- شىنى كەرەك, العاشقى ويىنعا قاراعاندا «لەگيا» بۇگىن بىزدەن جاقسىراق وينادى. قارسىلاستارىمىزدىڭ ءبىر-ەكى مۇمكىندىگى بولسا, بىزدە بىرەۋ عانا بولدى. سەبەبى, بۇگىن كوماندام ۇلكەن قىسىمنىڭ استىندا ويناۋىنا تۋرا كەلدى. «استانانىڭ» وسىمەن ءۇشىنشى رەت چەمپيوندار ليگاسىنىڭ نەمەسە ەۋروپا ليگاسىنىڭ توپتىق كەزەڭىندە ويناۋىنا مۇمكىندىك تۋىپ تۇر. ءبىز ءۇشىن بۇل ۇلكەن جەتىستىك. وسى ورايدا بۇكىل قازاقستاندى, «استانانىڭ» بۇكىل جانكۇيەرىن قۇتتىقتاعىم كەلەدى. ۇجىمىمىزدا قىزمەت ەتەتىن ءاربىر ادام, فۋتبولشى, باپكەرلىك القادا جۇرگەن ءاربىر جاننىڭ بۇعان قوسقان ۇلەسى زور. بۇل ماتچتىڭ قيىن بولاتىنىن الدىن الا ءبىلىپ كەلدىك. ارينە, وسىنداي ۇلكەن كوماندالارمەن باسەكەلەسۋ ارقىلى چەمپيوناتىمىزدىڭ دەڭگەيى دە ارتا تۇسەدى. بۇل ويىندا ءتىپتى, قاپتال قورعاۋشىسى ابزال بەيسەبەكوۆتىڭ دە شابۋىلعا ارالاسۋىنا تۋرا كەلدى. سونىمەن قاتار, مارين دە ۇزاق ۋاقىتقا قاتاردان شىعىپ قالعان سىڭايلى.
- ەكى فۋتبولشىنى تىم ەرتە اۋىستىرۋ ويىنعا قاتتى اسەر ەتكەن جوق پا؟
- مەنىڭشە, ءبارى دەر كەزىندە جاسالدى. بىزدە شابۋىلدا ازداپ قيىندىقتار بولدى. العى شەپتە ونەر كورسەتەتىن ويىنشىلارىمىز ازداۋ.
- استانا قالاسىندا ورتالىق الاڭدا مىڭداعان جانكۇيەر الاڭعا شىعىپ, ماتچتى تاماشالادى. ولار ءسىزدىڭ گول جىبەرگەندەگى جاعدايىڭىز قانداي بولعانىن سۇراپ جاتىر؟ جۇرەگىڭىز ورنىندا ما؟ دەنساۋلىعىڭىز؟
- شىنى كەرەك, باپكەرلەرگە ارتىلار جۇكتىڭ سالماعى وتە اۋىر. ءبىزدى قولداعان جانكۇيەرلەرىمىزگە العىسىمىز شەكسىز. «استانانىڭ» قۇرىلعانىنا كوپ ۋاقىت بولماسا دا قازاقستاندى ەۋروپادا لايىقتى دەڭگەيدە تانىتىپ جۇرگەن بىردەن ءبىر كلۋب دەپ ايتۋعا بولادى. بۇل ءبىز ءۇشىن ۇلكەن جەتىستىك. ءۇش جىل بۇرىن وسىندا كەلگەنىمدە ەۋروكۋبوقتىق ويىندار تۋرالى اسا قاتتى ويلامايتىن ەدى. ال سوڭعى ءۇش جىلدا تۇراقتى تۇردە كارى قۇرلىقتىڭ جارىستارىنان قالماي كەلەدى. تاعى ءبىر ايتا كەتەرىم, «لەگيا» وتە مىقتى ۇجىم. بۇل كوماندانىڭ جانكۇيەرلەرى دە, بىلىكتى جاتتىقتىرۋشىلارى دا بار. ولار ءۇشىن ءبارى جاسالعان. العاشقى ويىندا ءبىز ءوز جەرىمىزدە مىقتى بولساق, بۇگىن «لەگيا» مىقتىلىعىن دالەلدەدى.
- ءسىزدىڭ «استانامەن» كەلىسىمشارتىڭىز وسى جىلى اياقتالادى. الداعى ۋاقىتتا ونى ۇزارتۋ جوسپارىڭىزدا بار ما؟
- مۇنداي اۋىر ماتچتان كەيىن بىردەن جاۋاپ بەرۋ وڭاي ەمەس. «استانا» ەۋروپادا جاقسى ونەر كورسەتىپ ءجۇر. دەگەنمەن, بىزدەگى فۋتبولدا ءبىراز جايتتى وزگەرتكىم كەلەدى. دۇرىس باعىتتا كەلە جاتىرمىز. كەلىسىمشارتتى ۇزارتۋ جاعىن الداعى ۋاقىتتا تالقىلايتىن بولامىز.
- ءۇشىنشى ىرىكتەۋ كەزەڭىندەگى بارلىق ويىندار اياقتالدى. كەلەسى كەزەڭگە شىققان ون كوماندا انىقتالدى. ەندىگى پلەي-وففتا قارسىلاس كوماندا قايسىسى بولعانىن قالار ەدىڭىز؟
- "ماريبور", "وليمپياكوس", "كوپەنگاگون", "سەلتي", اپوەل. بۇل كوماندالاردىڭ ءبارىن فاۆوريتتەر قاتارىندا ەسەپتەيمىن.
- موكيننىڭ جاراقاتتى قانشالىقتى اۋىر؟
- شىنىمدى ايتسام, بىلمەيمىن. قاتتى سوققىدان كەيىن اياعى قاناعانىن كوردىم. ءسوزىمدى قورىتايىن. «لەگياعا» ساتتىلىك تىلەيمىن! ەۋروپا ليگاسىنىڭ توپتىق كەزەڭىنە جولداما الۋىنا تىلەكتەسپىن!
ايان ءابدۋالي,
"ەگەمەن قازاقستان"
