مادەنيەت جانە سپورت مينيسترلىگىنىڭ قولداۋىمەن «ەكسپو-2017» باعدارلاماسى اياسىندا «استانا وپەرا» موبت-دا وتكەن وپەرا ونەرىنىڭ ححV حالىقارالىق بايقاۋى وسى جىلدىڭ جارقىن مادەني وقيعالارىنىڭ ءبىرى دەۋگە تولىق نەگىز بار.
جىل سايىن «وپەرالياعا» قاتىسۋ ءۇشىن جۇزدەگەن ۇمىتكەردەن ءوتىنىم تۇسەدى, ولاردىڭ ىشىنەن تەك تاڭداۋلى 40 ءانشى عانا حالىقارالىق قازىلار القاسى الدىندا ونەر كورسەتۋ مۇمكىندىگىن يەلەنەدى. ءبىر ايتا كەتەرلىگى, ۆوكالدىق جارىس الەمنىڭ ءتۇرلى قالالارىندا وتكىزىلىپ كەلەدى. وسى جىلى 17 ەلدەن قاتىسۋشى ارتىستەر استاناعا ات باسىن بۇردى. پلاسيدو دومينگونىڭ داۋىس بەرۋگە قاتىسپايتىنى بەلگىلى, الايدا, سوعان قاراماستان وپەرا مايتالمانى بارلىق بايقاۋ كەزەڭىندە انشىلەرگە قولدان كەلگەنشە كومەگىن اياماي, ولاردىڭ شىعارماشىلىعى مەن ونەرىنە قاتىستى اقىل-كەڭەسىن بەرىپ وتىرۋدا ەش جالىققان جوق.
وسى ورايدا ايتا كەتەتىن جايت, ەڭ جاس ۆوكالشىنىڭ پلاسيدو دومينگونىڭ لوس-اندجەلەس (اقش) پەن ۆالەنسيادا (يسپانيا) اشقان جاستار باعدارلاماسىنا قاتىسۋعا مۇمكىندىگى بار. بىراق مۇنداي باقىتقا كىم يە بولاتىنىن دومينگونىڭ ءوزى ەمەس, بايقاۋدىڭ ۇيىمداستىرۋ كوميتەتى شەشەدى.
ءداستۇر بويىنشا بايقاۋدىڭ اقتىق كەزەڭىنىڭ رەسمي اشىلۋىنان كەيىن پ.دومينگو «استانا وپەرا» سيمفونيالىق وركەسترىنىڭ ديريجەرلىك پۋلتىنە جايعاستى. ەگەر الدىڭعى كەزەڭدەردە قاتىسۋشىلاردىڭ قازىلار الدىندا 2 تۋىندى ورىنداۋ مۇمكىندىگى بولسا, شەشۋشى سايىستا 14 قاتىسۋشى ءبىر وپەرالىق اريادان ازىرلەگەن ەدى.
سارسۋەلانى ۇزدىك ورىنداعانى ءۇشىن 5 قاتىسۋشى-ۇمىتكەر وپەرەتتاعا جاقىن بولىپ كەلەتىن يسپان مۋزىكالىق-ساحنالىق جانرىنان ءبىر اريادان ورىندادى. ناتيجەسىندە پلاسيدو دومينگونىڭ اناسى, پەپيتا ەمبيل دە دومينگو سىيلىعى جانە 10 مىڭ دوللار ادەلا زاحارياعا (سوپرانو, رۋمىنيا) بۇيىردى, ال ماەسترو دومينگونىڭ اكەسى, ۇلكەن-پلاسيدو دومينگو سىيلىعى مەن 10 مىڭ دوللاردى ماركو چاپوني (تەنور, يتاليا) الدى.
