قورعانىس مينيسترلىگىنىڭ رەسمي سايتىنىڭ مالىمەتىنشە, بۇل شارا ەلدەر اراسىنداعى دوستاستىق پەن قارىم-قاتىناستاردىڭ ىنتىماقتاستىعىنا, سونداي-اق اسكەري قىزمەتشىلەردىڭ جاۋىنگەرلىك دايارلىق جانە كاسىبي شەبەرلىك دەڭگەيىنىڭ ارتۋىنا وڭ اسەر ەتەدى.
«ارميالىق حالىقارالىق ويىنداردى وتكىزۋ شىنايى جاۋىنگەرلىك باۋىرلاستىق پەن ادامي دوستىقتىڭ نەگىزى بولىپ تابىلادى جانە ەلباسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى تاراپىنان لايىقتى قولداۋ تاۋىپ كەلەدى. ارميالىق ويىندار كولەمدى الەمدىك سپورتتىق بىرىنشىلىكتەردەن ەش ايىرماسى جوق, حالىقارالىق اۋقىمداعى كەرەمەت ءىس-شارا. ءبىز ءۇشىن ونى ەڭ جوعارى دەڭگەيدە قازاقستاندا وتكىزۋ ۇلكەن ابىروي», — دەدى قر قورعانىس ءمينيسترى گەنەرال-پولكوۆنيك س. جاسۇزاقوۆ.
ارميالىق حالىقارالىق ويىنداردىڭ اشىلۋ باعدارلاماسىنا سايكەس, قازاقستاندىق بارابانشىلار مەن دومبىراشىلار جانە قازىرگى زامانعى جاۋىنگەرلىك تەحنيكانىڭ («ارلان» بروندى-دوڭگەلەكتى ماشينالارى, «ت-72 ب» تانكتەرى) سۇيەمەلدەۋىمەن قر قم اسكەري وركەسترى ونەر كورسەتتى. دەسانتشىلار روتاسىنىڭ ورىنداۋىندا كوپشىلىككە قارۋمەن قول جەكپە-جەگى ۇرىسىنىڭ كورسەتىلىمى ۇسىنىلدى. قازاقستان اسكەرىنىڭ جاۋىنگەرلىك ۇشاقتارى مەن تىككۇشاقتارى پيلوتاجدىق توبىنىڭ اۋە شوۋى ارميالىق ويىنداردىڭ اشىلۋىنىڭ شارىقتاۋ شەگى بولعانىن اتاپ ءوتۋ كەرەك. ارميالىق حالىقارالىق ويىندار شەڭبەرىندەگى «ارتيللەريالىق اتىس شەبەرى», «مەرگەندىك شەبى» جانە «ۇشقىشسىز ۇشۋ اپپاراتتارى ەسەپتوپتارىنىڭ جارىسى» بايقاۋلارى قازاقستاندا 1-9 تامىز ارالىعىندا وتەدى.
