جەڭىسكە بەرگىسىز ويىن

كەشە كەشكىسىن كارى قۇر­لىقتىڭ كوكمايسا الاڭدارىن­دا 2012 جىلى فۋتبولدان پول­شا مەن ۋكراينا ەلدەرىندە وتەتىن ەۋروپا چەمپيوناتى ىرىكتەۋ ءتۋرنيرىنىڭ ەڭ سوڭعى ويىندارى ءوتتى. وسى كۇنى قازاقستان ۇلتتىق قۇ­را­ماسى «استانا – ارەنا» ستا­ديو­نىن­دا ىرىكتەۋ ءتۋرنيرىنىڭ سوڭعى ماتچىن اۆستريا كومانداسىمەن ءوت­كىز­دى. بۇل ەلمەن ءبىزدىڭ قۇرامامىز ۋەفا قۇرامىنا كىرگەن كەزدەن بەرى ەكىنشى رەت كەزدەستى. وسى كەزدەسۋدە ۇلتتىق قۇرامامىز اۆستريامەن بول­عان ءبىرىنشى ويىندا جىبەرگەن ەسەسىن قايتارعىسى كەلسە دە, دىتتەگەن ماقساتىنا جەتە المادى. دەسەك تە, ەلىمىزدىڭ باس كومانداسىنىڭ كەشەگى ويىنىن جەڭىسكە بەرگىسىز دەۋگە بولادى. بۇل ماتچتا ءبىزدىڭ جىگىتتەر نامىسقا تىرىسىپ, ونەر كور­سەتتى. كەزدەسۋدىڭ سوڭىندا 94 مي­نوت بويى الاڭ يەلەرىنىڭ شابۋىل­دا­رىنا تويتارىس بەرگەن اۆستريا­لىق­تار ەستون تورەشىسىنىڭ اششى ىسقىرى­عىنان كەيىن ۋھ دەگەندەي بولدى. وسى ماتچتى ەلىمىزگە باس باپكەر بولىپ بەرانەك مىرزا كەلگەلى بەرى ۇلتتىق قۇرامامىزدىڭ ەڭ جاق­سى ويىندارىنىڭ قاتارىنا جات­قىزۋعا بولادى. كەزدەسۋدىڭ ءبىرىنشى جار­تىسى ەكى ەلدىڭ الما-كەزەك شابۋىل­دارىمەن ءوتتى. اۆستريا قۇ­را­ما­سىنىڭ گەرمانيا سياقتى قاي ەلدە, قاي جەردە بولسا دا قار­سى­لاس­تارى­مەن ساۋاتتى ويناي­تى­نىن بىلەمىز. ەكى ەلدىڭ ويىن ورنەگى ءبىر-بىرىنە ۇقساس, كەي جەردە ەكەۋى ءبىر-ءبىرىن تو­لىق­ت­ىرىپ وتىرادى. ەڭ باستىسى اۆستريا ءوزىنىڭ كورشىلەسى سەكىلدى قورعانىستا قامالىپ, كۇت­پە­گەن جاع­­دايدا شابۋىل جاساي الا­تىن كوماندا ەكەنىن ايتۋ كەرەك. كەشەگى ويىندا ولار وسى ءتاسىلدى ءبىز­دىڭ جىگىتتەرگە قولدانۋعا تىرىستى. دەگەنمەن, ءبىزدىڭ قۇراما دا قاراپ قال­مادى. ويىننىڭ ءبىرىنشى تاي­مىن­دا اۆستريالىق مارك جانكو, ستەفان كۋلوۆيتس, پاۋل شار­نەر­دىڭ شاب­ۋىل­دارىنا قارسى سەرگەي گريدين, گەنريح شميدتگال, مۇح­تار مۇح­تاروۆ, ازات نۇرعاليەۆ الىس­تان, جاقىن جەردەن ءبىر-بىرىنە پاس بەرىپ, قارسىلاستاردىڭ قاقپا­سى­نا قاۋىپتى جاعدايلار جاساپ جات­تى. بىراق, ءبىزدىڭ سوققىلاردىڭ ەشقايسىسى  نى­ساناعا ءدال تيمەدى. جالپى, ءبىرىنشى تايمدى ەكى جاق­تىڭ ءبىر-ءبىرىن زەرتتەۋىمەن ءوتتى دەسە بولادى. ءبىزدىڭ ەل اۆستريا قۇر­ا­ماسى ءۇشىن وڭاي شاعىلاتىن جاڭ­عاق ەمەس. ولار مۇنى جاقسى بىلەدى. بىل­تىر ۆەنادا وتكەن ويىندا اۆستريا قازاقستان قۇراماسىن 2:0 ەسەبىمەن جەڭگەنىمەن, ەكى گولدى دا 90-شى مينوتتەن كەيىن سالعان بولا­تىن. سوندىقتان ۆۋندەرتيم كومان­دا­سى باياعىدان بەرى ەسە قايتارۋ ءۇشىن ەكى الاقانىن ۋقالاپ وتىرعان ءبىزدىڭ ەلگە جەڭىس ءۇشىن ەمەس, جەڭىل­مەي, تەڭ ويناۋ ءۇشىن دە كەلگەن