سوناۋ ەكى مىڭ شاقىرىم الىستا, موڭعوليانىڭ باي-ولكە جەرىن مەكەندەپ وتىرساق تا ەڭ الدىمەن ەلەڭ ەتىپ قازاق ەلىنەن جەتكەن حابارلارعا قۇلاق ءتۇرىپ وتىرامىز. سول ۇردىسپەن ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسى باسپاسوزدە جاريالانعانىن تەلەحاباردان ەستي سالا عالامتورعا ۇڭىلدىك. قايمانا قازاق بالاسى ءۇشىن قاجەتتى دەپ كورىلگەن قۇندى پىكىرلەر قامتىلعان بۇل ماقالاداعى ەڭ وزەكتى ماسەلەنىڭ ءبىرى – لاتىن الىپبيىنە كوشۋ جايى ەكەن.
مەنىڭ اجەم بارەنباي مايلىحانقىزى بالا كەزىمىزدە لاتىن قارپىمەن حات جازىپ وتىرۋشى ەدى. «بۇل لاتىن ءارپى. بۇرىن بىزدەر وسى جازۋ ءتۇرىن پايدالانعانبىز, كەيىن ورىستىڭ كيريلل دەگەنىنە كوشتىك» – دەپ تۇسىندىرەتىن. 1941 جىلى بايان-ولگەي ايماقتىق «وركەندەۋ» گازەتىنىڭ تۇڭعىش سانى دا لاتىن قارپىمەن جارىق كورگەن. بۇدان شىعاتىن قورىتىندى – موڭعوليا قازاقتارى قازاق ەلىندەگى قانداستارىمەن بىرگە لاتىنشاعا, سوسىن كيريللگە كوشتى. جانە وتە دۇرىس ىستەدى. اعايىننان اجىراپ قالماۋ ءۇشىن, ورتاق رۋحانياتتان اداسپاۋ ءۇشىن بۇل وتە ۇلكەن ماڭىزعا يە بولدى. ەندى مىنەكي, ءححى عاسىردا دا شەتەل قازاقتارى بۇل ۇردىستەن جاڭىلماي جاڭا الىپبيگە اتاجۇرتتاعى اعايىنمەن بىرگە كوشەدى دەپ ويلايمىن. ال بۇعان قازاق ەلىنىڭ جان-جاقتى كومەگى قاجەت. ۇكىمەت جاڭا الىپبيگە كوشۋ ماسەلەسىنە ارنالعان جوسپار, جوبا جاساعاندا شەتەلدەگى قازاق قاۋىمىن قايتكەن كۇندە دە قامتۋى قاجەت.
ەرباقىت نۇسىپ ۇلى,
«جاڭا ءداۋىر» گازەتىنىڭ رەداكتورى,
جازۋشى (موڭعوليا)
