«جارىسقا قاتىسۋعا الماتى, كوكشەتاۋ, پەتروپاۆل قالالارىنان 30-عا جۋىق ءوتىنىش ءتۇستى. ولارعا كولىكتەردىڭ بەزەندىرىلۋى, دىبىستىق-مۋزىكالىق ەرەكشەلىكتەرى, جىلدامدىقتى ساعاتىنا 60 شاقىرىمنان اسىرماۋ, كەدەرگىلەردەن مۇلتىكسىز ءوتۋ سەكىلدى تالاپتار قويىلدى», دەيدى جارىستى ۇيىمداستىرۋشى ۆيكتور سەمىكين.
سىرتقى جولاق ەرەجەلەرىن ءبارى ساقتاعانىمەن, ۇزىندىعى ءبىر شاقىرىم ىشكى اينالما جولدا ونەر كورسەتۋ, مانەۆر جاساۋ كەي ۇمىتكەرلەرگە ەداۋىر قيىندىق تۋدىردى.
كوكشەتاۋدان كەلگەن ۆيتالي لۋزين بۇل جوباعا جىل باسىنان دايىندالىپ, «لادا» كولىگىن «الەم-جالەم» بەزەندىرۋگە 3 ميلليون تەڭگە قاراجات جۇمساپتى. ماسەلەن, 8 سابۆۋفەر دىبىس كۇشەيتكىشىن ورناتىپتى.
جەڭىمپازدار مەن جۇلدەگەرلەرگە اۆتوسالون يەلەرى ءوز سىي-سياپاتتارىن كورسەتتى.
جارىستى ۇيىمداستىرۋشىلار الداعى ۋاقىتتا مۇز ۇستىندەگى جىلدام مانەرلەپ سايىسىن وتكىزۋدى بەلگىلەپ وتىر.
ءومىر ەسقالي,
«ەگەمەن قازاقستان»
