىن ءبىلدىردى.
مينيستر مەن اكىم باستاعان توپ شىمكەنت قالالىق جۇمىسپەن قامتۋ ورتالىعىندا بولدى. بۇل ورتالىق 2011 جىلى قۇرىلعان, ال وتكەن جىلدان باستاپ جاڭا عيماراتتا حالىققا قىزمەت كورسەتۋدە. قازىرگى تاڭدا 60-قا جۋىق قىزمەتكەر جۇمىس ىستەيدى. تامارا قاسىمقىزى شاھار جۇرتشىلىعىن جۇمىسپەن قامتۋ سالاسىنا جاۋاپتى جەتەكشىلەرمەن تىلدەسىپ, جۇمىستى ودان ءارى شيراتۋدى تاپسىردى. كەزدەسۋگە كەلگەن قالا تۇرعىندارىنىڭ مينيسترگە قويار ساۋالدارى دا از بولمادى. مينيستر ولارعا ناقتى جاۋاپ بەردى.
وبلىس ورتالىعىنداعى بىرقاتار نىسانداردى ارالاپ, تۇرعىندارمەن تىلدەسكەن سوڭ, ساپار ناتيجەسى بويىنشا وبلىس اكىمدىگىندە الەۋمەتتىك سالانىڭ وزەكتى ماسەلەلەرى بويىنشا جيىن ءوتتى. مۇندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى اياسىندا اتقارىلعان جۇمىستار باياندالدى. سونىمەن, بيىل وڭتۇستىكتە اتالعان باعدارلاما اياسىندا 64314 ادامدى جۇمىسپەن قامتۋ جوسپارلانىپ, جالپى 11,4 ملرد تەڭگە بولىنگەن. جىل باسىنان بەرگى 7 اي ىشىندە 49,6 مىڭ ادام جۇمىسپەن قامتىلىپ, جىلدىق جوسپار 77 پايىزعا ورىندالعان. بيىل 1 تامىزعا دەيىن 36623 ادامعا جۇمىسپەن قامتۋ شارالارى كورسەتىلىپتى. ونىڭ ىشىندە, 20882 ادام تۇراقتى جۇمىسپەن قامتىلسا, 4494 ادام ۋاقىتشا جۇمىسقا تۇرىپ, 5900-دەي ازامات الەۋمەتتىك جۇمىس ورىندارىنا, 4644 ادام جاستار تاجىريبەسىنە جولدانىپتى.
جيىندا ءمالىم ەتىلگەن ماڭىزدى مالىمەتتىڭ ءبىرى − وبلىستا جارتى جىلدا 75 مىڭعا جۋىق ازامات «ورلەۋ» جوباسىنىڭ اياسىندا مەملەكەت قولداۋىنا يە بولدى. وسى ۋاقىتقا دەيىن «ورلەۋ» جوباسىنا قاتىسۋشىلاردىڭ قاتارىندا 400 بىرجولعى شارتتى اقشالاي كومەك الۋشى جەكە كاسىپكەر رەتىندە سالىق ورگاندارىنا تىركەلىپ ۇلگەرگەن. جوبانى جۇزەگە اسىرۋ ناتيجەسىندە شارتتى اقشالاي كومەك الۋشىلاردىڭ كىرىسى 3,2 ەسەگە ءوسىپ, ورتاشا ەسەپپەن جان باسىنا ايىنا 18,7 مىڭ تەڭگەنى مەجەلەدى. بۇل ورايدا مينيستر وڭتۇستىك ءوڭىرىنىڭ الەۋەتى وتە جوعارى ەكەنىن ايتا كەلە, كەي اۋداندار جۇمىستى تومەن دەڭگەيدە ىستەپ وتىرعانىن نازارعا سالدى. ميمىرت اياڭمەن كەلە جاتقان اۋداندار دەرەۋ ءوز-وزدەرىن قامشىلاماسا كەش بولاتىنىن مالىمدەدى.
عالىمجان ەلشىباي,
«ەگەمەن قازاقستان»