ريحارد ۆاگنەر مەن ريحارد شتراۋس وپەرالارىنان رەپەرتۋاردى ۇزدىك ورىنداعانى ءۇشىن اتاقتى شۆەد ءانشىسى بيرگيت نيلسون اتىنداعى قوسىمشا جۇلدە مەن 15 مىڭ دوللار كولەمىندەگى اقشالاي قاراجات وكسانا سەكەرينا (سوپرانو, رەسەي) مەن بوريس پريگلگە (باس-باريتون, چەحيا) بۇيىردى.
وپەرا اريالارى مەن سارسۋەلا شىرقالعاننان كەيىن, بارلىق قاتىسۋشىلار پلاسيدو دومينگو سۇيەمەلدەۋىندەگى «استانا وپەرا» وركەسترىمەن ماەسترونىڭ ۇلى, كىشى-پلاسيدو دومينگو جازعان «وپەراليانىڭ» رەسمي ءانۇرانىن ورىندادى.
فينالدىق كەزەڭ اياقتالعان سوڭ, قازىلار القاسى عانا ەمەس, سونداي-اق, كورەرمەندەر دە سۇيىكتى قاتىسۋشىسىنا داۋىس بەرۋ مۇمكىندىگىنە يە بولدى. الدىن الا بەرىلگەن قىزىل جانە كوك ءتۇستى كارتوچكالاردى بايقاۋعا قاتىسۋشىلاردىڭ سۋرەتتەرى بەكىتىلگەن ارنايى قوراپتارعا تاستادى. «روليكس» كومپانياسىنىڭ وكىلى روليكس قول ساعاتى تۇرىندەگى «كورەرمەن كوزايىمى» جۇلدەسىن ماريا مۋدرياك (سوپرانو, قازاقستان) پەن لەون كيمگە (باريتون, كورەيا رەسپۋبليكاسى) تابىس ەتتى.
بيىل استانادا وتكەن بايقاۋدا ماەسترو پلاسيدو دومينگو اقتىق سايىسقا جەتكەن, بىراق نەگىزگى اقشالاي قاراجاتقا قول جەتكىزە الماعان ءəربىر قاتىسۋشىنى 5000 دوللار كولەمىندەگى ىنتالاندىرۋ سىيلىعىمەن ماراپاتتاۋ تۋرالى شەشىم قابىلدادى. ىنتالاندىرۋ سىيلىعىنا رۋپەرت ەنتيكناپ (كونترتەنور, ۇلىبريتانيا), سۋ يون پاك (سوپرانو, كورەيا), ۆلادا بوروۆكو (سوپرانو, رەسەي), ەممەت و’حەنلون (باريتون, اقش), رۋسلانا كوۆال (سوپرانو, ۋكراينا), داميانا ميتستسي (سوپرانو, يتاليا) يە بولدى.
– كوپتەگەن انشىلەر بيىك بەلەستەردى باعىندىرىپ ۇلگەرگەن بولۋى مۇمكىن, بىراق «وپەراليا» بولماعاندا ولار تۋرالى ءبىز وسىنشاما مول ماعلۇماتقا قانىعار ما ەدىك؟ مىنە, بۇل «وپەراليانىڭ» نەگىزگى مىندەتى – الەمگە جاڭا ارتىستەردى تانىتۋ, ولاردىڭ ەسىمىن بارىنشا پاش ەتۋ, – دەپ اتاپ ءوتتى ماەسترو دومينگو.
«وپەرالياعا» كسرو حالىق ءارتىسى بيبىگۇل تولەگەنوۆا قۇرمەتتى قوناق رەتىندە شاقىرىلدى. ول ءانشى, مۋزىكانت, ديريجەر پلاسيدو دومينگونىڭ الەمدىك دەڭگەيدەگى ەرەكشە دارىندى تۇلعا ەكەنىن اتاپ ءوتتى.
– «وپەراليا» بايقاۋىنىڭ قازاقستاندا, ەلوردامىزدا وتكەنى ءبىز ءۇشىن ۇلكەن قۇرمەت ءارى وراسان زور ماقتانىش, – دەدى ءوز سوزىندە ب.تولەگەنوۆا.
قارشىعا كۇلەن
