بۇل جولى ءبىز الدەقايدا جاقسى وينادىق. جىگىتتەر سوڭىنا دەيىن تىرىسىپ باقتى. جەڭىسكە دەگەن قۇلشىنىسىمىز دا جوعارى بولدى. وكىنىشكە وراي, ازداعان ساتتىلىكتەر جەتىسپەي قالدى. بۇگىنگى ويىنىمىزعا كوڭىلىم تولعانمەن, كەلەسى كەزەڭگە وتە الماعانىمىزعا ىشتەي قىنجىلىپ وتىرمىن. جانكۇيەرلەرىمىزگە العىس ايتامىن. ولار ءبىزدى سوڭعى سەكۋندتارعا دەيىن قولدادى.
- «استانانىڭ» باس جاتتىقتىرۋشىسى «لەگيانىڭ» جاقسى ويناعانىن ەرەكشە اتاپ ءوتتى. بىراق ءبىر عانا گولدان بولەك, كەلەسى كەزەڭگە وتۋگە نە كەدەرگى بولدى؟
- ەڭ بىرىنشە, ديستسيپلينا جەتىسپەدى, ەكىنشى جۋنيور كابانانگاعا قارسى ويناۋ وڭاي بولمادى. ەندى «لەگيانى» ەۋروپا ليگاسىنا ءتۇسۋ ءۇشىن ۇلكەن سىناق كۇتىپ تۇر. ءبىز مىندەتتى تۇردە توپتىق كەزەڭگە جولداما الۋىمىز كەرەك. وسىعان قاتتى ءمان بەرەتىن بولامىز. ارينە, وعان دەيىن پولشا چەمپيوناتىندا وتكىزەتىن ەكى ويىنىمىز بار.
- «لەگيا» بۇگىن ءۇش مارتە عانا ءدال سوققى جاساي الدى...
- ءيا, ساتتىلىك جەتىسپەدى. قاقپانى ءدال كوزدەگەنمەن, ويعا العان جوسپار ورىندالمادى. «استانا» توعىز ويىنشىسىمەن قورعانىستا ويناعان ساتتەر دە بولدى.
- مۇنداي ماڭىزدى ويىندا الاڭعا تاجىريبەسى از, جاس سەباستيان شيمانسكيدى جىبەردىڭىز...
- ۇجىمدا قانشا ويىنشىمىز بولسا, ءبارىنىڭ ونەرىن ورتاعا سالۋعا تىرىسامىن. شيمانسكي جاس بولعانمەن, تالانتتى ويىنشى. جاتتىعۋلاردا ءوزىن اياماي, بارىن سالىپ دايىندالىپ جۇرەدى. بۇگىنگى ويىنعا شىعۋعا لايىقتى ەكەنىنە كوز جەتكىزگەن بولاتىنمىن. وسى قالپىندا جالعاستىرار بولسا, بيىك بەلەستەردى باعىندىراتىن بولادى. ونىڭ جەڭىسكە دەگەن قۇلشىنىسى جالىن اتقان كوزدەرىنەن انىق بايقالىپ تۇرادى.
- بۇل كەزەڭدە نەگىزگى جەڭىمپاز العاشقى ويىندا-اق انىقتالىپ قويعان دەپ ايتۋعا بولا ما؟
- ولاي ايتپاس ەدىم. بۇگىن ءبىزدىڭ كەلەسى كەزەڭگە وتەتىن مۇمكىندىگىمىز بولعان ەدى. بىراق ساتتىلىك ءبىزدىڭ جاقتا بولمادى. وسىعان قىنجىلىپ وتىرمىن.
ايان ءابدۋالي,
"ەگەمەن قازاقستان"