بە دەيسىز. كەشەگى ويىننىڭ ءبىرىنشى جارتىسى وسىنداي اسەر قال­دىرادى. ال ەكىنشى تايمدا تاراپتار شا­ب­ۋىل­­دارىن ۇدەتىپ, ءبىرىنشى بولىپ گول سوعۋ ءۇشىن ويناعانىن ايتۋ كەرەك. بۇل جەردە ءبىزدىڭ قۇرامانىڭ جىگىتتەرى قولدان كەلگەن مۇمكىن­دىكتىڭ ءبارىن جاسادى. بىزگە اسىرەسە سەرگەي گريديننىڭ, مۇحتار مۇح­تاروۆ­تىڭ, گەنريح شميدتگالدىڭ, قاقپاشى اندرەي سيدەلنيكوۆتىڭ, قايرات نۇرداۋلەتوۆتىڭ ويىن ءور­نەگى ۇنا­دى. قۇراما ساپىندا جارا­قاتىنا بايلانىستى بىرنەشە ويىن جىبەرىپ العان «اقتوبە» كلۋبىنىڭ قاقپا­شى­سى قارسىلاستاردىڭ قاۋىپ­تى سوق­قىلارىن قايتارىپ, جان­كۇيەر­­لەر­دىڭ ءىلتيپاتىنا بولەندى. ال بەل­گيا­مەن ويىنعا قاراعان­دا, ساۋاتتى ويناعان جىگىتتەرىمىز سيدەل­نيكوۆ­تىڭ قاقپاسىن تاس قامالداي قورعاپ وتىردى. گريدين تۋرالى اڭگىمە بولەك. بۇل ويىندا ونىڭ ءۇش رەت دوپ سوعۋعا مۇمكىندىگى بولدى. سو­نىڭ ەكەۋىندە اسىعىستىق جاساپ, قاقپاعا تيگىزە الماسا, ءۇشىن­شىسى 100 پايىز گول بولاتىن ءمۇم­كىن­دىك ەدى. ويىننىڭ اياقتالۋىنا شامامەن 15 ءمينوت قالعاندا وڭ قاپ­تال­­دان اۋەلەتىپ بەرىلگەن دوپتى ول قاق­پانىڭ ماڭدايشاسىنا تيگىزدى. وسى ساتتە جانكۇيەرلەردىڭ ءبارى جار­تى مينوتتەي ءىشىن تارتتى. سودان كەيىن ءبىزدىڭ شابۋىلدار قايتا جال­عا­سىپ, قارسىلاستارىمىز ەندى ەسىن جيا الماي قورعانۋعا كوشتى. ماتچ­تىڭ سوڭعى 10 ءمينوتى ءبىزدىڭ باسىم­دىلىقپەن ءوتتى. ال كەزدەسۋ­دىڭ سوڭعى سەكونتتەرىندە جىگىتتەر­دىڭ تاعى ءبىر قاۋىپتى جاعداي جاساۋعا مۇمكىندىگى بولدى. بۇيىرماعان گول تاعى بول­مادى. امال نە, بىزگە وسى كۇنى جەڭىس قىرىن قارادى. تەك جە­ڭىل­مەگەنىمىز ءۇشىن ءوزىمىزدى جۇباتۋ­عا تۋرا كەلەدى. ارينە, الدا ءالى تالاي جارىستار بار. سول سىنداردا ۇلت­تىق قۇراما­مىز ازۋلى كوماندالارعا لايىقتى قارسىلاس بولاتىنىنا سەنەمىز. بيىل­عى ەۋروپا چەمپيوناتى ىرىكتەۋ تۋرنيرىندە قازاقستان قۇرا­ما­سى سوڭعى ور­ىن­دا قالسا دا كارى قۇرلىقتىڭ ءتىس قاققان ەلدەرىنە قالپاعىن باسىنان ۇرىپ تۇسىرەتىن كوماندالاردىڭ قاتارىنان ەمەس ەكەنىن دالەلدەدى. بۇل جەردە باس باپكەر ميروسلاۆ بەرانەكتىڭ ۇلت­تىق قۇرامانىڭ وي­نى­نا جاڭا كوز­قاراس, ەكىنشى دەم بەر­گەنىن ايتۋعا ءتيىسپىز. وسى ما­مان­نىڭ كوماندا تىزگىنىن ۇستاعالى بەرى وتكىزگەن بەس ماتچتا  قازاقستان قۇراماسى بەدەلى بيىك كوماندالار ساناساتىن جاڭا دەڭگەيگە شىقتى. كەلەسى جىلى قازاقستان قۇ­راماسى الەم چەمپيوناتى ىرىكتەۋ تۋرنيرىنە تاعى قاتىسادى. بۇل جولى ءبىزدىڭ قۇراما اۆستريا جانە گەرمانيامەن تاعى كەزدەسەدى. يرلانديا, فارەر ارالدارى مەن شۆەتسيا قۇرامالارى دا بىزبەن ءبىر توپتا وينايتىن كوماندالار بولادى. داستان كەنجالين.